ភ្នំពេញៈ រយៈពេល​ពេល​ ១ ​ខែ​ដើមឆ្នាំ​ ២០២៣ ក្រុមប្រឹក្សា​អភិវឌ្ឍន៍​កម្ពុជា ​(CDC) បានអនុម័ត​លើ​គម្រោង​វិនិយោគ​សរុប​ចំនួន ​១០ ដែលមាន​ទុនវិនិយោគ​ជិត ១០០​ លាន​ដុល្លារ និង​បង្កើត​ការងារ​បាន ២១ ១៧៣​ កន្លែង ដោយ​ក្នុងនោះ ៨០ ភាគរយ ​ជា​ប្រភេទ​រោងចក្រ​វាយ​ន​ភណ្ឌ​។​

​ការ​គណនា​របស់ ​ភ្នំពេញ​ ប៉ុស្តិ៍​ ដោយ​ផ្អែកលើ​សេចក្តីប្រកាស​ព័ត៌មាន​របស់ CDC បង្ហាញថា ក្នុង​ខែមករា ឆ្នាំ ​២០២៣ មាន​គម្រោង​វិនិយោគឯកជន​ចំនួន ​១០ ត្រូវបាន​រដ្ឋាភិបាល​ក​ម្ពុ​ជា​អនុម័ត​ឱ្យ​វិនិយោគ ក្នុងនោះ ៨ ​ស្ថិតក្នុង​វិស័យ​វាយ​ន​ភណ្ឌ និង ​២ ជា​ប្រភេទ​ផលិតកម្ម​អំពូល​អគ្គិសនី​។​

​គម្រោង​ទាំង ​៨ ដែល​ស្ថិតក្នុង​វិស័យ​វាយ​ន​ភណ្ឌ រួមមាន គម្រោង​បង្កើត​រោងចក្រ​ផលិត​ស្បែកជើង របស់​ក្រុមហ៊ុន New Target Footwear(Cambodia) Co., Ltd មាន​ទីតាំងនៅ​ស្រុក​ត្រាំកក់ ខេត្តតាកែវ ក្រោម​ក្នុង​ទុន វិនិយោគ ៧,៥​ លាន​ដុល្លារ អាចបង្កើត​ការងារ ១ ៩៣៨​ កន្លែង​, គម្រោង​បង្កើត​រោងចក្រ​កាត់ដេរ​សម្លៀកបំពាក់រ​បស់ Golden Island Garments (Cambodia) Co., Ltd ក្នុងស្រុក​អង្គស្នួល ខេត្តកណ្តាល មាន​ទុនវិនិយោគ ៥,៤ ​លាន​ដុល្លារ បង្កើត​ការងារ​បាន ២ ១៣៥ ​កន្លែង​, គម្រោង​បង្កើត​រោងចក្រ​ផលិត​គ្រឿង​បន្សំ​សម្លៀកបំពាក់ ស្បែកជើង កាបូប និង​មួក របស់​ក្រុមហ៊ុន Jin Long Quan (Cambodia) Co., Ltd នៅ​ក្រុង​តាខ្មៅ ខេត្តកណ្តាល ក្នុង​ទុនវិនិយោគ ៥,១​ លាន​ដុល្លារ បង្កើត​ការងារ ៨៨៣ ​កន្លែង និង​គម្រោង​បង្កើត​រោងចក្រ​កាត់ដេរ​សម្លៀកបំពាក់ របស់​ក្រុមហ៊ុន Aroma Success Garment Co., Ltd នៅ​ស្រុក​សំរោង​ទង ខេត្តកំពង់ស្ពឺ មាន​ទុនវិនិយោគ ៣៦,៦ ​លាន​ដុល្លារ បង្កើត​ការងារ​បាន ៣ ១៥៨​ កន្លែង​។​

CDC ឱ្យដឹងទៀតថា ចំណែក​គម្រោង​ចំនួន ៤ ​ទៀត​ក្នុង​វិស័យ​វាយ​ន​ភណ្ឌ រួមមាន គម្រោង​បង្កើត​រោងចក្រ​ផលិត​ស្បែកជើង និង​កាបូប​របស់​ក្រុមហ៊ុន Qi HengXin Factory Co., Ltd នៅ​ផ្លូវជាតិ​លេខ ​២១ ក្រុង​តាខ្មៅ ខេត្តកណ្តាល ទុនវិនិយោគ ៨,៨​ លាន​ដុល្លារ អាចបង្កើត​ការងារ​បាន ២ ៩៣០ ​កន្លែង​, គម្រោង​បង្កើត​រោងចក្រ​ផលិត​កាបូបស្ពាយ​ពីក្រោយ កាបូប​ដំណេក តង់ កាត់ដេរ​សម្លៀកបំពាក់ និង​កម្រាល​ក្រាល​ដេក របស់​ក្រុមហ៊ុន Windara International Co., Ltd នៅ​ស្រុក​គងពិសី ខេត្តកំពង់ស្ពឺ ទុនវិនិយោគ ៥,៤​ លាន​ដុល្លារ ​អាចបង្កើត​ការងារ​បាន ២ ៧១៤​ កន្លែង​, គម្រោង​បង្កើត​រោងចក្រ​ផលិត​កាបូប​គ្រប់​ប្រភេទ របស់ ​Yue Wing Cheong Manufactory Co., Ltd នៅ​ស្រុក​គងពិសី ខេត្តកំពង់ស្ពឺ ទុនវិនិយោគ ៥,៤​ លាន​ដុល្លារ បង្កើត​ការងារ​បាន ៧៣៨​ កន្លែង និង​គម្រោង​បង្កើត​រោងចក្រ​ផលិត​កាបូប​គ្រប់​ប្រភេទ និង​កាត់ដេរ​សម្លៀកបំពាក់ របស់​ក្រុមហ៊ុន Xin Shun Jie (Cambodia) Leather Co., Ltd នៅ​ស្រុក​គងពិសី ខេត្តកំពង់ស្ពឺ មាន​ទុនវិនិយោគ ៥,២​ លាន​ដុល្លារ និង​អាចបង្កើត​ការងារ​បាន ១ ១៣៣​ កន្លែង​។​

