បុគ្គលិកស្ថានីយ៍ប្រេងឥន្ធនៈ ១ កន្លែង ចាក់ជូនអតិថិជននៅខេត្តតាកែវ នាពេលកន្លងទៅ។ ហេង ជីវ័ន
ភ្នំពេញៈ ប្រេងសាំងធម្មតាមានតម្លៃ ៥ ៦៥០ រៀល ក្នុង ១ លីត្រ (ឡើង ៥០ រៀល) ខណៈប្រេងម៉ាស៊ូតបានឡើងដល់ ៥ ៥៥០ រៀលក្នុង ១ លីត្រ (ឡើង ១៥០ រៀល) ចាប់ពីថ្ងៃទី ០១ ដល់ថ្ងៃទី ១០ ខែ មិថុនា ឆ្នាំ ២០២២ សម្រាប់ទីផ្សារលក់រាយនៅកម្ពុជា។ នេះបើតាមការជូនដំណឹងពីក្រសួងពាណិជ្ជកម្មនៅថ្ងៃទី ០១ ខែ មិថុនា ឆ្នាំ ២០២២ នេះ។
យោងតាមការជូនដំណឹងនេះ តម្លៃប្រេងឥន្ធនៈបានឡើងថ្លៃមកវិញ ដោយកាលពី ១០ ថ្ងៃមុន ប្រេងសាំងធម្មតា មានតម្លៃត្រឹម ៥ ៦០០ រៀល ចំណែកប្រេងម៉ាស៊ូតថ្លៃត្រឹម ៥ ៤០០ រៀល ក្នុង ១ លីត្រ។
ចំពោះការឡើងថ្លៃនៃតម្លៃប្រេងឥន្ធនៈនេះ អ្នកនាំពាក្យក្រសួងពាណិជ្ជកម្ម លោក ប៉ែន សុវិជាតិ ធ្លាប់លើកឡើងថា នេះជានិន្នាការពិភពលោក ហើយកម្ពុជាជាប្រទេសដែលនាំប្រេងឥន្ធនៈចូលមក ដូចនេះត្រូវកំណត់តម្លៃតាមទីផ្សារអន្តរជាតិ។
កាលពីចុងខែមីនា ឆ្នាំ ២០២២ អន្តរក្រសួងរួមមាន ក្រសួងសេដ្ឋកិច្ច និងហិរញ្ញវត្ថុ, ក្រសួងពាណិជ្ជកម្ម និងក្រសួងរ៉ែ និងថាមពល បានសម្រេចចេញប្រកាសស្តីពីការកំណត់រូបមន្តសម្រាប់កែសម្រួលថ្លៃលក់រាយប្រេងឥន្ធនៈនៅកម្ពុជា ដើម្បីឱ្យថ្លៃប្រេងឥន្ធនៈឡើងចុះតាមតម្លៃប្រេងនៅលើទីផ្សារអន្តរជាតិ ដោយឱ្យអនុវត្តតែទៅលើការលក់រាយប្រេងឥន្ធនៈប៉ុណ្ណោះ។ ប្រកាសអន្តរក្រសួងនេះ នឹងនៅជាធរមាន បើសិនជាមិនមានការចេញប្រកាសថ្មីទេ៕
