កម្មករនិយោជិតនៃរោងចក្រកែច្នៃផលិតផលពីកៅស៊ូ Southern Rubber Industry នៅវៀតណាម។ vns
ទីក្រុងហាណូយៈ តម្លៃកៅស៊ូទាំងកៅស៊ូសំយោគដែលផលិតចេញពីសំណល់ប្រេងឥន្ធនៈ និងកៅស៊ូធម្មជាតិសកលគឺស្ថិតនៅលើនិន្នាការកើនឡើង ប៉ុន្តែមិនមែនអាជីវកម្មទាំងអស់នៅក្នុងឧស្សាហកម្មនេះមានទំនុកចិត្តគ្រប់គ្រាន់ក្នុងការកំណត់គោលដៅប្រាក់ចំណេញខ្ពស់សម្រាប់ឆ្នាំនេះទេ។
តម្លៃទំនិញជ័រកៅស៊ូនេះបានកើនឡើង ៩ ភាគរយបើធៀបនឹងដើមខែមេសា។
ផ្នែកសេដ្ឋកិច្ចពាណិជ្ជកម្មក៏បានព្យាករផងដែរថា ការកើនឡើងនៃតម្លៃកៅស៊ូនឹងមានរហូតដល់ចុងត្រីមាសទី ១ ឆ្នាំ ២០២៣ ហើយអាចឡើងដល់ ១០,៨៤ យ៉េនក្នុង ១ គីឡូក្រាម។
តម្លៃប្រេងឆៅនៅលើទីផ្សារពិភពលោកបានកើនឡើងក្នុងរយៈពេលចុងក្រោយនេះ ដោយទាញតម្លៃកៅស៊ូសំយោគដែលជាផលិតផលពីប្រេងឥន្ធនៈឱ្យមានកំណើនស្របគ្នាដែរ។
ការផ្គត់ផ្គង់កៅស៊ូក៏រងផលប៉ះពាល់ផងដែរ បន្ទាប់ពីអង្គការនៃប្រទេសនាំចេញប្រេង (OPEC) បាននិយាយថា ពិភពលោកនឹងមិនអាចផលិតបន្ថែមជំនួសប្រេងប្រហែល ៧ លានបារ៉ែល និងឧស្ម័នរាវផ្សេងទៀតដែលបាត់បង់ក្នុង ១ ថ្ងៃពីប្រទេសរុស្ស៊ី។
នៅថ្ងៃទី ១៨ ខែមេសា ឆ្នាំ ២០២២ ប្រេងឆៅគោលរបស់សហរដ្ឋ-អាមេរិកសម្រាប់ការចែកចាយខែមិថុនា គឺ ១១៣,២ ដុល្លារក្នុង ១ បារ៉ែល ហើយកិច្ចសន្យាសំខាន់របស់ទីក្រុងញូវយ៉ក ដែលមានប្រេងឆៅ សម្រាប់ការចែកចាយក្នុងខែឧសភាគឺ ១០៧,៩៣ ក្នុង ១ បារ៉ែល។
តម្លៃកៅស៊ូធម្មជាតិក៏ត្រូវបានគាំទ្រដោយតម្រូវការពិភពលោកនៅឆ្នាំ ២០២២ ដែលត្រូវបានរំពឹងថា នឹងកើនឡើង ១,២ ភាគរយបើធៀបនឹងឆ្នាំ ២០២១ ដល់ចំនួន ១៤,២ លានតោន។
យោងតាមអគ្គនាយកដ្ឋានគយ ក្នុងរយៈពេល ៣ ខែដំបូងនៃឆ្នាំ ២០២២ ការនាំចេញកៅស៊ូឈានដល់ ៤០៦ ៨០០ តោនកើនឡើង ០,៣ ភាគរយ និងមានតម្លៃ ៧១៥,៣៩ លានដុល្លារ កើនឡើង ៦,២ ភាគរយ ធៀបនឹងរយៈពេលដូចគ្នានៃឆ្នាំ ២០២១។
និន្នាការតម្លៃទំនងជានឹងកើនឡើងក្នុងប៉ុន្មានខែខាងមុខ ដោយសារកង្វះខាតការផ្គត់ផ្គង់តាមរដូវកាល។ នេះបើយោងតាមការព្យាកររបស់សមាគមកៅស៊ូវៀតណាម។
ក្រៅពីកត្តាអំណោយផលពីទីផ្សារឧស្សាហកម្មកៅស៊ូធម្មជាតិក៏ស្ថិតនៅក្រោមសម្ពាធមួយចំនួនផងដែរ។ កង្វះកុងតឺន័រ តម្លៃដឹកជញ្ជូនខ្ពស់ និងសេវាគយយឺតនឹងប៉ះពាល់ដល់កៅស៊ូ។
បន្ទាប់ពី ១ ឆ្នាំនៃការខកខានមិនបានបំពេញតាមផែនការប្រចាំឆ្នាំ ក្រុមហ៊ុន Southern Rubber Industry (CSM) បានកំណត់ផែនការអាជីវកម្មសម្រាប់ឆ្នាំ ២០២២ ជាមួយនឹងកំណើនដ៏រឹងមាំ។ CSM រំពឹងថាប្រាក់ចំណូលនឹងឈានដល់ ៤,៩៥ ពាន់ពាន់លានដុង កើនឡើង ២ ភាគរយធៀបនឹងរយៈពេលដូចគ្នាកាលពីឆ្នាំមុន ប៉ុន្តែប្រាក់ចំណេញមុនពន្ធត្រូវបានគេរំពឹងថានឹងឈានដល់ ១០១ ពាន់លានដុងកើនឡើង ៨៣ ភាគរយបើធៀបនឹងឆ្នាំ ២០២១។
ដើម្បីសម្រេចបាននូវគោលដៅ អ្នកគ្រប់គ្រង CSM បាននិយាយថា ក្រុមហ៊ុននឹងរក្សាផលិតកម្មដើម្បីបំពេញតម្រូវការទីផ្សារទាំងក្នុងស្រុក និងនាំចេញ ទន្ទឹមនឹងនោះ បង្កើនផលិតភាពការងារសម្រាប់ក្រុមផលិតផលដែលមានស្រាប់ ជាពិសេសការវិនិយោគលើផលិតផលខ្នាតតូចៗ ដូចជាផលិតកម្មនៃសម្បកកង់ម៉ូតូ បំពង់ម៉ូតូ ជាដើម។
ក្រុមហ៊ុនកៅស៊ូ Phuoc Hoa (PHR) ក៏បានកំណត់ទិសដៅ កំណើនជាវិជ្ជមាននៅឆ្នាំនេះជាមួយគោលដៅប្រាក់ចំណូលជាង ២,២៥ ពាន់ពាន់លានដុង មានកំណើន ១៦ ភាគរយ និងចំណេញក្រោយបង់ពន្ធ ៧៤៤ ពាន់លានដុង៕VNS-ANN/RR
