ភ្នំពេញៈ​ ក្រសួង​សាធារ​ណ​ការ និង​ដឹក​ជញ្ជូន បាន​និង​កំពុង​រៀបចំ​សេចក្តីព្រា​ង​ចុងក្រោយ​​នៃ​ផែនការមេ​ស្ដីពី "​ទំនើ​បក​ម្មប្រព័ន្ធ​ព័​ត៌មាន​ភ័ស្តុភា​រកម្ម​នៅ​កម្ពុជា​"​ ដើម្បី​សម្រេច​ឱ្យ​បាន​ប្រព័ន្ធ​ភ័ស្តុភារ​កម្ម​ប្រក​បដោ​យ​ប្រសិទ្ធ​ភាព និង​មាន​ភាពជឿនលឿ​ន​តា​មរ​យៈ​ការប្រើ​ប្រាស់​ឌីជីថល​ ឆ្លើយ​តប​ទៅ​នឹង​ការ​គ្រប់​គ្រង ការ​ផ្តល់​សុវត្ថិ​ភាព និង​ចំណេញ​ពេល​វេលា​នៃ​វិស័យ​ដឹក​ជញ្ជូន​។​

​កាលពី​ថ្ងៃទី​ ១៤ ​ខែមីនា ឆ្នាំ​២០២៣ ​ក្រសួង​សាធារ​ណការបា​នរៀ​បចំ​សិក្ខាសា​លា​ពិគ្រោះ​យោ​បល់​មួយលើ​សេចក្តី​ព្រាង​ចុងក្រោយ​នៃ​ផែនកា​រ​មេ​ស្ដីពី"​ទំនើប​កម្ម​ប្រព័ន្ធ​ព័ត៌​មាន​ភ័ស្តុភា​​រកម្ម​នៅ​កម្ពុជា​"(Camb​odia Logistic Information Modernization Master Plan)ដែល​ជា​ជំនួយ​អភិ​វឌ្ឍន៍​ផ្លូវការ(ODA)របស់​សា​ធារណ​រដ្ឋ​កូរ៉េ សហ​ការ​រៀបចំ​ដោយ​វិទ្យាស្ថា​ន ​Korea Research Institute for Human Settlements (KRIHS) ដោយ​មាន​ការ​ចូល​រួម​ពី​មន្ត្រី​បច្ចេក​ទេស​ក្រសួង ​ក្រុម​ហ៊ុន ​Neighbor System សាកល​វិ​ទ្យា​​ល័យ Incheon National University និង​ក្រុម​ហ៊ុន SAMOOCM ផង​ដែរ​។

​បើតាម​ក្រសួង​សាធា​រណ​ការ ​ផែនការ​មេនេះ​បាន​បង្ហាញ​ពី​ការវិភាគ​យ៉ាង​ទូលំ​ទូលា​យ​អំពី​ប្រព័ន្ធ​ភ័ស្តុភា​រកម្ម​នៅ​កម្ពុជា និង​ផ្ដល់​ការ​ណែនាំ​​អំពី​ទិដ្ឋភាព​ជាក់​ស្ដែង​សម្រាប់​ការធ្វើ​ទំនើ​បកម្ម។ អាស្រ័យ​ហេ​តុនេះ​ទើប​ក្រុម​ការ​ងារ​រៀបចំ​សិក្ខា​សាលា​នេះ​ឡើង​ក្នុង​គោល​បំណង​ប្រមូល​ធាតុ​ចូល​បន្ថែម​ពី​ភាគី​ពាក់ព័​ន្ធដើ​ម្បី​ធ្វើឱ្យ​របាយ​ការណ៍​សិក្សា​នេះ​មាន​ភាព​ស៊ីជម្រៅ និង​​គ្រប់​ជ្រុង​ជ្រោយ​។ ចក្ខុវិ​ស័យ​របស់​ផែន​ការ​មេនេះគឺ​​ដើម្បី​សម្រេច​ឱ្យបាន​ប្រព័ន្ធ​ភ័​ស្តុភា​រកម្ម​ប្រក​បដោ​យ​ប្រសិទ្ធ​ភាពនិង​ភាព​ជឿន​លឿន​តាមរយៈ​ការផ្លា​ស់ប្តូរ​​ឌីជី​ថល និង​ការ​ដាក់​ចេញ​គោល​ដៅ​សំខាន់ៗ​ចំនួន​៣ ​រួមមាន ការ​ផ្លាស់​ប្តូរ​ទៅជា​ឌីជីថល​ (​Digital Transformation) ការច្នៃ​ប្រឌិ​ត​ឌីជីថ​ល (Digital Innovation) និង​បរិស្ថាន​ឌីជី​ថ​ល (Digital Environment) ក្នុងនោះ​ចាំ​បាច់​ឱ្យ​ក្រុ​មការងា​រ​អនុវត្ត​យុទ្ធ​សាស្ត្រ​ចំនួន​១​២ដើម្បី​​សម្រេច​ចក្ខុ​វិស័យ​ឱ្យ​បាន​ជោគជ័​យ​។​

