ការចរចាជំុទី២នៃកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយ រវាងកម្ពុជា និងអេមីរ៉ាតអារ៉ាប់រួម នាថ្ងៃទី២០ ខែធ្នូ ឆ្នាំ២០២២។ រូបថត ក្រសួងពាណិជ្ជកម្ម
ភ្នំពេញៈ ក្រោយមានកិច្ចប្រជុំប្រកាសបើកការចរចាជុំទី២ នៃកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយ រវាងកម្ពុជា និងអេមីរ៉ាតអារ៉ាប់រួម(Cambodia-UAE CEPA) ដែលមានអន្តរក្រសួង និងអនុរដ្ឋមន្ត្រីទទួលបន្ទុកពាណិជ្ជកម្មអន្តរជាតិ និងជាប្រធានក្រុមចរចាសម្រាប់ភាគីអេមីរ៉ាតអារ៉ាប់រួមរួចមក ភាគីទាំង២ បានបង្ហាញការប្តេជ្ញារួមគ្នា បង្កើនទំនាក់ទំនងវិនិយោគ ដើម្បីបើកច្រកទីផ្សារពាណិជ្ជកម្មទ្វេភាគី ឱ្យកាន់ទូលំទូលាយថែមទៀត។
ពាក់ព័ន្ធនឹងកិច្ចចរចានេះ លោកប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្មកម្ពុជា បានលើកឡើងថា ការចរចាជុំទី២ នៃកិច្ចព្រមព្រៀង Cambodia-UAE CEPA បានប្រព្រឹត្តទៅចាប់ពីថ្ងៃទី១៩-២១ ខែធ្នូ ឆ្នាំ២០២២ នៅរាជធានីភ្នំពេញ។ ក្នុងអំឡុងការចរចាជុំទី២នេះ ភាគីទាំង២ នឹងបន្តពិភាក្សា និងដោះស្រាយរាល់ចំណុច ដែលមិនទាន់មានការឯកភាពគ្នា ឬមិនទាន់មានភាពច្បាស់លាស់ បន្ទាប់ពីការចរចាជុំទី១ ដែលបានប្រព្រឹត្តទៅ កាលពីថ្ងៃទី២៤-២៦ ខែតុលា ឆ្នាំ២០២២ នៅអាប៊ុយដាប៊ី អេមីរ៉ាតអារ៉ាប់រួម។
លោកបញ្ជាក់ថា៖«ការចរចានេះភាគីកម្ពុជា និងអេមីរ៉ាតអារ៉ាប់រួម បានផ្តោតលើវិស័យ និងអនុវិស័យសំខាន់ៗ ដែលនឹងត្រូវលើកយកមកពិភាក្សា រួមមាន ពាណិជ្ជកម្មទំនិញ របាំងពាណិជ្ជកម្មអនាម័យ និងភូតគាមអនាម័យ ពាណិជ្ជកម្មសេវា កិច្ចសម្រួលពាណិជ្ជកម្ម វិធានដើមកំណើតទំនិញ កិច្ចសហប្រតិបត្តិការសេដ្ឋកិច្ច វិនិយោគ កម្មសិទ្ធិបញ្ញា និងច្បាប់ និងស្ថាប័នជាដើម»។
ចំណែកលោកជូម៉ា ម៉ូហាមេដ អាល់ កាត(Juma Mohammed Al Kait) អនុរដ្ឋមន្ត្រីទទួលបន្ទុកពាណិជ្ជកម្មអន្តរជាតិនិងជាប្រធានក្រុមចរចាសម្រាប់ភាគីអេមីរ៉ាតអារ៉ាប់រួម លើកឡើងថា ការចរចាជុំទី២ ជាមួយកម្ពុជានាពេលនេះ គឺជាផ្នែកដ៏សំខាន់នៃយុទ្ធសាស្ត្រ របស់អេមីរ៉ាតអារ៉ាប់រួម ក្នុងការកសាងទំនាក់ទំនងកាន់តែជិតស្និទ្ធ និងរឹងមាំជាមួយដៃគូពាណិជ្ជកម្មជុំវិញពិភពលោក។
