​ភ្នំពេញៈ ការធ្វើ​ពាណិជ្ជកម្ម​ទ្វេភាគី​រវាង​កម្ពុជា និង​ម៉ាឡេស៊ី ក្នុង​ឆ្នាំ​​ ២០២២ មាន​ទឹកប្រាក់​សរុប​ជាង ៦២០​ លាន​ដុល្លារ​ កើនឡើង​ជាង ២៣ ​ភាគរយ បើ​ធៀប​នឹង​ឆ្នាំ​ ២០២១ ក្នុងនោះ​ទឹកប្រាក់​នៃ​ការ​នាំចូល​ទំនិញ​ពី​ម៉ាឡេស៊ី​មក​កម្ពុជា បាន​គ្របដណ្តប់​ជាង ៨០ ​ភាគរយ​។ នេះ​បើ​យោងតាម​អគ្គនាយកដ្ឋាន​គយ និង​រដ្ឋាករ​កម្ពុជា​។​

​ស្ថិតិ​ជញ្ជីងពាណិជ្ជកម្ម​ទំនិញ​ប្រចាំឆ្នាំ​ ២០២២ របស់​អគ្គនាយកដ្ឋាន​គយ និង​រដ្ឋាករ​កម្ពុជា ឱ្យដឹងថា ក្នុង​ឆ្នាំ ​២០២២ ទឹកប្រាក់​នៃ​ការផ្លាស់ប្តូរ​ពាណិជ្ជកម្ម​ទ្វេភាគី​កម្ពុជា និង​ម៉ាឡេស៊ី មាន​ចំនួន​សរុប ៦២០,៣៧៣​ លាន​ដុល្លារ កើន ២៣,៣​ ភាគរយ​បើ​ធៀប​នឹង​ឆ្នាំ​ ២០២១ ដែលមាន​ទឹកប្រាក់ ៥០៣,០០៤​ លាន​ដុល្លារ​។ ម៉ាឡេស៊ី គឺជា​ទីផ្សារ​ធំ​ទី ​១៦ ដែល​ធ្វើ​ពាណិជ្ជកម្ម​ជាមួយ​កម្ពុជា​។​

​យោងតាម​តារាង​ខាងលើ គឺ​ការនាំ​ទំនិញ​ពី​កម្ពុជា​ទៅ​ម៉ាឡេស៊ី មាន​ទឹកប្រាក់ ១១១,៨៥៣ ​លាន​ដុល្លារ កើន ១០,៤​ ភាគរយ​ពី​ចំនួន ១០១,៣១៨​ លាន​ដុល្លារ និង​ទំនិញ​នាំ​ពី​ម៉ាឡេស៊ី​នាំមក​កម្ពុ​ជាមាន ៥០៨,៥២០ ​លាន​ដុល្លារ កើន ២៦,៦​ ភាគរយ​ពី​ចំនួន ៤០១,៦៨៦ ​លាន​ដុល្លារ​។ ផ្អែក​តាម​ទិន្នន័យ​ខាងលើ គឺ​ជញ្ជីងពាណិជ្ជកម្ម​កម្ពុជា​មាន​ឱនភាព​ប្រមាណ ៣៩៦,៦៦៧​ លាន​ដុល្លារ​។​

​ប្រធាន​សមាគម​សហគ្រិន​ស្ត្រី​កម្ពុជា និង​ជា​ប្រធាន​ក្រុមប្រឹក្សា​ក្រុមហ៊ុន​លី​លី ហ្វ៊ូដអ៊ីន​ដាស​ទ្រី ខូ អិ​ល​ធី​ឌី លោកស្រី កែវ មុំ បាន​ប្រាប់​ភ្នំពេញ​ប៉ុស្តិ៍​នៅ​ថ្ងៃទី​​ ២ ខែកុម្ភៈ ថា ម៉ាឡេស៊ី​ជាទី​ផ្សារ​ធំ​មួយ​ក្នុង​តំបន់ ដែល​កម្ពុជា​ត្រូវ​ខំ​ពង្រីក​បន្ថែមទៀត ព្រោះ​កម្ពុជា​នៅមាន​ផលិតផល​សក្តានុពល​ជាច្រើន​សម្រាប់​នាំចេញ​ទៅ​ទីនោះ ពិសេស​ផលិតផល​ក្នុង​វិស័យ​កសិកម្ម​។​

​លោកស្រី​ថ្លែងថា​៖ «​ខ្ញុំ​គិតថា ការដាក់ចេញ​នូវ​គោលនយោបាយ​ជា​បន្តបន្ទាប់​របស់​រដ្ឋា​ភិ​បាល​ក្នុង​វិស័យ​កសិកម្ម និង​ភាព​រីកចម្រើន​នៃ​វិស័យ​កសិកម្ម​នឹង​ជួយ​ឱ្យ​សម្ទុះ​នៃ​ការនាំចេញ​ផលិតផល​កសិកម្ម​កម្ពុ​ជា​ទៅ​ប្រទេស​ម៉ាឡេស៊ី​កើនឡើង​ខ្ពស់​នៅពេល​អនាគត​»​។​

​យោងតាម​លោកស្រី កែវ មុំ ផលិតផល​នំ​ស្រួយ លី​លី ត្រូវបាន​នាំយកទៅ​លក់​នៅ​ប្រទេស​ម៉ាឡេស៊ី ៤៥​ ឆ្នាំ​ហើយ ប៉ុន្តែ​នៅមាន​បរិមាណ​តិចតួច​។​

