ទិដ្ឋភាពទន្លេបាសាក់។ រូបថត រ៉ាហ៊ីម
ភ្នំពេញៈ កម្ពុជា អាចនឹងជីកព្រែក១ ដែលមានប្រវែង ៧គីឡូម៉ែត្រដើម្បីបើកផ្លូវទឹកសម្រាប់ការធ្វើចរាចរណ៍និងដឹកជញ្ជូនទំនិញតាមកប៉ាល់ពីទន្លេបាសាក់ ទៅកំពង់ផែសមុទ្រក្នុងខេត្តកែប ដោយមិនចាំបាច់ឆ្លងកាត់តាមផ្លូវទឹកប្រទេសជិតខាងទៀតទេ។ នេះបើតាមលោក ស៊ុន ចាន់ថុល រដ្ឋមន្ត្រីក្រសួងសាធារណការ និង ដឹកជញ្ជូន។
ក្នុងពិធីសន្និបាតបូកសរុបលទ្ធផលការងារឆ្នាំ ២០២២ និង លើកទិសដៅការងារ ឆ្នាំ ២០២៣ របស់ក្រសួងសាធារណការ និង ដឹកជញ្ជូន កាលពីថ្ងៃទី ១៥ ខែកុម្ភៈ លោក ស៊ុន ចាន់ថុល បានលើកឡើងថា ការសិក្សាលើគម្រោងផ្លូវនាវាចរណ៍ពីទន្លេបាសាក់ ទៅកំពង់ផែសមុទ្រនេះ ក្រុមការងាររបស់ក្រសួង និង ផ្នែកពាក់ព័ន្ធបានធ្វើឡើងរយៈពេល ២ ឆ្នាំ មកហើយ គឺលទ្ធផលនៃការសិក្សាដែលស្ទើរបញ្ចប់ ១០០ភាគរយនោះ បង្ហាញថា សម្រាប់លក្ខណៈបច្ចេកទេស (ការខួងដីធ្វើតេស្ត, ជីវចម្រុះ, បរិស្ថាន, បរិមាណទឹកទន្លេ, ការជួយរំដោះគ្រោះទឹកជំនន់-រាំងស្ងួតជាដើម) និងផ្លូវច្បាប់គឺមិនមានបញ្ហាទេ។
លោកបន្តថា គម្រោងបើកផ្លូវទឹកភ្ជាប់ពីទន្លេបាសាក់ទៅសមុទ្រក្នុងខេត្តកែបគឺនឹងប្រើប្រាស់ផ្លូវទឹកមួយចំនួនដែលមានស្រាប់ ដោយគ្រាន់តែជីកជម្រៅចុះបន្ថែមនិងជីកព្រែកថ្មីដែលមានប្រវែង ប្រហែល ៧ គីឡូម៉ែត្រទៀតនឹងទៅដល់សមុទ្រក្នុងខេត្តកែប។
លោកថ្លែងថា៖«បើធ្វើបានគម្រោងនេះនឹងប្តូរមុខមាត់ក៏ដូចជាប្តូរការដឹកជញ្ជូនតាមផ្លូវទឹកទៅសមុទ្ររបស់យើង គឺការរៀបចំឱ្យមានផ្លូវដឹកទំនិញមួយទៀតដោយប្រើទន្លេមេគង្គដោយឥឡូវនេះយើងចង់ប្រើទន្លេបាសាក់ ១ ថែមទៀតដើម្បីកាត់បន្ថយចំណាយនៃការដឹកជញ្ជូនកាត់បន្ថយតម្លៃនិងកាត់បន្ថយនីតិវិធីពេលកប៉ាល់ចេញពីកំពង់ផែផ្លូវទឹករបស់យើងទៅសមុទ្រ»។
យោងតាមលោកចាន់ថុលក្នុងការសិក្សារយៈពេល២ឆ្នាំកន្លងមកនេះគឺអគ្គនាយកដ្ឋានដឹកជញ្ជូនផ្លូវទឹកផ្លូវសមុទ្រនិងកំពង់ផែ នៃក្រសួងសាធារណការនិងដឹកជញ្ជូនបានសហការជាមួយក្រុមហ៊ុនចំនួន២គឺក្រុមហ៊ុនសាជីវកម្មស្ពានថ្នល់ចិនCRBC និងក្រុមហ៊ុនCCCC water Transportation Consultants Co., Ltd។
លោកលើកឡើងថា៖«នេះគឺជាគម្រោងប្រវត្តិសាស្ត្រហើយខ្ញុំសង្ឃឹមថាក្នុងខែនេះ(កុម្ភៈ) យើងនឹងបានតួលេខទាំងអស់ដើម្បីយកមកពិភាក្សាគ្នាជាមួយអន្តរក្រសួងដើម្បីរាយការណ៍ទៅគណៈរដ្ឋមន្ត្រីពិនិត្យថាតើយើងធ្វើឬមិនធ្វើ»។