លោកបន្តថា របៀបវារៈនៃកិច្ចព្រមព្រៀង Cambodia-UAE CEPA នេះ គឺពិតជាមានសារៈសំខាន់ និងស្វាគមន៍នូវកិច្ចពិភាក្សាជាមួយគ្រប់ភាគីពាក់ព័ន្ធ ដែលមានឆន្ទៈក្នុងការពន្លឿនចរាចរណ៍ នៃទំនិញ ធានាខ្សែចង្វាក់ផ្គត់ផ្គង់ និងស្វែងរកឱកាសក្នុងការបណ្តាក់ទុនរួមគ្នា សម្រាប់ផលប្រយោជន៍ទៅវិញទៅមក។
លោកបញ្ជាក់ថា៖«នៅក្នុងកិច្ចចរចាជុំទី២នេះដែរ ភាគីទាំ២ ក៏បានប្តេជ្ញាចិត្ត ធ្វើយ៉ាងណាសម្រេចឱ្យបាន នូវកិច្ចព្រមព្រៀង Cambodia-UAE CEPA នាពេលឆាប់ៗនេះ សំដៅលើកកម្ពស់ទំនាក់ទំនងពាណិជ្ជកម្មទ្វេភាគី តាមរយៈការបើកច្រកទីផ្សារ សម្រាប់នាំចេញទំនិញ និងសេវាកម្មជាដើម»។
សូមបញ្ជាក់ដែរថា អេមីរ៉ាតអារ៉ាប់រួម គឺជាដៃគូពាណិជ្ជកម្មឈានមុខគេរបស់កម្ពុជានៅតំបន់មជ្ឈិមបូព៌ា ដែលរួមចំណែកប្រមាណ៧៧% នៃទំហំពាណិជ្ជកម្មសរុបរបស់កម្ពុជាជាមួយតំបន់នេះ។
ក្នុងរយៈពេល៨ខែ នៃឆ្នាំ២០២២នេះ ពាណិជ្ជកម្មទ្វេភាគី សម្រេចបានទឹកប្រាក់សរុបប្រមាណ ២៧៩លានដុល្លារអាមេរិក ជាមួយនឹងកំណើន ៤០% ធៀបនឹងរយៈពេលដូចគ្នាក្នុងឆ្នាំ២០២១។ ក្នុងន័យនេះ ការប្រកាសបើកការចរចាជុំទី២ នៃកិច្ចព្រមព្រៀង Cambodia-UAE CEPA នឹងបន្តជំរុញភាពរីកចម្រើន នៃទំនាក់ទំនងពាណិជ្ជកម្មទំនិញ រវាងប្រទេសទាំង២តាមរយៈការបើកទីផ្សារនាំចេញឱ្យទូលំទូលាយ សំដៅទាក់ទាញការវិនិយោគលើវិស័យសំខាន់ៗផ្សេងទៀត ក្នុងបុព្វហេតុកំណើនសេដ្ឋកិច្ចប្រកបដោយបរិយាប័ន្ន និងចីរភាពផងដែរ។
ពាក់ព័ន្ធនឹងកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយ រវាងកម្ពុជា និងអេមីរ៉ាតអារ៉ាប់រួមនេះ អ្នកជំនាញសេដ្ឋកិច្ចនៅកម្ពុជា ធ្លាប់បានស្នើឱ្យក្រុមការងារចរចារបស់កម្ពុជា-អេមីរ៉ាតអារ៉ាប់រួម ខិតខំព្យាយាមចរចា ដើម្បីសម្រេចបានកិច្ចព្រមព្រៀង Cambodia-UAE CEPA នាពេលឆាប់ៗ សំដៅបម្រើដល់អត្ថប្រយោជន៍រួម ព្រមទាំងផ្តល់ទំនុកចិត្តដល់អ្នកប្រើប្រាស់ វិនិយោគិន និងធុរជនរបស់ប្រទេសទាំង២ថែមទៀត៕
