រោងចក្រផលិតអគ្គិសនីពីធ្យូងថ្ម នៅក្នុងខេត្តព្រះសីហនុ ដែលត្រូវបានដាក់ឱ្យដំណើរការ។
ភ្នំពេញៈ រោងចក្រផលិតអគ្គិសនីពីធ្យូងថ្ម Huadian នៅក្នុងខេត្តព្រះសីហនុដែលជាបុត្រសម្ព័ន្ធរបស់ក្រុមហ៊ុនមកពីប្រទេសចិន Huadian Overseas Investment Co., Ltd បានដាក់ឱ្យដំណើរការជាផ្លូវការនូវរោងចក្រទី១ របស់ខ្លួនដែលអាចផលិតថាមពលបាន ៣៥០ មេហ្គាវ៉ាត់ក្នុងចំណោមការវិនិយោគសរុប ៧០០ មេហ្គាវ៉ាត់របស់ខ្លួននៅក្នុងប្រទេសកម្ពុជា។
យោងតាមសេចក្តីប្រកាសព័ត៌មានរបស់ក្រុមហ៊ុន រោងចក្រផលិតនេះត្រូវបានដាក់ឱ្យដំណើរការកាលពីថ្ងៃទី ១៦ ខែធ្នូ បន្ទាប់ពីឆ្លងកាត់ការសាកល្បងដោយជោគជ័យ និងដាក់ឱ្យដំណើរការជាផ្លូវការសម្រាប់ផលិតថាមពល ដោយបង្ហាញថា គម្រោងផលិតថាមពលអគ្គិសនីដែលមានសមត្ថភាពដំឡើងសរុបឈានមុខគេនៅប្រទេសកម្ពុជាបានបញ្ចប់ទាំងស្រុង និងដាក់ឱ្យដំណើរការហើយ។ រហូតមកដល់ពេលនេះ សមត្ថភាពដំឡើងសរុបនៃរោងចក្រថាមពលដែលវិនិយោគដោយក្រុមហ៊ុន China Huadian នៅកម្ពុជា បានកើនឡើងដល់ ១,០៣៨ លានគីឡូវ៉ាត់ ដែលក្លាយជាប្រតិបត្តិករផលិតថាមពលឈានមុខគេនៅកម្ពុជា។
ក្រុមហ៊ុននេះបានឱ្យដឹងថា រោងចក្រផលិតថាមពល HSPGC មានទីតាំងនៅស្រុកស្ទឹងហាវ ភាគឦសាននៃក្រុងព្រះសីហនុ ដែលមានសមត្ថភាពរហូតដល់ ៧០០ មេហ្គាវ៉ាត់ ដោយប្រើប្រាស់ស្តង់ដា បច្ចេកវិទ្យា និងឧបករណ៍ប្រទេសចិន។ វាជារោងចក្រផលិតថាមពលដើរដោយធ្យូងថ្មដែលមានសមត្ថភាពឈានមុខគេ និងកម្រិតការពារបរិស្ថានខ្ពស់បំផុតនៅកម្ពុជា។
ក្រុមហ៊ុនបានឱ្យដឹងថា៖ «ប្រតិបត្តិការពេញលេញរបស់រោងចក្រថាមពល HSPGC មានសារៈសំខាន់យ៉ាងខ្លាំងសម្រាប់ការកែលម្អរចនាសម្ព័ន្ធផ្គត់ផ្គង់ថាមពលរបស់កម្ពុជា និងធ្វើឱ្យហេដ្ឋារចនាសម្ព័ន្ធថាមពលរបស់កម្ពុជាមានភាពល្អប្រសើរ។ ក្រុមហ៊ុននេះក៏នឹងដើរតួនាទីសំខាន់ក្នុងការពង្រឹងទំនាក់ទំនងមិត្តភាពរវាងប្រជាជនចិន-កម្ពុជា ការធ្វើឱ្យស៊ីជម្រៅកិច្ចសហប្រតិបត្តិការសេដ្ឋកិច្ច និងបច្ចេកវិទ្យារវាងប្រទេសទាំង ២ និងការលើកកម្ពស់ការអភិវឌ្ឍយ៉ាងឆាប់រហ័សនៃសេដ្ឋកិច្ចក្នុងស្រុក និងសង្គមផងដែរ»។
