.jpg)
ការមកដល់កម្ពុជាជាលើកដំបូងរបស់ ANA កាលពីឆ្នាំ ២០១៦។ ហេង ជីវ័ន
ភ្នំពេញៈ កម្ពុជាស្នើឱ្យជប៉ុនបើកជើងហោះហើរត្រង់ដែលប្រតិបត្តិការដោយក្រុមហ៊ុនអាកាសចរណ៍ ANA ឡើងវិញ ក្រោយពីក្រុមហ៊ុនមួយនេះបានផ្អាកការហោះហើរពីទីក្រុងតូក្យូមកទីក្រុងភ្នំពេញចាប់តាំងពីការផ្ទុះរាលដាលនៃជំងឺកូវីដ ១៩ មក។
សំណើនេះត្រូវបាន លោក ថោង ខុន រដ្ឋមន្ត្រីក្រសួងទេសចរណ៍ លើកឡើងក្នុងជំនួបជាមួយឯកអគ្គរាជទូតជប៉ុនជិតផុតអាណត្តិ លោក Mikami Masahiro នាឱកាសដែលលោកឯកអគ្គរាជទូតជម្រាបលានៅទីស្ដីការក្រសួងទេសចរណ៍ កាលពីថ្ងៃទី ២៩ វិច្ឆិកា។
លោក ថោង ខុន បានលើកឡើងថា៖ «ក្រុមហ៊ុនអាកាសចរណ៍ ANA បានផ្អាកជើងហោះ ហើរមកកាន់ប្រទេសកម្ពុជាតាំងពីអំឡុងពេលនៃការផ្ទុះជំងឺកូវីដ ១៩ ខ្លាំងកាលចុងឆ្នាំ ២០១៩។ ភ្ញៀវទេសចរដែលទៅមកប្រទេសទាំង ២ នឹងបន្តកើនឡើងថែមទៀត បើសិនមានការហោះហើរត្រង់ឡើងវិញក្រោយប្រទេសទាំង ២ រួចផុតពីវិបត្តិធ្ងន់ធ្ងរនៃជំងឺកូវីដ ១៩»។
លោករដ្ឋមន្ត្រីបានបន្តថា បច្ចុប្បន្នជប៉ុនបានបើកឡើងវិញនូវការហោះហើរត្រង់ជាមួយប្រទេសមួយចំនួនដូចជាប្រទេសថៃ វៀតណាម ជាដើម ដូច្នេះលោកចង់ឱ្យជប៉ុនបន្តកិច្ចសហប្រតិបត្តិការវិស័យដឹកជញ្ជូនជាមួយកម្ពុជាឡើងវិញ ដើម្បីជំរុញកំណើនទេសចរទៅមករវាងប្រទេសទាំង ២។
លោក Mikami Masahiro បានឯកភាព និងបានអះអាងថា ទោះបីជាលោកចប់អាណត្តិជាឯកអគ្គរាជទូតនៅកម្ពុជាក៏ពិតមែន ប៉ុន្តែលោកនឹងបន្តខិតខំដើម្បីពង្រឹងពង្រីកទំនាក់ទំនង និងកិច្ចសហប្រតិបត្តិការល្អជាមួយកម្ពុជាតទៅមុខទៀត ពិសេសពាក់ព័ន្ធនឹងការជំរុញជើងហោះហើរត្រង់ឡើងវិញរបស់ក្រុមហ៊ុនអាកាសចរណ៍ ANA មកកាន់កម្ពុជា។
អ្នកនាំពាក្យរដ្ឋលេខាធិការដ្ឋានអាកាសចរស៊ីវិល (SSCA) លោក ស៊ិន ចាន់សិរីវុត្ថា បានប្រាប់ភ្នំពេញប៉ុស្តិ៍នៅថ្ងៃទី ៣០ ខែវិច្ឆិកាថា ស្ថាប័នរបស់លោកបានធ្វើទំនាក់ទំនងជាមួយក្រុមហ៊ុនអាកាសចរណ៍ ANA ដែរ ប៉ុន្តែមិនទាន់បានទទួលបានដំណឹងណាមួយនៅឡើយទេ។
លោកបានថ្លែងថា៖ «ថ្នាក់ដឹកនាំនៃអាកាសចរស៊ីវិលកម្ពុជាយើងបានជួបទាំងអ្នកតំណាងក្រុមហ៊ុន ANA នៅក្នុងស្រុក និងនៅប្រទេសជប៉ុនប៉ុន្មានដងរួចមកហើយនាពេលកន្លងមកលើការចាប់ផ្តើមហោះហើរមកវិញ ប៉ុន្តែខាងក្រុមហ៊ុននៅជួបបញ្ហារៀបចំយន្តហោះក្នុងការដំណើរការឡើងវិញ ដូច្នេះក្នុងពេលឆាប់ៗនេះ គឺគេមិនទាន់អាចហោះហើរឡើងវិញបានទេ ប៉ុន្តែយើងសង្ឃឹមថា ដើមរដូវការហោះហើរលើកក្រោយគេនឹងពិចារណាការហោះហើរមកយើងឡើងវិញ»។
យោងតាមរបាយការណ៍ក្រសួងទេសចរណ៍ ក្នុងរយៈពេល ១០ ខែ ឆ្នាំ ២០២២ នេះ ប្រទេសជប៉ុនទទួលបានភ្ញៀវទេសចរកម្ពុជាជាង ៧ ០០០ នាក់ ខណៈកម្ពុជាទទួលបានភ្ញៀវទេសចរជប៉ុនប្រមាណជាង ១៩ ០០០ នាក់ ក្នុងរយៈពេលដូចគ្នា៕