​ដោយឡែក​គម្រោង​ដែល​ស្ថិតក្នុង​ផលិតកម្ម​អំពូល​ភ្លើងអគ្គិសនី រួមមាន គម្រោង​បង្កើត​រោងចក្រ​ផលិត​អំពូល​ភ្លើង​ចល័ត អំពូល​ភ្លើង​សូ​ឡា សម្ភារ​ប្លា​ស្ទិ​ក និង​សម្ភារ​បរិក្ខារ​ជួសជុល (​ដែកស្វាន វី​ស​...) របស់​ក្រុមហ៊ុន Technomate (Cambodia) Technology Co., Ltd. នៅក្នុង​តំបន់​សេដ្ឋកិច្ច​ពិសេស ស្វាយរៀង ហ្គី​ហ្គា រី​សស៍​, ខេត្តស្វាយរៀង ក្រោម​ទុនវិនិយោគ ១០​ លាន​ដុល្លារ​អាចបង្កើត​ការងារ​បាន ៧៥០​ កន្លែង និង​គម្រោង​បង្កើត​រោងចក្រ​ផលិត​អំពូល អំពូល​ភ្លើង​សូ​ឡា និង​បរិក្ខារ​អគ្គិសនី របស់​ក្រុមហ៊ុន Technomate (Cambodia) Precision Metal Co., Ltd. នៅក្នុង​តំបន់​សេដ្ឋកិច្ច​ពិសេស ស្វាយរៀង ហ្គី​ហ្គា រី​សស៍​, ខេត្តស្វាយរៀង មាន​ទុនវិនិយោគ ១០​ លាន​ដុល្លារ អាចបង្កើត​ការងារ​បាន ៧៥០ ​កន្លែង​។ នេះ​បើតាម CDC​។​

​អនុប្រធាន​សភាពាណិជ្ជកម្ម​កម្ពុជា លោក លឹម ហេង បាន​ប្រាប់ ​ភ្នំពេញ​ ប៉ុស្តិ៍​ ក្នុង​ថ្ងៃទី ​១ ខែកុម្ភៈ​ថា ទោះបី​ស្ថានភាព​នៃ​ការឆ្លង​រាលដាល​ជំងឺ​កូ​វីដ ​១៩ ជម្លោះ​ភូមិសាស្ត្រ​នយោបាយ និង​វិបត្តិ​សង្គ្រាម​រវាង​ប្រទេស​អ៊ុយ​ក្រែ​ន​-​រុស្ស៊ី នៅ​បន្ត​ការគំរាមកំហែង​ដល់​កំណើន​សេដ្ឋកិច្ចពិភពលោក ក៏​កម្ពុជា​នៅតែ​ទទួល​បានការ​ចូលមក​បណ្តាក់ទុន​ថ្មីៗ​ជា​បន្តបន្ទាប់​។

លោក​បន្តថា កិច្ចព្រមព្រៀង​ពាណិជ្ជកម្ម​ដែល​កម្ពុ​ជាមាន​ជាមួយ​ប្រទេស​ដៃគូ គឺ​កំពុង​ចូលរួមចំណែក​យ៉ាងច្រើន​ក្នុងការ​ទាក់ទាញ​អ្នកវិនិយោគ​ឱ្យ​បណ្តាក់ទុន​។ ដោយសារ​កម្ពុ​ជាមាន​ទី​ផ្សារ​នាំចេញ​ទំនិញ​កាន់តែច្រើន ដូច្នេះ​ការផលិត និង​នាំចេញ​នឹង​កាន់​តែមាន​លក្ខណៈ​ចម្រុះ​នៅពេល​ខាងមុខ​។​

​លោក​លើកឡើងថា​៖«​ខ្ញុំ​គិតថា ចំនួន​ក្រុមហ៊ុន​ដែល​ចូលមក​បណ្តាក់ទុន​នៅ​កម្ពុជា​នឹង​កើន​កាន់តែច្រើន ព្រោះ​ក្រៅពី​មាន​ទីផ្សារ​នាំចេញ​ច្រើន កម្ពុជា​ក៏​ទទួលបាន​ផលចំណេញ​មួយចំនួន​ពី​ជម្លោះ​ភូមិសាស្ត្រ​នយោបាយ​រវាង​ប្រទេស​ធំៗ ដែល​ធ្វើឱ្យ​រោងចក្រ​មួយចំនួន​ផ្លាស់ប្តូរ​ទីតាំង​មក​កម្ពុជា​»​។​

