ទិដ្ឋភាពនៅផ្សារ Makro ក្នុងរាជធានីភ្នំពេញ។ ហេង ជីវ័ន
ភ្នំពេញៈ ផ្សារពហុផលិតផលថៃ Siam Makro Pcl គ្រោងនឹងចំណាយប្រាក់ចំនួន ១១ ពាន់លានបាត (ប្រមាណជាង ៣២៨ លានដុល្លារ) បន្ថែមទៅលើការពង្រីកហាងចំនួន ៣០ ដែលក្នុងនោះនឹងបើកចំនួន ២ បន្ថែមទៀតនៅប្រទេសកម្ពុជាក្នុងឆ្នាំនេះ ដើម្បីចាប់យកការកើនឡើងតម្រូវការនាពេលបច្ចុប្បន្ន។
កាសែតបាងកកប៉ុស្តិ៍បានរាយការណ៍កាលពីថ្ងៃទី ១ ខែមេសា ដោយដកស្រង់យកសម្តីលោកស្រី Suchada Ithijarukul នាយកប្រតិបត្តិរបស់ក្រុមហ៊ុនដែលបានលើកឡើងថា ការវិនិយោគនេះនឹងត្រូវបានប្រើដើម្បីបើកដំណើរការហាង Makro ថ្មីចំនួន ៣០ ដោយក្នុងនោះនៅប្រទេសថៃចំនួន ២៥ ឥណ្ឌា ៣ និង ២ នៅកម្ពុជា។
ផែនការពង្រីកនេះបានធ្វើឱ្យចំនួនហាងរបស់ក្រុមហ៊ុន Makro ក្នុងឆ្នាំ ២០២២ នេះកើនឡើងដល់ ១៨៤។ ក្នុងចំណោមហាងសរុប គឺហាងចំនួន ១៧២ មានទីតាំងនៅក្នុងប្រទេសថៃ និង ១២ កន្លែងក្រៅប្រទេស។
លោកស្រី Suchada បានថ្លែងថា៖ «ការលក់របស់យើងក្នុងត្រីមាសទី ១ ឆ្នាំនេះ បានកើនឡើងសម្រាប់ផ្នែកភោជនីយដ្ឋាន និងសណ្ឋាគារ»។
លោកស្រីឱ្យដឹងទៀតថា ការបើកហាងសេវាកម្មអាហាររបស់ក្រុមហ៊ុន Makro នៅឆ្នាំនេះគឺជាការផ្តោតការយកចិត្តទុកដាក់ថ្មីមួយ។ ហាងទាំងនេះមានទំហំចន្លោះពី ១ ០០០ ទៅ ២ ០០០ ម៉ែត្រការ៉េ ដែលមានន័យថា ហាងទាំងនេះត្រូវការការវិនិយោគកាន់តែតិច ប៉ុន្តែនៅតែអាចបំពេញតម្រូវការអតិថិជនបាន។
យោងតាមលោកស្រី Suchada ផែនការអាជីវកម្មដើមរបស់ក្រុមហ៊ុន Makro នឹងត្រូវបានធ្វើឱ្យប្រសើរឡើងទៅជាមជ្ឈមណ្ឌលដឹកជញ្ជូនសម្រាប់អតិថិជនសេវាកម្មម្ហូបអាហារ។ លោកស្រីបន្តថា ក្រុមហ៊ុនក៏នឹងវិនិយោគដើម្បីពង្រីកអាជីវកម្មរបស់ក្រុមហ៊ុន Siam Food Services Ltd ដែលជាក្រុមហ៊ុននាំចូល និងចែកចាយផលិតផលក្លាស្សេ និងផលិតផលត្រជាក់របស់ខ្លួនផងដែរ។
លោកស្រី Suchada ត្រូវបានដកស្រង់សម្តីដោយបានលើកឡើងថា៖ «អតិថិជនវ័យក្មេងកាន់តែច្រើនកំពុងធ្វើអាជីវកម្មជាមួយផ្សារ Makro ហើយពួកគេត្រូវការប្រភេទផលិតផល និងសេវាកម្មកាន់តែច្រើនឡើង។ ក្រុមហ៊ុន Maknet ត្រូវបានបង្កើតឡើងជាដំណោះស្រាយមួយសម្រាប់ម្ចាស់អាជីវកម្មទាំងនោះ»។
