.jpg)
កម្មករម្នាក់កំពុងលីបាវអង្ករក្នុងហាង ១ កន្លែងនៅសង្កាត់ស្រះចក រាជធានីភ្នំពេញ។ ហេង ជីវ័ន
ភ្នំពេញៈ ប្រមុខការទូតកម្ពុជាស្នើឱ្យហ្វីលីពីន ទិញអង្ករ និងជំរុញការវិនិយោគលើវិស័យឧស្សាហកម្ម កសិ-ម្ហូបអាហារ នៅកម្ពុជា ដើម្បីលើកកម្ពស់ទំនាក់ទំនងសេដ្ឋកិច្ចរវាងប្រទេសទាំង ២ ។
សំណើនេះធ្វើឡើងក្នុងជំនួបរវាងរដ្ឋមន្ត្រីការបរទេសកម្ពុជា-ហ្វីលីពីន ស្ដីពីប្តេជ្ញាពង្រឹងកិច្ចសហប្រតិបត្តិការទ្វេភាគីលើវិស័យសេដ្ឋកិច្ចពាណិជ្ជកម្ម ដើម្បីលើកកម្ពស់កម្ពស់ការវិនិយោគ និងពាណិជ្ជកម្មទ្វេភាគីកាលពីថ្ងៃទី ៩ ខែវិច្ឆិកា ឆ្នាំ ២០២២ នៅមុនកិច្ចប្រជុំកំពូលអាស៊ានលើកទី ៤០ និង ៤១ នៅរាជធានីភ្នំពេញ។
ជំនួបរវាងរដ្ឋមន្ត្រីការបរទេសកម្ពុជាលោកប្រាក់ សុខុន និងលោកអែនរីកគេ អេ ម៉ាណាឡូ (Enrique A. Manalo) រដ្ឋមន្ត្រីការបរទេសហ្វីលីពីន បានបើកកិច្ចពិភាក្សាទ្វេភាគី ដើម្បីតម្លៃទំនាក់ទំនងមិត្តភាពព្រមទាំងកិច្ចសហប្រតិបត្តិការរវាងបណ្តាប្រទេសទាំង ២ ដែលភាគីទាំង ២ បានសង្កត់ធ្ងន់លើ វិស័យសេដ្ឋកិច្ចពាណិជ្ជកម្ម។
សេចក្ដីប្រកាសព័ត៌មានរបស់ក្រសួងការបរទេសកម្ពុជាបង្ហាញថា៖ «លោកប្រាក់ សុខុន បានស្នើដល់ភាគីហ្វីលីពីនបង្កើនការនាំចូលអង្ករពីកម្ពុជា និងផ្តល់យោបល់ដល់ហ្វីលីពីនពិចារណាទាញយកប្រយោជន៍ពីច្បាប់វិនិយោគថ្មីរបស់កម្ពុជា ដើម្បីបង្កើនទំហំវិនិយោគលើវិស័យឧស្សាហកម្មកសិ-ម្ហូបអាហារនៅកម្ពុជាពីសំណាក់អ្នកវិនិយោគហ្វីលីពីន»។
ភាគីកម្ពុជា-ហ្វីលីពីន បានគូសបញ្ជាក់ពីការកត់សម្គាល់រៀងៗខ្លួនចំពោះកំណើននៃការផ្លាស់ប្តូរលើទំហំពាណិជ្ជកម្មទ្វេភាគីកន្លងមក ដែលភាគីទាំង ២ ប្តេជ្ញាពង្រឹងកិច្ចសហប្រតិបត្តិការបន្ថែមទៀតចំពោះវិស័យនេះ។ ដើម្បីជំរុញលើកិច្ចសហប្រតិបត្តិការលើវិស័យវិនិយោគនិងពាណិជ្ជកម្មនេះ ភាគីទាំង ២ បានសម្លឹងឃើញពីភាពចាំបាច់ក្នុងការពន្លឿនកិច្ចចរចាលើសេចក្តីព្រាងកិច្ចព្រមព្រៀងស្តីពីការចៀសវាងការយកពន្ធត្រួតគ្នា។