បើតាម លោក ស៊ុន ចាន់ថុល គម្រោងជីកព្រែកខាងលើក៏នឹងក្លាយជាកន្លែងទាក់ទាញភ្ញៀវទេសចរឱ្យធ្វើដំណើរទៅកម្សាន្តផងដែរ។
ប្រធានសមាគមពាណិជ្ជករដឹកជញ្ជូននិងខ្សែចង្វាក់ផ្គត់ផ្គង់នៅកម្ពុជា លោក ជា ចាន់ដារ៉ា បានប្រាប់ភ្នំពេញប៉ុស្តិ៍ ក្នុងថ្ងៃទី ១៩ ខែកុម្ ភៈថា បើតាមព័ត៌មានដែលលោកទទួលបានគឺផ្លូវទឹកថ្មីនេះនឹងចេញពីទន្លេបាសាក់ត្រង់ ឃុំព្រែកអំបិល (ស្រុកស្អាង ខេត្តកណ្តាល) ភ្ជាប់ទៅសមុទ្រក្នុងខេត្តកែប។ផ្លូវទឹកនេះនឹងដើរតួនាទីសំខាន់ក្នុងការដឹកជញ្ជូនទំនិញពីតាមបណ្តាខេត្តពិសេសខេត្តនៅជាប់ទន្លេសាបនិងមេគង្គទៅកាន់កំពង់ផែសមុទ្រផ្ទាល់តែម្តងដែលនឹងជួយកាត់បន្ថយការចំណាយរបស់ប្រជាកសិករនិងអ្នកនាំចេញបានយ៉ាងច្រើន។
លោកប្រាប់ទៀតថាបច្ចុប្បន្ននៅតាមបណ្តាខេត្តជាប់ទន្លេសាបក៏មានការសាងសង់កំពង់ផែពហុបំណងសម្រាប់ដឹកទំនិញតាមផ្លូវទឹកផងដែរ។ការដឹកជញ្ជូនតាមផ្លូវទឹកមានតម្លៃទាបជាមធ្យោបាយផ្សេងៗទៀត។
លោកលើកឡើងថា៖«ក្នុងរយៈពេលប៉ុន្មានឆ្នាំចុងក្រោយនេះខ្ញុំឃើញមានគម្រោងអភិវឌ្ឍន៍វិស័យហេដ្ឋារចនាសម្ព័ន្ធផ្លូវថ្នល់ព្រលានយន្តហោះនិងកំពង់ផែជាបន្តបន្ទាប់កើតឡើង។ សកម្មភាពទាំងអស់នេះនឹងក្លាយជាកម្លាំងទាក់ទាញអ្នកវិនិយោគឱ្យចូលមកបណ្តាក់ទុននៅកម្ពុជាក៏ដូចជាលើកកម្ពស់សមត្ថភាពនាំចេញរបស់កម្ពុជាឱ្យបានកាន់តែខ្លាំង»។
អ្នកជំនាញសេដ្ឋកិច្ចនៅរាជបណ្ឌិត្យសភាកម្ពុជា លោក ហុង វណ្ណៈ បាននិយាយថា នៅពេលដែលប្រទេសមួយមានមធ្យោបាយដឹកជញ្ជូនកាន់តែសម្បូរបែបនិងចម្រុះវានឹងធ្វើឱ្យសមត្ថភាពនៃការប្រកួតប្រជែងផលិតផលរបស់ខ្លួនលើទីផ្សារអន្តរជាតិមានកាន់តែខ្លាំង។ ផ្លូវទឹកគឺមានភាពចាំបាច់ព្រោះក្រៅពីជួយកាត់បន្ថយការប្រើប្រាស់និងកកស្ទះតាមផ្លូវថ្នល់គឺ វាមានតម្លៃទាបជាងគេទៀតផង។លោកបន្តថាអ្វីដែលពិសេសនោះគឺគម្រោងនេះនឹងធ្វើឱ្យការដឹកជញ្ជូនទំនិញតាមផ្លូវទឹកពីភ្នំពេញទៅសមុទ្រមិនចាំបាច់ឆ្លងកាត់ប្រទេសគេ (វៀតណាម) ដូចពីមុនឡើយ។
លោកលើកឡើងថា៖«គម្រោងនេះនឹងផ្តល់ផលចំណេញច្រើនសម្រាប់សេដ្ឋកិច្ ចដូច្នេះបើសាងសង់កាន់តែឆាប់គឺកាន់តែល្អ»។
ពាណិជ្ជកម្មអន្តរជាតិសរុបក្នុងឆ្នាំ ២០២២ មានប្រមាណ ៥២,៤២ ពាន់លានដុល្លារកើនឡើង ៩,២ភាគរយ បើធៀបនឹងឆ្នាំ ២០២១។ ក្នុងនោះការនាំចេញរបស់កម្ពុជាមានចំនួន ២២,៤៨ ពាន់លានដុល្លារកើនឡើង ១៦,៤ភាគរយ និងការនាំចូលមានចំនួន ២៩,៩៤ ពាន់លានដុល្លារ កើនឡើង ៤,៣ភាគរយ។ នេះបើតាមទិន្នន័យអគ្គនាយកដ្ឋានគយ និង រដ្ឋាករកម្ពុជា៕