​រដ្ឋមន្ត្រីក្រសួង​ពាណិជ្ជកម្ម លោក ប៉ាន សូរ​ស័ក្តិ ធ្លាប់បាន​ប្រាប់​ភ្នំពេញ​ប៉ុស្តិ៍​បន្ទាប់ពី​កិច្ចពិភាក្សា​ធុរកិច្ច​កម្ពុជា​-​តួ​ក​គី កាលពី​ថ្ងៃទី ​១២ ខែមករា ថា កត្តា​ស្ថិរភាព​នយោបាយ កំណើនសេដ្ឋកិច្ច​រឹងមាំ ភាព​ទាក់ទាញ​នៃ​ច្បាប់​វិនិ​យោគ​​ថ្មី ព្រមទាំង​ការកែសម្រួល​នីតិវិធី​រដ្ឋបាល​ឱ្យ​កាន់​ភាពងាយស្រួល បាន​ជួយ​ឱ្យ​កម្ពុជា​ទាក់ទាញ​អ្នកវិនិយោគ​ក្នុងស្រុក និង​បរទេស​កាន់តែច្រើន​មក​បណ្តាក់ទុន​។

លោក​បន្តថា ក្រៅពី​កត្តា​ខាងក្នុង កម្ពុជា​ក៏​កំពុងបើក​ការចរចា និង​សម្រេចបាន​នូវ​ផល​វិជ្ជមាន​មួយចំនួន​ពី​ការបើក​ទីផ្សារ​នាំចេញ​ទំនិញ​ទៅកាន់​ទីផ្សារ​អន្តរជាតិ តាមរយៈ​ការចូល​ជាធរ​មាននៃ​កិច្ចព្រមព្រៀង​ពាណិជ្ជកម្ម​សេរី​ទ្វេភាគី​កម្ពុជា​-​ចិន​, កម្ពុជា​-​កូរ៉េ និង​កិច្ចព្រមព្រៀង​ភាពជា​ដៃគូ​សេដ្ឋកិច្ច​គ្រប់​ជ្រុងជ្រោយ​ក្នុង​តំបន់​(RCEP) ជាដើម​។​

​លោក​បញ្ជាក់ថា​៖«​ចំនួន​ក្រុមហ៊ុន​ដែល​ចូលមក​វិនិយោគ​នៅ​កម្ពុជា​នឹងមាន​ចំនួន​កាន់តែច្រើន​ថែមទៀត នៅពេល​កំណើនសេដ្ឋកិច្ច​ពិភពលោក​រឹងមាំ​ឡើងវិញ​»​។​​ ​លោក​​ប្រាប់ទៀតថា ការបណ្តាក់ទុន​នៅ​កម្ពុជា​នាពេលនេះ ក៏មាន​លក្ខណៈ​កាន់តែ​ចម្រុះ​វិស័យ​ផងដែរ​។​

​ធនាគារជាតិ​នៃ​កម្ពុជា​ (NBC) បានឱ្យដឹងថា គិត​ត្រឹម​ចុងឆ្នាំ​២០២១ ការវិនិយោគ​ផ្ទាល់​បរទេស​នៅ​កម្ពុជា មាន​ទឹកប្រាក់​សរុប ៤១​ពាន់​លាន​ដុល្លារ កើនឡើង ១១,២​ភាគរយ​បើ​ធៀប​នឹង​ឆ្នាំ​២០២០​។

ក្នុងនោះ​វិស័យ​ហិរញ្ញវត្ថុ មាន​ចំនួន ៩,៤​ ពាន់​លាន​ដុល្លារ ស្មើនឹង ២២,៩​ភាគរយ​, កម្មន្តសាល ៨,៥​ ពាន់​លាន​ដុល្លារ ស្មើ ២០,៨​ ភាគរយ​, អចលនទ្រព្យ ៤,៩​ ពាន់​លាន​ដុល្លារ ស្មើ ១២​ ភាគរយ​, សណ្ឋាគារ និង​ភោជនីយដ្ឋាន ៤,៤ ​ពាន់​លាន​ដុល្លារ ស្មើនឹង ១០,៧​ភាគរយ​, កសិកម្ម ៤,២​ លាន​ដុល្លារ ស្មើ ១០,៣​ ភាគរយ​, អគ្គិសនី ២,៦​ ពាន់​លាន​ដុល្លារ ស្មើនឹង ៦,២​ ភាគរយ​, សំណង់ ១,៦​ ពាន់​លាន​ដុល្លារ ស្មើនឹង ៤,១​ ភាគរយ និង​ផ្នែក​ផ្សេងៗ មាន​ចំនួន ៥,៣​ពាន់​លាន​ដុល្លារ ស្មើនឹង ១៣​ ភាគរយ​៕