​អ្នកស្រាវជ្រាវ​សេដ្ឋកិច្ច​នៃ​រាជបណ្ឌិត្យសភាកម្ពុជា លោក គី សេរី​វឌ្ឍន៍ បាន​ប្រាប់ថា សម្ទុះ​នៃ​ភាព​រីកចម្រើន​បានធ្វើឱ្យ​ប្រទេស​កម្ពុ​ជាមាន​តម្រូវការ​នាំចូល​ទំនិញ​ជាច្រើន​ពី​ម៉ាឡេស៊ី ខណៈ​បច្ចុប្បន្ន​ម៉ាឡេស៊ី គឺជា​មូលដ្ឋាន​ផលិតកម្ម​គ្រឿង​អេឡិចត្រូនិក បរិក្ខារ​ប្រើប្រាស់​ប្រចាំថ្ងៃ និង​គ្រឿងសំណង់ យ៉ាង​សម្បូរបែប​ប្រចាំ​តំបន់​។ លោក​បន្ថែមទៀតថា ភាពរឹងមាំ និង​អាយុកាល​ចំណាស់​នៃ​ខឿន​ឧស្សាហកម្ម និង​កសិកម្ម​នៅ​ម៉ាឡេស៊ី បានធ្វើឱ្យ​បរិមាណ​ទំនិញ​ផលិត​នៅ​ទីនោះ​មាន​ចំនួន​ច្រើន ព្រមទាំង​មាន​ថ្លៃដើម​ផលិត​ទាប​ជាង​កម្ពុជា​។​

​លោក​ប្រាប់ថា​៖ «​ដោយសារ​ម៉ាឡេស៊ី​មាន​ឧស្សាហកម្ម និង​កសិកម្ម​រីកចម្រើន ដូច្នេះ​កម្ពុជា​អាច​កាត់បន្ថយ​គម្លាត​នៃ​ការធ្វើ​ពាណិជ្ជកម្ម​របស់ខ្លួន​តា​មរយៈ​ការនាំចេញ​ផលិតផល​សក្តានុពល​មួយចំនួន​សម្រាប់​បម្រើឱ្យ​ការកែច្នៃ​នៅ​ម៉ាឡេស៊ី​»​។​

​យោងតាម លោក សេរី​វឌ្ឍន៍ ទំនិញ​សក្តានុពល​ដែល​កម្ពុ​ជាមាន​សម្រាប់​ម៉ាឡេស៊ី គឺ​អង្ករ ជ័រកៅស៊ូ និង​ដូងប្រេង​។​

​នៅក្នុង​វេទិកា​ធុរកិច្ច​កម្ពុជា​ម៉ាឡេស៊ី​ឆ្នាំ ​២០២២ កាលពី​ខែកុម្ភៈ ឆ្នាំ​ ២០២២ លោក សុខ ចិន្តា​សោភា អគ្គលេខាធិការ​ក្រុមប្រឹក្សា​អភិវឌ្ឍន៍​កម្ពុជា​បានឱ្យដឹងថា នេះ​ជាការ​ចាំបាច់​ដែល​កម្ពុជា​ត្រូវតែ​កែលម្អ​បរិស្ថាន​វិនិយោគ​របស់ខ្លួន​សំដៅ​ទាក់ទាញ​ការវិនិយោគ​ក្នុង​គន្លង​ប្រក្រតីភាព​ថ្មី​នៃ​វិបត្តិ​កូ​វីដ​ ១៩ ដែល​ទាមទារ​ឱ្យ​កម្ពុជា​ប្រកាន់យក​នូវ​អភិក្រម​បុ​រេ​សកម្ម​ជាង​មុន​ក្នុងការ​ជំរុញ និង​ទាក់ទាញ​វិនិយោគ​ប្រកបដោយ​គុណភាព និង​ចីរភាព​។​

​តាមរយៈ​វេទិកា​នោះ លោកចិន្តា​សោភា មាន​សុទិដ្ឋិនិយម​ថា នឹងមាន​វិនិយោគិន​ម៉ាឡេស៊ី​កាន់តែច្រើន​ចូលមក​បណ្តាក់ទុន​វិនិយោគ​នៅ​កម្ពុជា​។​

​ទិន្នន័យ​ធនាគារជាតិ​នៃ​កម្ពុជា ​(NBC)​ ឱ្យដឹងថា គិត​ត្រឹម​ចុងឆ្នាំ​ ២០២១ ការវិនិយោគ​ផ្ទា​ល់ពី​បរទេស​នៅក្នុង​ប្រទេស​កម្ពុ​ជាមាន​ទឹកប្រាក់​សរុប ៤១ ​ពាន់​លាន​ដុល្លារ ក្នុងនោះ​ការវិនិយោគ​របស់​វិនិយោគិន​ម៉ាឡេស៊ី ស្ថិតនៅ​ទី​៦ ដោយមាន​ទឹកប្រាក់ ១,៩​ ពាន់​លាន​ដុល្លារ​ស្មើ ៤,៦​ ភាគរយ​នៃ​ចំណែក​ទីផ្សារ​សរុប​តាម​ពីក្រោយ​ប្រទេស​ចិន កូរ៉េ​, សិង្ហ​បុរី​, វៀតណាម​, និង​ជប៉ុន​៕