ទិដ្ឋភាពស្ពានស្ទឹងត្រង់ ក្រូចឆ្មារដែលទើបត្រូវបានសម្ពោធដាក់ឲ្យប្រើប្រាស់នាពេលថ្មីៗនេះ។ កម្ពូជាមានតម្រូវការហិរញ្ញប្បទានក្នុងវិស័យអាទិភាព សំដៅរួមចំណែកទ្រទ្រង់ចីរភាពនៃកំណើនរយៈពេលវែង និងបង្កើនផលិតភាពសេដ្ឋកិច្ច ឬផលិតភាពផលិតកម្ម។ រូបថត ក្រសួងសាធារណការ
ភ្នំពេញៈ អ្នកជំនាញបានឱ្យដឹងថា បំណុលសាធារណៈរបស់កម្ពុជាស្ថិតនៅក្នុងកម្រិតទាបប្រហែល ២៤ ភាគរយធៀបនឹងផលិតផលសរុបក្នុងស្រុកដែលជាកម្រិតមូលដ្ឋានដ៏ទាបជាងបណ្តាប្រទេសទាំងឡាយនៅក្នុងតំបន់ និងពិភពលោក។
យោងតាមស្ថានភាពបំណុលសាធារណៈរបស់កម្ពុជាដែលចេញផ្សាយដោយក្រសួងសេដ្ឋកិច្ច និងហិរញ្ញវត្ថុកាលពីដើមខែមិថុនា គិតត្រឹមចុងត្រីមាសទី ១ ឆ្នាំ ២០២២ ដោយគិតទាំងបំណុលមរតក កម្ពុជាមានសន្និធិបំណុលសាធារណៈសរុបចំនួន ៩,៨១ ពាន់លានដុល្លារអាមេរិក ដែលសុទ្ធសឹងជាបំណុលសាធារណៈក្រៅប្រទេស ដោយក្នុងនោះក្របខ័ណ្ឌទ្វេភាគីមានប្រមាណ ៦៨ ភាគរយ និងក្របខ័ណ្ឌពហុភាគី ៣២ ភាគរយ។
ក្នុងត្រីមាសទី ១ ឆ្នាំ ២០២២ នេះ រាជរដ្ឋាភិបាលបានចុះកិច្ចព្រមព្រៀងឥណទានសម្បទានថ្មីជាមួយដៃគូអភិវឌ្ឍន៍នានាសរុប ៣១៧,២៤ លានដុល្លារសមមូលនឹង ២២៨,២១ លាន SDR ស្មើប្រមាណ ១៤ ភាគរយនៃពិតានដែលច្បាប់អនុញ្ញាត (១ ៦០០ លាន SDR) ក្នុងនោះក្របខ័ណ្ឌទ្វេភាគីមាន ៥២ ភាគរយ និងក្របខ័ណ្ឌពហុភាគី មានប្រមាណ ៤៨ ភាគរយ។ បើធៀបរយៈពេលដូចគ្នាឆ្នាំមុន គឺមានលក្ខណៈល្អប្រសើរជាង ដោយហេតុថា កាលពីត្រីមាសទី ១ ឆ្នាំ ២០២១ ពុំមានការចុះកិច្ចព្រមព្រៀងឥណទានថ្មីទាល់តែសោះ។
យោងតាមក្រសួង៖ «ជារួមឥណទានទាំងនេះ សុទ្ធសឹងជាឥណទានមានកម្រិតសម្បទានខ្ពស់ ដោយមានធាតុអំណោយជាមធ្យមប្រមាណ ៥០ ភាគរយ។ គោលដៅការចុះកិច្ចព្រមព្រៀងឥណទានថ្មីទាំងនេះ គឺសម្រាប់បំពេញតម្រូវការហិរញ្ញប្បទានក្នុងវិស័យអាទិភាពរបស់រដ្ឋាភិបាលសំដៅរួមចំណែកទ្រទ្រង់ចីរភាពនៃកំណើនរយៈពេលវែង និងបង្កើនផលិតភាពសេដ្ឋកិច្ច ឬផលិតភាពផលិតកម្ម»។
យោងតាមក្រសួង សូចនាករបំណុលសំខាន់ៗទាំងអស់នៅក្នុងឆ្នាំ ២០២២ គឺស្ថិតនៅក្រោមកម្រិតកំណត់ដែលក្នុងនោះសូចនាករបំណុលសំខាន់ តម្លៃបច្ចុប្បន្ននៃបំណុលសាធារណៈ និងធានាជាសាធារណៈធៀបនឹងផលិតផលក្នុងស្រុកសរុប (GDP) គឺស្ថិតនៅកម្រិត ២៤,៩ ភាគរយបើធៀបទៅនឹងកម្រិតកំណត់ចំនួន ៤០ ភាគរយ។
លោក Stephen Higgins ដៃគូគ្រប់គ្រងនៃក្រុមហ៊ុន Mekong Strategic Partners (MSP) បានប្រាប់ភ្នំពេញប៉ុស្តិ៍កាលពីថ្ងៃទី ១៥ ខែមិថុនាថា តាមទស្សនៈបំណុលរបស់រដ្ឋាភិបាលកម្ពុជា ស្ថិតក្នុងស្ថានភាពដ៏អស្ចារ្យមួយ។ វាមិនត្រឹមតែមានកម្រិតទាបធៀបនឹងប្រទេសជិតខាងប៉ុណ្ណោះទេ ប៉ុន្តែវាមានកម្រិតទាបនៅលើមូលដ្ឋានសកល។
លោកបានថ្លែងថា៖ «បំណុលរបស់កម្ពុជាភាគច្រើនស្ថិតក្នុងលក្ខខណ្ឌសម្បទាន ខណៈដែលចំនួនបំណុលមានកម្រិតទាបបើធៀបនឹងបណ្ដាប្រទេសដៃគូ ខណៈការចំណាយលើសេវាកម្ម វារឹតតែទាបដោយសារតែតម្លៃអត្រាការប្រាក់ទាប»។
លោក Anthony Galliano អគ្គនាយកក្រុមហ៊ុនសេវាកម្មហិរញ្ញវត្ថុ Cambodian Investment Management Co Ltd ក៏បានលើកឡើងផងដែរថា ប្រទេសកម្ពុជាបានផ្លាស់ប្តូរយ៉ាងឆាប់រហ័សចេញពីការផ្តល់ហិរញ្ញប្បទានដោយផ្អែកលើម្ចាស់ជំនួយសម្រាប់ការអភិវឌ្ឍក្នុងទសវត្សរ៍ចុងក្រោយនេះទៅជាប្រទេសខ្ចីប្រាក់ដែលមានអធិបតេយ្យភាពដ៏ស្មោះត្រង់។
លោកអះអាងថា៖ «រដ្ឋាភិបាលធ្វើការងារបានល្អណាស់ក្នុងការគ្រប់គ្រងបំណុល ដោយបំណុលធៀបទៅនឹង GDP ជាកម្រិតទាបបំផុតទី ២ ក្នុងតំបន់អាស៊ាន មានតែប្រទេសប្រ៊ុយណេដែលសម្បូរប្រេងប៉ុណ្ណោះនៅក្នុងតំបន់អាស៊ានដែលមានបំណុលតិចបំផុត»៕ LA
វីដេអូ៖
