ដុំមាសដែលផលិតដោយក្រុមហ៊ុន ដែលខុម (កម្ពុជា) ភីធីអ៊ី អិលធីឌី នៅក្នុងខេត្តព្រះវិហារ។ រូបថត Delcom page
ភ្នំពេញៈ កម្ពុជាទទួលបានមាស ៣ ៥៦៣ គីឡូក្រាម ស្មើនឹង ២៥២ ដុំមាស គិតត្រឹមដើមខែសីហា ឆ្នាំ ២០២២ ដែលដុំមាសទាំងអស់បានមកពីការចម្រាញ់រ៉ែមាសដោយក្រុមហ៊ុនឯកជន ២ ដែលកំពុងមានប្រតិបត្តិការនៅក្នុងខេត្តមណ្ឌលគិរី និងព្រះវិហារ។
លោក អ៊ឹង ឌីប៉ូឡា អគ្គនាយកនៃអគ្គនាយកដ្ឋានធនធានរ៉ែនៃក្រសួងរ៉ែ និងថាមពល បាននិយាយថា ក្រុមហ៊ុនអូស្ត្រាលី Renaissance Mi-neral Limited (Cambodia) គឺមានប្រមាណ ៣ ៥៤៣ គីឡូក្រាម ឬស្មើនឹង ២៣២ ដុំមាស គិតនៅត្រឹមដើមខែសីហា ឆ្នាំ ២០២២ ដោយចំណូលសួយសារក្រុមហ៊ុននេះបង់ចូលរដ្ឋមានជាង ៥,១ លានដុល្លារ។
លោកបន្ថែមថា បច្ចុប្បន្នមានក្រុមហ៊ុនចំនួន ៧ ដែលទទួលបានអាជ្ញាប័ណ្ណអាជីវកម្ម ដើម្បីផលិតរ៉ែមាស ប៉ុន្តែមានតែក្រុមហ៊ុនអូស្ត្រាលី Renaissance មួយទេដែលបានផលិតជាផ្លូវការ ខណៈក្រុមហ៊ុនមួយផ្សេងទៀតកំពុងសាកល្បងក្នុងការចម្រាញ់រ៉ែមាសនេះ។
លោកបានបញ្ជាក់ថា៖ «នៅថ្ងៃទី ៤ ខែ សីហា ឆ្នាំ ២០២១ មានក្រុមហ៊ុនឈ្មោះ ដែលខុម(កម្ពុជា) ភីធីអ៊ី អិលធីឌី បានចាប់ផ្តើមសាកល្បងផលិតបានប្រមាណ ២០ គីឡូក្រាម ស្មើនឹង ២០ ដុំមាស។ នេះជាក្រុមហ៊ុនខ្នាតមធ្យមដែលមានផែនការផលិតមាសឱ្យបាន ៣៤០ គីឡូក្រាម ក្នុង ១ ឆ្នាំ ដោយអាចផ្តល់ជាសួយសារចូលរដ្ឋប្រមាណ ៦០ ម៉ឺនដុល្លារ ក្នុង ១ ឆ្នាំ»។
ទាក់ទងនឹងការរុករករ៉ែមាសអនាធិបតេយ្យនៅខេត្តរតនគិរីត្រូវបាន លោក ឌីប៉ូឡា អះអាងថា បច្ចុប្បន្ននៅក្នុងខេត្តរតនគិរីមិនទាន់មានអាជីវកម្មរ៉ែមាសទេ ប៉ុន្តែមានអាជ្ញាប័ណ្ណស្វែងរុករកមាសចំនួន ៣ ដោយ ២ ជាក្រុមហ៊ុនបុត្រសម្ព័ន្ធរបស់ក្រុមហ៊ុនកាណាដា Angkor Gold និងក្រុមហ៊ុនចិន Oriental wisdom។
លោក ទី នរិន្ទ រដ្ឋលេខាធិការក្រសួងរ៉ែ និងថាមពលបានឱ្យដឹងថា ដើម្បីពង្រឹងប្រសិទ្ធភាពនៃការគ្រប់គ្រង និងអភិវឌ្ឍន៍វិស័យរ៉ែ ក្រសួងរ៉ែ និងថាមពលបានដាក់ចេញយន្តការពិនិត្យនិងវាយតម្លៃមុននឹងផ្ដល់អាជ្ញាប័ណ្ណធនធានរ៉ែដោយធ្វើការពិចារណាថ្លឹងថ្លែងវាយតម្លៃលើកត្តាសំខាន់ចម្បងចំនួន ៣ គឺសេដ្ឋកិច្ច បរិស្ថាន និងសង្គម។
ចំពោះការរុករករ៉ែមាសបែបអនាធិបតេយ្យ លោក ទី នរិន្ទ បានអះអាងថា៖ «ក្រសួងបានរៀបចំក្រុមការងារត្រួតពិនិត្យ និងអធិការកិច្ចប្រតិបត្តិការធនធានរ៉ែចំនួន ៤ ក្រុម ទៅតាមប្រភេទនៃការធ្វើអាជីវកម្មរ៉ែ ជាលទ្ធផលក្រុមការងារបង្ក្រាបបានសកម្មភាពអាជីវកម្មរ៉ែមាសអនាធិបតេយ្យនៅចុងផ្លាស់ ខេត្តមណ្ឌលគិរី, ភ្នំជីនៅខេត្តកំពង់ធំ, ភ្នំលុង នៅខេត្តព្រះវិហារ។
លោក ហុង វណ្ណៈ អ្នកជំនាញសេដ្ឋកិច្ចនៃរាជបណ្ឌិត្យសភាកម្ពុជា បានប្រាប់ថា ការផលិតមាសរបស់ក្រុមហ៊ុនអូស្ត្រាលី Renaissance មានការកើនឡើងគួរឱ្យកត់សម្គាល់ ដោយចំណូលពីសួយសារនៃអាជីវកម្មរ៉ែមាសនេះ នឹងអាចរួមចំណែកក្នុងកំណើនសេដ្ឋកិច្ចជាតិ។
លោកលើកឡើងថា៖ «ការធ្វើអាជីវកម្មរ៉ែរបស់ក្រុមហ៊ុនស្របច្បាប់ គឺអាចជាកាលានុវត្តភាពមួយសម្រាប់ស្រូបទាញកម្លាំងពលកម្មនៅក្នុងតំបន់។ រាជរដ្ឋាភិបាលកម្ពុជាគួរបន្តលើកទឹកចិត្តដល់ក្រុមហ៊ុនដែលបានអនុវត្តត្រឹមត្រូវតាមការកំណត់របស់រដ្ឋាភិបាលលើការរុករករ៉ែនេះ ដោយគួរតែបន្តផ្តល់អាជ្ញាប័ណ្ណដល់ក្រុមហ៊ុនប្រភេទនេះឱ្យបន្តរុករករ៉ែមាសនៅតំបន់ផ្សេងៗទៀត»៕
វីដេអូ៖
