កសិករក្នុងខេត្តកំពង់ធំ ដឹកដំឡូងមីតាមគោយន្តកាលពីពេលកន្លងមក។ ហេង ជីវ័ន
ភ្នំពេញៈ យោងតាមរបាយការណ៍ពីក្រសួងកសិកម្ម រុក្ខាប្រមាញ់ និងនេសាទ បានឱ្យដឹងថា ចាប់ពីខែមករា ដល់ខែវិច្ឆកា ឆ្នាំ ២០២២ ការនាំចេញចំណិតដំឡូងមីក្រៀមមានចំនួន ១ ៨១៧ ១៦៨,៤៧ តោន កើនឡើងជាង២៦ ភាគរយ បើធៀបនឹងរយៈពេលដូចគ្នា ក្នុងឆ្នាំ ២០២១។
នៅក្នុងរបាយការណ៍បានបញ្ជាក់ថា ដំឡូងមីស្រស់ត្រូវបាននាំចេញចំនួន ១ ៣៣១ ៨៥០ តោន កើនឡើងជាង៥០ភាគរយ,ម៉្សៅដំឡូងមីមានចំនួន៥៧ ០៦៧ តោន កើនឡើងជាង៨៧ភាគរយ និងកាកសំណល់ដំឡូងមីមានចំនួន២៤ ១០០,៣៩ តោន កើនឡើងជាង១៩៤ភាគរយ បើធៀបនឹងរយៈពេលដូចគ្នាកាលពីឆ្នាំ២០២១។
ផលិតផលដំឡូងមីភាគច្រើននាំចេញទៅកាន់ប្រទេសវៀតណាម ថៃ និងចិន ក្រៅពីនេះនាំចេញទៅកាន់ប្រទេសអ៊ីតាលី បែលហ្ស៊ិក សហរដ្ឋអាមេរិក និងណេដឺឡែន។ នេះបើតាមការបញ្ជាក់ពីរបាយការណ៍របស់ក្រសួងកសិកម្ម ។
អ្នកស្រីអេម សោភ័ណ្ឌ ម្ចាស់សៃឡូ ហ៊ីង សោភ័ណ្ឌ នៅខេត្តបាត់ដំបង បានប្រាប់ឱ្យដឹងថា រដូវប្រមូលផលឆ្នាំមុន(ខែវិច្ឆកាឆ្នាំ២០២១-ខែមេសា ឆ្នាំ២០២២)សៃឡូ របស់អ្នកស្រី ប្រមូលទិញដំឡូងមីពីកសិករបានប្រហែលជាង១ម៉ឺនតោន ដោយសារតែមានកសិករដាំដុះបានច្រើន ខណៈឈ្មួញក៏បានចុះកុងត្រាទិញពីសៃឡូច្រើនដែរ ព្រោះមានតម្រូវការពីខាងប្រទេសចិន។
អ្នកស្រីបានបន្ថែមថា ដោយឡែករដូវប្រមូលផលនៅឆ្នាំនេះវិញ (ខែវិច្ឆកាឆ្នាំ២០២២-ខែមេសា ឆ្នាំ២០២៣) ការប្រមូលទិញអាចនឹងបានតិចជាងរដូវមុន ដោយសារតែការចុះកុងត្រាទិញពីខាងថៃមានចំនួនតិច រីឯកសិករ នៅក្នុងខេត្តបាត់ដំបងភាគច្រើន បានងាកទៅដាំដំណាំពោតវិញ។
អ្នកស្រី បានបញ្ជាក់ដូច្នេះថា៖«ខាងឈ្មួញថៃ គេចុះកុងត្រាជាមួយយើងតិចឆ្នាំនេះ ដោយសារមានបញ្ហាពីខាងចិន កាត់បន្ថយការបញ្ជាទិញដែរ ទើបថៃគេបន្ថយជាមួយយើងដែរ។ ម្យ៉ាងវិញទៀត កសិករយើងគាត់ងាកទៅដាំពោតច្រើនជាងដំឡូងឆ្នាំនេះ ដោយសារពោតបានថ្លៃជាង»។
ចំពោះការនាំចេញដំឡូងមីទៅកាន់ប្រទេសចិននេះដែរ នាព្រឹកថ្ងៃទី៦ ខែមករា ឆ្នាំ២០២៣ នៅក្នុងពិធីបើកវេទិកាស្តីពី «ការជំរុញពាណិជ្ជកម្ម និងវិនិយោគកម្ពុជា-ចិន (ខេត្តក្វាងស៊ី)» លោក កៅ កោសល អគ្គនាយកជំរុញពាណិជ្ជកម្ម នៃក្រសួងពាណិជ្ជកម្មកម្ពុជា បានមានប្រសាសន៍ថា ថ្មីៗកន្លងទៅនេះ កម្ពុជា-ចិន បានចុះហត្ថលេខា លើអនុស្សរណៈយោគយល់គ្នា ស្តីពីការពង្រឹងកិច្ចសហប្រតិបត្តិការជំរុញពាណិជ្ជកម្ម។
ការចុះអនុស្សរណៈយោគយល់គ្នានេះ ធ្វើឡើងរវាងអគ្គនាយកដ្ឋានជំរុញពាណិជ្ជកម្ម នៃក្រសួងពាណិជ្ជកម្មកម្ពុជា និងមន្ទីរពាណិជ្ជកម្ម នៃតំបន់ស្វយ័តជនជាតិជាំងក្វាងស៊ី ប្រទេសចិន ក្នុងគោលដៅជំរុញផលិតផលសក្តានុពលកម្ពុជា ទៅកាន់ទីផ្សារចិន ក្នុងនោះនឹងជំរុញការនាំចេញដំឡូងមីស្ងួតកម្ពុជា ៤០ម៉ឺនតោន ទៅកាន់ប្រទេសចិន ក្នុងឆ្នាំ២០២២-២០២៣នេះ។
លោកបានបញ្ជាក់ថា ៖«កម្ពុជា បានបន្តធ្វើកិច្ចសហប្រតិបត្តិការជាមួយប្រទេសចិន លើកិច្ចការជាច្រើនទាក់ទងនឹងពាណិជ្ជកម្ម មានដូចជា បានបង្កើតមជ្ឈមណ្ឌលពាណិជ្ជកម្មឯកជនកម្ពុជា ចំនួន៩ទីតាំង នៅតាមទីក្រុងធំៗមួយចំនួន នៃប្រទេសចិន ដើម្បីផ្សព្វផ្សាយពីផលិតផលសក្តានុពលកម្ពុជា ផ្សព្វផ្សាយពីវប្បធម៌ ទេសចរណ៍ និងគោលនយោបាយពាណិជ្ជកម្ម និងវិនិយោគរបស់កម្ពុជា ព្រមទាំងជំរុញការនាំចេញទៅទីផ្សារចិន»។
ទិន្នន័យពីអគ្គនាយកដ្ឋានគយ និងរដ្ឋាករកម្ពុជា បានបង្ហាញថា ការនាំចេញទៅកាន់ប្រទេសចិន មានតម្លៃទឹកប្រាក់សរុប ១ ១០៩លានដុល្លារអាមេរិក ថយចុះជាង១៩ភាគរយ បើធៀបរយៈពេលដូចគ្នា កាលពីឆ្នាំ២០២១៕