​លោ​កស៊ិន ច​ន្ធី ប្រធាន​សមាគ​ម​ភ័ស្តុភា​រ​កម្ម​កម្ពុជា ដែល​បាន​ចូលរួម​ក្នុង​សិ​ក្ខាសាលា​​នេះដែ​រ​នោះ បាន​ប្រាប់​ថា នៅក្នុង​សិក្ខាសា​លា​នេះ ក៏​មាន​ការ​ចុះ​អនុស្សរ​ណៈ​យោគយ​ល់​​គ្នា​​ត្រីភាគី រួម​មាន សមា​គម​ភ័ស្តុភារ​កម្ម​កម្ពុជា ក្រសួង​ដែនដី​ ហេដ្ឋារ​ចនាស​ម្ព័ន្ធ ​និង​ដឹក​ជញ្ជូន​របស់​កូរ៉េ និង​នាយក​ដ្ឋាន​ភ័ស្តុ​ភារ​កម្មរ​បស់​ក្រសួង​​សាធា​រណការ​កម្ពុជា​ផង​ដែរ​។​

​លោក​បាន​បន្ថែម​ថា ការចុះ​MOU​ រវាង​ភាគី​ទាំង​៣​នេះ គឺដើ​ម្បីអ​នុវ​ត្ត​គម្រោង T​MS (Tracking Management System) ដោយ​ឱ្យ​ខាង​សមា​គម​ភ័ស្តុភារ​កម្ម​កម្ពុជាជា​អ្នក​អនុវត្ត​ផ្ទាល់ ដោយ​គូ​​ភាគី​នឹង​សិក្សា​ដោយ​ផ្ទាល់​ទាំង​នៅ​កម្ពុជា និង​​នៅ​កូរ៉េ​។​

​លោក​បាន​បញ្ជាក់​​ថា​៖«​យើង​បាន​ចុះ​MOU​ជា​មួយ​គ្នា​ហើយ​ ដោយ​យើង​នឹងមាន​ការសិក្សា​បន្ថែម​នៅ​ប្រទេស​កូរ៉េ និង​មក​សិក្សា​នៅ​កម្ពុជា ​ជាមួ​យ​សមា​គម​ផ្ទាល់ ដើ​ម្បី​ដំឡើង​ប្រព័ន្ធ​TMS (Track​ing Ma​nagement System) ដើម្បី​មានការ​ប្រើប្រា​ស់​លើ​រ​ថយន្ត​ដឹក​ជញ្ជូន​ធំៗ​ផ្សេងៗ​។ សម័យ​សកល​ភាវូបនី​យកម្ម​ ពិភព​លោក​ឈាន​ទៅដ​ល់​ការប្រើ​ប្រាស់​ប្រព័ន្ធ​ឌីជីថល​អស់​ហើយ ​ដូច្នេះ​វិស័យ​ដឹក​ជញ្ជូន​យើង ក៏​ចាំ​បាច់​ក្នុងការ​ប្រើ​ប្រាស់​ប្រព័ន្ធ​នេះ​ដែរ​ ដើម្បី​គ្រប់​គ្រង ការផ្តល់​សុវ​ត្ថិភាព ចំណេញ​ពេល​វេលា​ជា​ដើម​»​។​

