ក្រសួងកសិកម្ម បានការគាំទ្រពីអង្គការ GIZ ដើម្បីនាំចេញម្រេចកម្ពុជាទៅកាន់ប្រទេសចិន។ រូបថត ក្រសួងកសិកម្ម
នាយកដ្ឋានការពារដំណាំ អនាម័យ និងភូតគាមអនាម័យ នៃក្រសួងកសិកម្ម រុក្ខាប្រមាញ់ និងនេសាទ ទទួលបានការសហការនិងការគាំទ្រពីអង្គការអភិវឌ្ឍន៍អន្តរជាតិអាល្លឺម៉ង់(GIZ) បានរៀបចំសិក្ខាសាលាផ្សព្វផ្សាយពិធីសារស្ដីពីលក្ខខណ្ឌតម្រូវភូតគាមអនាម័យសម្រាប់ការនាំចេញម្រេចកម្ពុជាទៅកាន់ប្រទេសចិន។
ការផ្សព្វផ្សាយនេះ បានរៀបចំឡើង នៅថ្ងៃទី៣ ខែមីនា ឆ្នាំ២០២៣ នៅខេត្តមណ្ឌលគិរី និងមានការចូលរួមពីថ្នាក់ដឹកនាំ និងមន្ត្រីជំនាញនៃនាយកដ្ឋានការពារដំណាំ អនាម័យ និងភូតគាមអនាម័យ ថ្នាក់ដឹកនាំមន្ទីរកសិកម្ម រុក្ខាប្រមាញ់ និងនេសាទខេត្តមណ្ឌលគិរី ត្បូងឃ្មុំ កំពត កែប ក្រចេះ និងខេត្តព្រះវិហារ តំណាងអង្គការ GIZ ម្ចាស់ចម្ការ សហគមន៍កសិកម្ម ក្រុមហ៊ុននាំចេញផងដែរ។
សិក្ខាសាលាផ្សព្វផ្សាយនេះ រៀបចំឡើងក្នុងគោលបំណងផ្សព្វផ្សាយដល់អ្នកពាក់ព័ន្ធឱ្យយល់ដឹងអំពីនីតិវិធីនិងដំណើរការនៃការចុះបញ្ជីចម្ការ និងទីតាំងវេចខ្ចប់ម្រេច ការគ្រប់គ្រងសមាសភាពចង្រៃលើដំណាំម្រេច និងការអនុវត្តកសិកម្មល្អលើដំណាំម្រេច (GAP) ស្របតាមលក្ខខណ្ឌតម្រូវភូតគាមអនាម័យសម្រាប់ការនាំចេញម្រេចកម្ពុជាទៅកាន់ប្រទេសចិន។
សមាគម និងអ្នកក្នុងផលិតកម្មម្រេច បានសាទរចំពោះគម្រោងការនាំចេញទៅទីផ្សារប្រទេសចិន ដែលនឹងជួយពង្រឹងគុណភាព និងបរិមាណម្រេចនាំចេញទៅទីផ្សារអន្តរជាតិឱ្យបានកាន់តែច្រើន។
លោក ម៉ាក់ នី ប្រធានសហព័ន្ធម្រេច និងគ្រឿងទេសកម្ពុជា បានប្រាប់ថា វាជាការប្រសើរណាស់ដែលម្រេចកម្ពុជាអាចនាំចេញជាផ្លូវការដោយផ្ទាល់ទៅប្រទេសចិន ដែលនេះជាការបោះជំហានថ្មីបន្ថែមទៀតសម្រាប់ទីផ្សារម្រេចកម្ពុជាទៅប្រទេសចិន
ខណៈកន្លងមកកម្ពុជាតែងពឹងផ្អែកច្រើនទៅលើប្រទេសវៀតណាម ដើម្បីនាំទៅកាន់ប្រទេសចិន។
ទាក់ទងសកម្មភាពដាំដុះ ថែរក្សា និងវិនិយោគថ្មីៗ លោក ម៉ាក់ នី ប្រាប់ថា ក្នុងរយៈពេលប៉ុន្មានឆ្នាំចុងក្រោយនេះគឺមិនសូវមានទេ ដោយសារតម្លៃម្រេចបានធ្លាក់ចុះជាបន្តបន្ទាប់។
លោកបានបញ្ជាក់ថា៖«អ្វីដែលជាឧបសគ្គសម្រាប់អ្នកដាំម្រេចនៅកម្ពុជា គឺការចំណាយថ្លៃដើមខ្ពស់។ ហើយតម្លៃម្រេចនៅក្នុងរយៈពេល ២-៣ ឆ្នាំមកនេះមិនល្អឡើយ។ យ៉ាងណាមិញ ខ្ញុំសូមលើកទឹកចិត្តឱ្យអ្នកដែលមានបំណងចង់នាំចេញទៅទីផ្សារចិនទាំងអស់សូមរួសរាន់ទៅចុះបញ្ជីឱ្យបានឆាប់រហ័សដើម្បីជំរុញការនាំចេញឱ្យបានកាន់តែច្រើន»។
សូមជម្រាបថា ប្រទេសកម្ពុជា មានខេត្តចំនួន ១៨ ដែលមានការដាំដុះម្រេច នៅក្នុងនោះខេត្ត ដែលសម្បូរការដាំដុះម្រេចច្រើនដែរ រួមមាន មណ្ឌលគិរី រតនគិរី ត្បូងឃ្មុំ និងកំពតជាដើម។
យោងតាមរបាយការណ៍ពីក្រសួងកសិកម្ម បានបង្ហាញថា គិតត្រឹមខែវិច្ឆិកា ឆ្នាំ២០២២ កម្ពុជា បាននាំចេញម្រេចគ្រប់ប្រភេទទៅក្រៅប្រទេស ក្នុងបរិមាណជាង ៨ ពាន់តោន ដោយបាននាំចេញទៅប្រទេសមួយចំនួនដូចជា វៀតណាម អាល្លឺម៉ង់ អាមេរិក តៃវ៉ាន់ បារាំង ប៊ែលហ្ស៊ិក ម៉ាឡេស៊ី ឆេក កូរ៉េ ជប៉ុន ស៊ុយអែត ស៊្វីស កាណាដា រុស្ស៊ី អង់គ្លេស ឥណ្ឌា លីទុយអានី កាហ្សាក់ស្ថាន អូស្រ្តាលី និងណេដឺឡែន៕
