កម្ពុជានឹងធ្វើទំនើបកម្មផ្លូវរថភ្លើងទៅជាល្បឿនលឿនចាប់ពីឆ្នាំ ២០២៣ តទៅ។ ហេង ជីវ័ន
ភ្នំពេញៈ ប្រទេសកម្ពុជា នឹងធ្វើទំនើបកម្មផ្លូវដែកទៅជាល្បឿនលឿននៅឆ្នាំ ២០២៣ ក្នុងគោលបំណងជំរុញការដឹកជញ្ជូនទាំងទំនិញ និងអ្នកធ្វើដំណើរតាមផ្លូវដែក ជាពិសេសគឺការតភ្ជាប់ជាមួយប្រទេសជិតខាង ជាពិសេសគឺការដោះដូរទំនិញឆ្លងដែន និងវិស័យទេសចរណ៍។
ការលើកឡើងនៃផែនការនេះ ត្រូវបានលោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន មានប្រសាសន៍កាលពីសប្តាហ៍មុនថា ដើម្បីទាក់ទាញអ្នកវិនិយោគមកបណ្តាក់ទុនរកស៊ីនៅប្រទេសយើងបានគឺយើងត្រូវមានប្រព័ន្ធហេដ្ឋារចនាសម្ព័ន្ធប្រទាក់ក្រឡាគ្នាដើម្បីធ្វើឱ្យប្រព័ន្ធដឹកជញ្ជូននិងឡូជីស្ទិកមានតម្លៃថោក។ បើសិនជាគ្មានទេ គឺយើងមិនអាចមានការរីកចម្រើនសេដ្ឋកិច្ចយើងបានទេ ប្រទេសនីមួយៗគេខិតខំសាងសង់ប្រព័ន្ធហេដ្ឋារចនាសម្ព័ន្ធនេះខ្លាំងណាស់សម្រាប់កំណើនសេដ្ឋកិច្ចរបស់ខ្លួន។
លោកថា ផ្លូវរថភ្លើងប៉ោយប៉ែតមកភ្នំពេញ មកក្រុងព្រះសីហនុ ក៏កំពុងសិក្សាជិតចប់ហើយ និងផ្លូវរថភ្លើងល្បឿនលឿនមួយទៀត ពីប៉ោយប៉ែត-សៀមរាប-កំពង់ធំ-កំពង់ឆ្នាំង-ភ្នំពេញនិងបាវិត-ម៉ុកបៃ តភ្ជាប់ក្រុងហូជីមិញរបស់វៀតណាមក៏កំពុងសិក្សា។
លោកបានថ្លែងថា៖ «បច្ចុប្បន្ននេះ ប្រព័ន្ធហេដ្ឋារចនាសម្ព័ន្ធយើងគឺមានការរីកចម្រើនហើយ ប៉ុន្តែយើងបន្តលើកកម្ពស់ឱ្យកាន់តែល្អប្រសើរបន្ថែមទៀតដើម្បីទាក់ទាញវិនិយោគកាន់តែច្រើនមកកាន់ប្រទេសកម្ពុជាយើង។ ខ្ញុំយល់ឃើញថា សម្រាប់អាណត្តិក្រោយផ្លូវរថភ្លើងល្បឿនលឿនប៉ោយប៉ែត-ភ្នំពេញ-ក្រុងព្រះសហីនុ នឹងធ្វើ ប៉ុន្តែសម្រាប់ផ្លូវរថភ្លើងល្បឿនលឿនប៉ោយប៉ែត-សៀមរាប-កំពង់ធំ-កំពង់ឆ្នាំង-ភ្នំពេញ និងបាវិត អាចយូរបន្តិចដោយសារយើងត្រូវរង់ចាំវៀតណាមដែរ បើសិនជាយើងធ្វើត្រឹមបាវិត គឺអត់បានការអីទេ ព្រោះយើងត្រូវតភ្ជាប់ទៅហូជីមិញទើបបានជោគជ័យ»។
កាលពីថ្ងៃទី ២៣ ខែធ្នូ លោកនាយករដ្ឋមន្ត្រី ហ៊ុន សែនក៏បានលើកឡើងអំពីការធ្វើទំនើបកម្មផ្លូវរថភ្លើងល្បឿនលឿននេះផងដែរដើម្បីតភ្ជាប់ទាំងក្នុងស្រុក និងប្រទេសជិតខាង។ សម្រាប់ផ្លូវ-រថភ្លើងល្បឿនលឿននេះនឹងត្រូវធ្វើទំនើបកម្មនៅផ្លូវដែលមានស្រាប់។
លោកបានមានប្រសាសន៍ថា៖ «យើងកំពុងធ្វើការសិក្សាផ្លូវរថភ្លើងល្បឿនលឿនដោយតភ្ជាប់ពីភ្នំពេញទៅខេត្តព្រះសីហនុ និងតភ្ជាប់ទៅព្រំដែនថៃ»។
លោក ស៊ិន ចន្ធី ប្រធានសមាគមភ័ស្ដុភារកម្មកម្ពុជា បានថ្លែងមកកាន់ភ្នំពេញប៉ុស្តិ៍ថា ការធ្វើទំនើបកម្មផ្លូវដែកជាជម្រើសមួយដ៏សំខាន់នៅក្នុងការសម្រួលដល់ការដឹកជញ្ជូនទាំងទំនិញ និងទេសចរ ជាពិសេសគឺការដឹកជញ្ជូនតាមផ្លូវដែកមានតម្លៃថោក និងមិនបង្កការកកស្ទះចរាចរណ៍សាធារណៈទៀតផង។
លោកបានថ្លែងបញ្ជាក់ថា៖ «នៅពេលដែលប្រទេសកម្ពុជាបានធ្វើទំនើបកម្មផ្លូវដែក យើងនឹងទទួលបានអត្ថប្រយោជន៍យ៉ាងសំខាន់ដល់ការរីកចម្រើនសេដ្ឋកិច្ចយើង ដោយសារតែវាបានជួយធ្វើឱ្យតម្លៃដឹកជញ្ជូនមានការធ្លាក់ចុះក្នុងការលើកកម្ពស់ឧត្តមភាពប្រកួតប្រជែងវិស័យផលិតកម្មរបស់យើងផងដែរ»។
បើយោងតាមលោក ចន្ធី នៅពេលដែលផ្លូវដែកត្រូវបានអភិវឌ្ឍទៅជាល្បឿនលឿន គឺនឹងដើរតួនាទីយ៉ាងសំខាន់ក្នុងការតភ្ជាប់ទៅកាន់ប្រទេសជិតខាង ក្នុងការជំរុញការដឹកជញ្ជូនទាំងទំនិញ និងទេសចរណ៍ផងដែរ។
លោកថា៖ «ដូច្នេះនៅពេលដែលយើងមានផ្លូវរថភ្លឿងល្បឿនលឿន វាមិនត្រឹមតែលើកកម្ពស់ការដោះដូរទំនិញជាមួយប្រទេសជិតខាងយើងប៉ុណ្ណោះទេ ប៉ុន្តែយើងក៏បានទាក់ទាញលំហូរវិនិយោគ និងទេសចរណ៍ផងដែរ»៕
វីដេអូ៖