លោកស្រីបញ្ជាក់ថា៖ «ថ្នាលបច្ចេកវិទ្យានេះនឹងជួយយើងមិនត្រឹមតែពង្រីកមូលដ្ឋានអតិថិជន និងមូលដ្ឋានក្រុមហ៊ុនផ្គត់ផ្គង់ប៉ុណ្ណោះទេ ប៉ុន្តែថែមទាំងជាមូលដ្ឋានសេវាកម្មផងដែរ។ កម្មវិធី Maknet នឹងក្លាយជាផ្នែកមួយសំខាន់ដើម្បីគាំទ្រដល់កំណើនអនាគតរបស់ក្រុមហ៊ុន Makro ដោយជំរុញការលក់ពីបណ្ដាញលក់រាយពី ១២ ភាគរយនៃចំនួនសរុបកាលពីឆ្នាំមុនដល់ ៣០ ភាគរយក្នុងរយៈពេល ៣ ឆ្នាំបន្ទាប់»។
យោងតាមការស្រាវជ្រាវរបស់ក្រុមហ៊ុនអចលនទ្រព្យ CBRE Cambodia ដែលចេញផ្សាយកាលពីខែកុម្ភៈ ឆ្នាំ ២០២២ នៅពេលថ្មីៗនេះ រាជធានីភ្នំពេញមានកន្លែងលក់រាយសរុបដល់ជាង ៤០០ ០០០ ម៉ែត្រការ៉េ ខណៈដែលអត្រាជួលលក់រាយក្នុងរាជធានីជាមធ្យមមានចំនួន ៦៧ ភាគរយធៀបឆ្នាំ ២០២១ ធ្លាក់ចុះពី ៨៤ ភាគរយកាលពីឆ្នាំ ២០២០។
របាយការណ៍នេះ ចុះបញ្ជីតម្លៃជួលប្រចាំខែជាមធ្យមក្នុងអំឡុងឆ្នាំនេះចំនួនជាមធ្យម ២៧ ដុល្លារសម្រាប់ហាងលក់នៅតាម «ផ្សារទំនើប » (ធ្លាក់ចុះ ៦ ភាគរយធៀបទៅនឹងរយៈពេលដូចគ្នាកាលពីឆ្នាំមុន), តម្លៃ ២៤ ដុល្លារសម្រាប់ហាងលក់ទំនិញនៅតាម «ផ្លូវធំៗ» (ធ្លាក់ចុះ ១០ ភាគរយ), តម្លៃ ២១ ដុល្លារសម្រាប់ហាងលក់តាម «ហាងលក់ទំនិញតាមអគារពាណិជ្ជកម្ម» (ធ្លាក់ចុះ ៣៦ ភាគរយ) និងតម្លៃ ២០ ដុល្លារសម្រាប់ហាងលក់តាម «ផ្សារទំនើបខ្នាតធំ» (ធ្លាក់ ១៧ ភាគរយ)។
ក្រុមហ៊ុន CBRE Cambodia បានកត់សម្គាល់ថា យីហោអន្តរជាតិល្បីៗចំនួន ២០ បានបង្ហាញខ្លួនលើកដំបូងនៅក្នុងព្រះរាជាណាចក្រកម្ពុជាកាលពីឆ្នាំមុន រួមមានហាងលក់ 7-Eleven ហាង Pizza Hut, ហាង Fila, ហាង Papa John''s និងហាង Ralph Lauren ជាដើម។
ក្រុមហ៊ុន CEBR ក៏បានព្យាករថា ក្រឡាផ្ទៃលក់រាយនៅរាជធានីភ្នំពេញនឹងកើនឡើងជាង ១៩០ ០០០ ម៉ែត្រការ៉េនៅឆ្នាំនេះ តាមរយៈហាងលក់ជាច្រើនដែលត្រូវបានចាត់ថ្នាក់ជា «ផ្សារទំនើប» (ជាង ១១០ ០០០ ម៉ែត្រការ៉េ) «ហាងលក់ទំនិញតាមអគារពាណិជ្ជកម្ម» (ជាង ៥០ ០០០ ម៉ែត្រការ៉េ) ហាងលក់ «ផ្សារទំនើបខ្នាតធំ» (ជាង ២៥ ០០០ ម៉ែត្រការ៉េ) និងហាងលក់ «ប្រភេទផ្សេងៗទៀត» (ជាង ១ ០០០ ម៉ែត្រការ៉េ)។
ក្រុមហ៊ុននេះបានចុះបញ្ជីគម្រោងលក់រាយមួយចំនួនដែលគ្រោងនឹងបើកដំណើរការនៅឆ្នាំ ២០២២ នេះមានដូចជា ផ្សារទំនើប ជីប ម៉ុង សែនសុខ ផ្សារទំនើបជីប ម៉ុង ២៧១ មេហ្គាម៉ល ផ្សារទំនើបព្រីនស៍ អ៊ីនធឺណាស្យូណាល់ផ្លាហ្សា និងផ្សារទំនើប ឡាក់គី ផាវីលីន ម៉ល៕ LA
វីដេអូ៖