លោក ឃាង ភារម្យ អ្នកនាំពាក្យរដ្ឋបាលខេត្តព្រះសីហនុ បានឱ្យដឹងថា ថាមពលអគ្គិសនីដែលក្រុមហ៊ុនផលិតបាននិងតភ្ជាប់ទៅបណ្តាញជាតិដើម្បីផ្គត់ផ្គង់ទូទាំងប្រទេសកម្ពុជា។
លោកនិយាយថា៖ «វាជារោងចក្រថាមពលដ៏ធំមួយរបស់ក្រុមហ៊ុនចិន។ រោងចក្រនេះអាចផលិតថាមពលបាន៧០០មេហ្គាវ៉ាត់។ ដូច្នេះវានឹងតភ្ជាប់ទៅបណ្តាញអគ្គិសនីជាតិ ដោយវាមិនគ្រាន់តែផ្គត់ផ្គង់នៅក្នុងខេត្តប៉ុណ្ណោះទេ ប៉ុន្តែគឺនៅទូទាំងប្រទេសតែម្តង។ រោងចក្រថាមពលនេះគឺពិតជាមានសារៈសំខាន់ណាស់ក្នុងការរួមចំណែកដល់ការអភិវឌ្ឍ ការផ្គត់ផ្គង់ថាមពលសម្រាប់សេដ្ឋកិច្ចរបស់យើង»។
យោងតាមក្រុមហ៊ុន ការសាងសង់រោងចក្រថាមពលខាងលើបានចាប់ផ្តើមនៅថ្ងៃទី ១៨ ខែសីហា ឆ្នាំ ២០២០ ហើយត្រូវចំណាយពេល ២៧ ខែដើម្បីដាក់ឱ្យដំណើរការពេញលេញ។
ភ្នំពេញប៉ុស្តិ៍ បានរាយការណ៍កាលពីចុងខែធ្នូ ឆ្នាំ ២០១៩ ថា ក្រុមហ៊ុន Cambodia International Investment and Development Group (CIIDG) និងក្រុមហ៊ុន China Huadian Hong Kong Co Ltd (CHDHK) បានចាប់ដៃគូគ្នាធ្វើការសាងសង់រោងចក្រផលិតថាមពលអគ្គិសនីដើរដោយធ្យូងថ្មចំនួន ២ នៅខេត្តព្រះសីហនុ។ ជាមួយនឹងទុនវិនិយោគប្រមាណ ១ ពាន់លានដុល្លារ រោងចក្រអគ្គិសនីទាំង ២ នេះអាចមានសមត្ថភាពផលិតអគ្គិសនីបានប្រមាណ ៧០០ មេហ្គាវ៉ាត់។
លោក កែវ រតនៈ អគ្គនាយកអគ្គិសនីកម្ពុជា (EdC) បានថ្លែងនៅក្នុងពិធីចុះហត្ថលេខា និងបើកការដ្ឋានសាងសង់នាពេលនោះថា ការសាងសង់នឹងបញ្ចប់នៅចុងឆ្នាំ ២០២២ ដោយរោងចក្រនេះ នឹងចាប់ផ្ដើមផលិតថាមពលនៅដើមឆ្នាំ ២០២៣ ហើយរោងចក្រនីមួយៗនឹងអាចផលិតថាមពលបាន ៣៥០ មេហ្គាវ៉ាត់។
លោកបានថ្លែងថា៖ «រោងចក្រនេះ នឹងអាចផលិតថាមពលនៅរដូវប្រាំង ហើយនឹងជួយធ្វើឱ្យតម្លៃអគ្គិសនីកាន់តែទាប។ ការវិនិយោគរួមគ្នារវាងក្រុមហ៊ុនទាំង ២ បង្ហាញពីទំនាក់ទំនងដ៏រឹងមាំរវាងប្រទេសចិន និងកម្ពុជា។
CHDHK គឺជាក្រុមហ៊ុនបុត្រសម្ព័ន្ធរបស់ក្រុមហ៊ុន China Huadian Group ដែលបានវិនិយោគលើទំនប់វារីអគ្គិសនីឫស្សីជ្រុំ ក្នុងខេត្តកោះកុង ក្នុងឆ្នាំ ២០០៩៕
វីដេអូ៖