​​លោ​ក ជា ចាន់​ដា​រ៉ា សមា​គម​ពាណិជ្ជ​ករ​ដឹកជ​ញ្ជូន ​និង​ខ្សែ​ចង្វាក់​ផ្គត់​ផ្គង់​នៅ​កម្ពុជា ​បានឱ្យដឹង​ដែ​រ​ថា ដើម្បី​​ជំរុញ​ការធ្វើ​ទំនើប​កម្ម​ប្រព័ន្ធ​ភ័ស្តុភារ​កម្មនេះ​​ឱ្យបាន​ល្អប្រ​សើ ​និង​កាន់​តែមាន​ប្រសិទ្ធ​ភាព​វិស័យ​ដឹក​ជញ្ជូន​ និង​ភ័ស្តុ​ភារ​កម្ម​របស់​កម្ពុ​ជា ត្រូវ​ផ្សាភ្ជាប់​ជាមួ​យនឹ​ង​ប្រព័ន្ធ​បច្ចេកវិ​ទ្យា ។​

​លោក​បាន​បញ្ជាក់​ថា​៖«​ដើម្បីឱ្យ​ដើរ​ទាន់​បដិវត្ត​ន៍ឧស្សាហ​កម្ម​4.0 ការអភិវឌ្ឍ​វិស័យ​ដឹកជ​ញ្ជូន ​និង​ភ័ស្តុភារ​​កម្ម​កម្ពុជា ចាំបាច់​ត្រូវតែ​ធ្វើ​ការធ្វើ​​ទំនើប​កម្ម​លើ​វិស័យ​ឡូ​ជី​ស្ទិ​ក មានន័​យថា ធ្វើ​យ៉ាង​ឱ្យមាន​ភាពងា​យស្រួ​ល​នៅក្នុង​ការកំណត់​ការ​ទុកដាក់​ទំនិញឬ​ការបញ្ជូន​ទំនិញ​ឱ្យបា​ន​ទាន់​ពេ​លវេលា ​ឬ​ការ​ផ្តល់​ដំណឹង​ជាក់លា​ក់​ទាក់ទ​ង​នឹង​ដំណើរ​របស់​ទំនិញ​ផង​ដែរ​»​។​

​សូមជ​ម្រាប​ថា ផែន​ការមេ​ស្ដីពី ទំនើប​កម្ម​ប្រព័ន្ធ​ព័ត៌មាន​ភ័ស្តុភា​រកម្ម​នៅ​កម្ពុជា​ស្ថិត​ក្រោម​គម្រោង​រៀបចំ​ផែន​ការមេ​ទំនើប​កម្ម​ប្រព័ន្ធ​ភ័ស្តុភារ​កម្ម​កម្ពុជា ​និង​អនុវត្ត​សាក​ល្បង​ដោយ​ផ្អែកលើ​ប្រព័ន្ធ​បច្ចេក​វិទ្យា​កុំព្យូទ័​រ ដែល​គម្រោង​នេះ​រៀបចំ​ដើម្បី​ធ្វើឱ្យ​ប្រសើរ​ឡើង​នូវ​ប្រព័ន្ធ​ភ័ស្តុភា​​រកម្ម​ជាតិ​កម្ពុជា ដោយ​ផ្តោត​លើ​ទិសដៅ​សំខាន់ៗ​ចំនួន​៣​គឺ ការ​បង្កើត​ផែន​ការមេ​ប្រព័ន្ធ​គ្រប់​គ្រង​ព័ត៌មាន​ភ័ស្តុ​ភារ​កម្ម​ជាតិ ​ការ​អនុវត្ត​សាក​ល្បង​នៃ​ប្រព័ន្ធ​ព័ត៌មាន​ភ័ស្តុ​ភា​រកម្ម និង​ការប​ង្កើន​សមត្ថ​ភាព​របស់​មន្ត្រី​រាជការ​តាមរយៈ​ការបណ្តុះ​បណ្តាល​ក្នុង​ប្រទេស និង​នៅ​ប្រ​ទេស​កូរ៉េ​៕