លោក គី សេរីវឌ្ឍន៍ អ្នកជំនាញសេដ្ឋកិច្ចនៃរាជបណ្ឌិត្យសភាកម្ពុជា មើលឃើញថា សកម្មភាពពាណិជ្ជកម្មទ្វេភាគីរវាងប្រទេសហ្វីលីពីន និងកម្ពុជានៅមិនទាន់មានភាពសកម្មនៅឡើយទេ ចំណែកស្ថានភាពខ្សែចង្វាក់ផលិតរបស់កម្ពុជានិងហ្វីលីពីនក៏មិនសូវមានភាពខុសគ្នាប៉ុន្មានដែរ ដែលលោកសង្កត់ធ្ងន់ថា ប្រទេសទាំង ២ មានរនាំងច្រើនក្នុងការធ្វើពិពិធកម្មនឹងគ្នា ជាពិសេសរនាំងសមុទ្រដែលខណ្ឌចែកប្រទេសទាំង ២ បូករួមរយៈចម្ងាយឆ្ងាយពីគ្នាផង។
លោកបានពន្យល់ពីលក្ខខណ្ឌនៃការយកពន្ធត្រួតស៊ីគ្នាដែលភាគីកម្ពុជា និងហ្វីលីពីនចង់សម្របសម្រួលនោះ ដូច្នេះថា៖ «ចំពោះការយកពន្ធត្រួតស៊ីគ្នាគឺពាក់ព័ន្ធនឹងការវិនិយោគរបស់បរទេសនៅកម្ពុជា ភាគច្រើនគឺជាការយកពន្ធលើប្រាក់ចំណូល ដែលជាប់ពន្ធប្រាក់ចំណូលពីប្រទេសយើងមួយហើយ ហើយក៏ផ្ញើប្រាក់ចំណេញទៅផ្ទះវិញទៅហ្វីលីពីនក៏ជាប់ពន្ធមួយទៀត។ ដូច្នេះ ការសម្របសម្រួលគឺលើកកម្ពស់ការវិនិយោគច្រើនជាងមុនដោយកាត់បន្ថយពន្ធត្រួតស៊ីគ្នា ដោយយកតែពន្ធក្នុងស្រុករបស់កម្ពុជា បើវិនិយោគនៅកម្ពុជាហើយផ្ញើលុយទៅហ្វីលីពីនដោយមិនបង់ពន្ធទៀតទេ ហើយពេលកម្ពុជាទៅធ្វើជំនួញនៅហ្វីលីពីនវិញក៏ដូចគ្នា »។
សម្រាប់ការពង្រឹងវិស័យសេដ្ឋកិច្ចសម្រាប់បណ្តាប្រទេសទាំង ២ លោកបណ្ឌិតគី សេរីវឌ្ឍន៍ ផ្តល់យោបល់ឲ្យប្រទេសទាំង ២ រកចំណុចធ្វើពិពិធកម្មនឹងគ្នា ពោលគឺចន្លោះប្រហោងរបស់ប្រទេសទាំង ២ ដែលអាចបំពេញតម្រូវការដល់គ្នាទៅវិញទៅមកបាន ដែលលោកមើលឃើញពីចំណុចធំៗ ៣ គឺវិស័យទេសចរណ៍ វិស័យកាត់ដេរ និងការកែច្នៃកសិផលកសិកម្ម។
កាលពីអំឡុងខែធ្នូ ឆ្នាំ ២០២១ កន្លងទៅ សភាពាណិជ្ជកម្មកម្ពុជា និងសភាពាណិជ្ជកម្ម និងឧស្សាហកម្មហ្វីលីពីន បានចុះអនុស្សរណៈនៃការយោគយល់គ្នា (MoU) តាមប្រព័ន្ធអនឡាញសំដៅបង្កើនទំនាក់ទំនងពាណិជ្ជកម្ម និងកិច្ចសហប្រតិបត្តិការអាជីវកម្ម ព្រមទាំងវិនិយោគរវាងប្រទេសទាំង ២។ ក្រៅពីនេះ ភាគីទាំង ២ បានឯកភាពគ្នាក្នុងការបង្កើតក្រុមប្រឹក្សាធុរកិច្ចហ្វីលីពីន-កម្ពុជា ដែលមានទីស្នាក់ការនៅសាធារណរដ្ឋហ្វីលីពីន និងក្រុមប្រឹក្សាធុរកិច្ចកម្ពុជា-ហ្វីលីពីន ដែលមានទីស្នាក់ការនៅកម្ពុជា ដើម្បីពិភាក្សារៀបចំផែនការវិនិយោគនៅពេលអនាគតផង ដោយរំពឹងចំពោះកំណើននៃទំហំដោះដូរពាណិជ្ជកម្ម៕
