.jpg)
Star Vegas Resort and Club មានទីតាំងនៅសង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ ភាគឦសាននៃច្រកទ្វារព្រំដែនចូលប្រទេសថៃ។ រូបថត DONACO
ភ្នំពេញៈ ក្រុមហ៊ុន Donaco Internationalដែលចុះបញ្ជីភាគហ៊ុននៅប្រទេសអូស្ត្រាលី ជាប្រតិបត្តិការកាស៊ីណូនៅខេត្តបន្ទាយមានជ័យ ជាប់ព្រំដែនប្រទេសថៃ រំពឹងថានឹងមានដំណើរការអាជីវកម្មល្អប្រសើរនៅឆ្នាំ ២០២៣ ដោយរំពឹងនៃការត្រឡប់មកវិញលំហូរភ្ញៀវទេសចរក្នុងតំបន់ ជាពិសេសប្រទេសថៃ វៀតណាម និងចិនមកកាន់កម្ពុជា។
លោក Paul Porntat Amatavivadhana ប្រធានក្រុមហ៊ុន Donaco ដែលត្រូវបានដកស្រង់ដោយសារព័ត៌មាន IAG នៅថ្ងៃទី ២៨ ខែវិច្ឆិកា ថា ក្រុមហ៊ុន Donaco នៅតែស្ថិតក្នុងដំណើរការល្អប្រសើរ ដើម្បីបន្តការស្ទុះងើបឡើងវិញរបស់ខ្លួននៅឆ្នាំ២០២៣។
លោកថ្លែងថា៖ «ប្រតិបត្តិការនៅកាស៊ីណូ Star Vegas កាលពីមុនបានចាប់ផ្តើមដំណើរការឡើងវិញក្នុងកម្រិតកំណត់ និងបង្កើនជាវិធីសាស្ត្រពេញ ១ ត្រីមាសខែកញ្ញា ឆ្នាំ ២០២២ ដោយមានចក្ខុវិស័យ ដើម្បីសម្រេចបាននូវសមត្ថភាពប្រតិបត្តិការពេញលេញនៅក្នុងត្រីមាសខាងមុខនេះ»។
លោកថ្លែងថា៖ «ខ្ញុំមានសុទិដ្ឋិនិយមយ៉ាងមុតមាំចំពោះដំណើរផ្លូវឆ្ពោះទៅមុខសម្រាប់ក្រុមហ៊ុន Donaco ។ យើងមានតារាងតុល្យការដែលមានភាពល្អប្រសើរ មូលដ្ឋានប្រតិបត្តិការដ៏រឹងមាំ និងលំហូរនៃការធ្វើដំណើររវាងព្រំដែនថៃ/កម្ពុជា និងវៀតណាម/ចិន នឹងកើនឡើងជាបន្តបន្ទាប់»។
លោក ធួន ស៊ីណាន ប្រធានសមាគមទេសចរណ៍អាស៊ីប៉ាស៊ីហ្វិក (PATA) កម្ពុជា ប្រាប់ភ្នំពេញ ប៉ុស្តិ៍ នៅថ្ងៃទី ២៨ ខែវិច្ឆិកា ថា កម្ពុជានឹងទទួលបានភ្ញៀវទេសចរច្រើនពីប្រទេសអាស៊ាននៅឆ្នាំក្រោយ។ ប៉ុន្តែនឹងមានភាពមិនច្បាស់លាស់ចំពោះលំហូរនៃភ្ញៀវទេសចរនៅក្រៅតំបន់អាស៊ាន ដោយសារតែវិបត្តិការប្រកួតប្រជែងផ្នែកភូមិសាស្ត្រនយោបាយនៅតែមាន។
លោកលើកឡើងថា៖ «តាមទស្សនៈរបស់ខ្ញុំ ខ្ញុំមានសុទិដ្ឋិនិយមថា យើងនឹងឃើញភ្ញៀវទេសចរកាន់តែច្រើនមកពីប្រទេសសមាជិកអាស៊ាន ជាពិសេសប្រទេសថៃ វៀតណាម និងឥណ្ឌូនេស៊ី ដូច្នេះយើងត្រូវបើកជើងហោះហើរបន្ថែមទៀត។ ប៉ុន្តែខ្ញុំមិនអាចនិយាយបានអំពីលំហូរភ្ញៀវទេសចរនៅក្រៅអាស៊ានដូចជាប្រទេសចិន ឬបស្ចិមប្រទេសនោះទេ ព្រោះវាអាស្រ័យលើការប្រកួតប្រជែងភូមិសាស្ត្រនយោបាយដែលកំពុងកើនឡើង»។
យោងតាមទិន្នន័យរបស់ក្រសួងទេសចរណ៍ កម្ពុជាបានស្វាគមន៍ភ្ញៀវទេសចរចំនួន ៩៩៨ ២៧២ នាក់ ក្នុងរយៈពេល ៨ ខែដំបូង កើនឡើង ៧២០ ភាគរយ បើធៀបនឹងឆ្នាំមុន ទោះបីធ្លាក់ចុះ ៧៧ ភាគរយធៀបនឹងរយៈពេលដូចគ្នាក្នុងឆ្នាំ ២០១៩ មុនពេលមានការរីករាលដាលនៃជំងឺកូវីដ ១៩ ក៏ដោយ។
យោងតាមក្រសួង ប្រទេសថៃ មានភ្ញៀវទេសចរចំនួន ៣៤៨ ៦៦០ នាក់កើនឡើង ៤៧៧ ភាគរយ និងវៀតណាម មានចំនួនភ្ញៀវទេសចរ ២៣៥ ៥៤៦ នាក់ កើនឡើង ៣ ០១៧ ភាគរយធៀបនឹងរយៈពេលដូចគ្នាកាលពីឆ្នាំមុន។ ផងដែរនៅក្នុងបញ្ជីនៃទីផ្សារ។ ប្រភពភ្ញៀវទេសចរច្រើនជាងគេគឺ ប្រទេសចិន អាមេរិក ឥណ្ឌូនេស៊ី កូរ៉េខាងត្បូង ម៉ាឡេស៊ី បារាំង ចក្រភពអង់គ្លេស និងឡាវ៕
