ធនាគារ Silicon Valley Bank របស់សហរដ្ឋអាមេរិក ដែលប្រកាសក្ស័យធន។ រូបថត AFP
ភ្នំពេញៈ លោកនាយករដ្ឋមន្ត្រី ហ៊ុន សែន កាលពីថ្ងៃព្រហស្បតិ៍ បានធ្វើការអំពាវនាវដល់សាធារណជនកុំមានក្តីបារម្ភក្នុងការទៅដកប្រាក់ចេញពីធនាគាររបស់ ខ្លួនជុំវិញបញ្ហាក្ស័យធនរបស់ធនាគារធំៗ ២ របស់សហរដ្ឋអាមេរិកកាលពីពេលថ្មីៗកន្លងទៅនេះ។
យោងតាមសារព័ត៌មាន Reuters បានចេញផ្សាយកាលពីថ្ងៃទី ១០ ខែមីនា អំពីការប្រកាសក្ស័យធនរបស់ធនាគារ Signature Bank (SBNY.O) និងធនាគារ Silicon Valley Bank។ ប៉ុន្មានថ្ងៃក្រោយមក លោកប្រធានាធិបតី Joe Biden បានប្រកាសជាសាធារណៈថា ប្រព័ន្ធធនាគារបស់សហរដ្ឋអាមេរិក គឺមានសុវត្ថិភាពដោយសារអាជ្ញាធរបានចាត់វិធានាការនានាក្នុងការបង្ការកុំឱ្យពលរដ្ឋមានការភ័យខ្លាចសម្រុកទៅដកប្រាក់។
លោកនាយករដ្ឋមន្ត្រី ហ៊ុន សែន បានថ្លែងក្នុងពិធីចែកសញ្ញាបត្រនៅរាជធានីភ្នំពេញកាលពីថ្ងៃព្រហស្បតិ៍ ទី ១៦ មីនាថា ករណីដួលរលំធនាគារទាំង ២ របស់សហរដ្ឋអាមេរិក កាលពីពេលថ្មីៗនេះនឹងមិនបង្កហានិភ័យដល់សេដ្ឋកិច្ចសកល និងប្រព័ន្ធធនាគាររបស់កម្ពុជានោះឡើយ។
លោកបានលើកឡើងនូវបញ្ហាទាំងនេះថា ធ្លាប់បានកើតលើកទី១ វិបត្តិហិរញ្ញវត្ថុអាស៊ីឆ្នាំ ១៩៩៧ ពេលនោះពិតជាច្របូកច្របល់ក្នុងប្រព័ន្ធធនាគារនៅតាមបណ្តាប្រទេសនានា រាប់ទាំងធនាគារនៅកម្ពុជាផងដែរ។ លោកថា រហូតដល់ឆ្នាំ ២០០៨ វិបត្តិសេដ្ឋកិច្ចហិរញ្ញវត្ថុសកលដែលផ្តើមចេញពីការដួលរលំនៃធនាគារបស់អាមេរិកមួយដែរ វាអត់បានធ្វើឱ្យប៉ះពាល់ដល់កម្ពុជាទេ ហើយកម្ពុជាបានខិតខំទប់ស្កាត់ហានិភ័យដោយដំឡើងអត្រាកាតព្វកិច្ចចុះបញ្ជីពី ៧ ទៅ ១២ ភាគរយកាលពីពេលនោះបម្រុងទុកនូវស្ថានភាពអាក្រក់។
លោកថ្លែងថា៖ «ឥឡូវនេះបន្ទាប់ពីបណ្តាធនាគារចេះគ្រប់គ្រងហានិភ័យខ្លួនឯង យើងបានកាត់បន្ថយទម្លាក់អត្រាទុនបម្រុងកាតព្វកិច្ចមកត្រឹម ៧ ភាគរយ។ អ៊ីចឹងទេ ខ្ញុំសូមអំពាវនាវចំពោះប្រជាពលរដ្ឋរបស់យើងដែលបានដាក់ប្រាក់នៅក្នុងធនាគារសូមកុំស្លន់ស្លោ! ការស្លន់ស្លោនឹងធ្វើឱ្យយើងបាត់បង់ផលប្រយោជន៍ទៅវិញទេ»។
លោក អ៊ិន ចាន់នី ប្រធានអគ្គនាយករបស់ធនាគារអេស៊ីលីដា បានថ្លែងថាថា បញ្ហាដែលបានកើតឡើងនៅសហរដ្ឋអាមេរិកនោះនឹងមិនពាក់ព័ន្ធនឹងប្រព័ន្ធធនាគាររបស់ប្រទេសកម្ពុជាឡើយ ដោយសារតែប្រព័ន្ធធនាគារ និងហិរញ្ញវត្ថុនៅកម្ពុជាត្រូវបានស្ថិតក្រោមច្បាប់បញ្ញត្តិដ៏តឹងរ៉ឹង ដែលគ្រប់គ្រងដោយធនាគារជាតិនៃកម្ពុជា។
លោកបានបញ្ជាក់យ៉ាងដូច្នេះថា៖ «វាជារឿងដាច់ដោយឡែកអំពីបរិយាកាសធ្វើអាជីវកម្មរបស់យើង ដូច្នេះវាមិនបង្កជាហានិភ័យដល់ប្រព័ន្ធធនាគាររបស់យើងឡើយ។ ប្រទេសយើងតូចក៏ពិតមែន ប៉ុន្តែយើងមាននិយតករ ដែលមានធនាគារជាតិនៃកម្ពុជាដែលពោរពេញដោយបទពិសោធន៍ក្នុងការគ្រប់គ្រង និងចេញបទប្បញ្ញត្តិនានា។ ដូច្នេះយើងគ្មានអ្វីត្រូវព្រួយបារម្ភនោះឡើយ ដោយសារតែធនាគារទាំងអស់ក៏សុទ្ធតែមានវិធានការបង្ការហានិភ័យរបស់ខ្លួនផងដែរ»។
លោក តូច ចៅចេក នាយកប្រតិបត្តិរបស់ធនាគារប្រៃសណីយ៍បានថ្លែងប្រាប់ភ្នំពេញប៉ុស្តិ៍នៅថ្ងៃព្រហស្បតិ៍ថា ធនាគារ ២ នៅអាមេរិកដែលដួលនោះគឺមិនមែនជាធនាគារធំដែលអាចបង្កជាហានិភ័យនានាដល់សេដ្ឋកិច្ចសកលនោះឡើយ។ លោកបានលើកឡើងថា សម្រាប់ធនាគារ Silicon Valley គឺមានទំហំធំល្មម ប៉ុន្តែទិសដៅរបស់គេគឺផ្តោតលើការផ្តល់កម្ចីទៅលើវិស័យពាណិជ្ជកម្មបង្កើតថ្មីផ្នែកបច្ចេវិទ្យាដែលបង្កហានិភ័យដល់គាត់ដោយសារតែអ្នកវិនិយោគពុំសូវវិនិយោគលើវិស័យ នេះ និងក្រុមហ៊ុនមួយចំនួនបានកាត់បន្ថយបុគ្គលិក ដូច្នេះរាល់បុគ្គលិកដែលប្រើប្រាស់គណនីរបស់ធនាគារនេះក៏បិទអស់ដែរ។
បើយោងតាមលោក ចៅចេក សម្រាប់ស្ថានភាពធនាគារ និងហិរញ្ញវត្ថុនៅប្រទេសកម្ពុជា លោកសង្កេត ឃើញថា ចាប់តាំងពីធនាគារអាមេរិកទាំង ២ ដួលរលំនោះ ពុំមានអតិថិជនស្ទុះស្ទាមកដកប្រាក់ទេ។
លោកបានថ្លែងថា៖ «ខ្ញុំសង្កេត ឃើញថា វិស័យហិរញ្ញវត្ថុរបស់យើងនៅដំណើរការជាប្រក្រតី ជាមួយ គ្នានេះដែរការបញ្ចេញឥណទានរបស់យើងក៏នៅប្រតិបត្តិការជាធម្មតាផងដែរ។ខ្ញុំយល់ថា វិស័យធនាគារ និងហិរញ្ញវត្ថុរបស់យើងមិនទទួលរងផលប៉ះពាល់ពីវិស័យហិរញ្ញវត្ថុរបស់អាមេរិកឡើយ ដោយសារតែវិស័យធនាគាររបស់យើង គឺជាធនាគារក្នុងស្រុកដែលមានប្រភពទុនក្នុង ស្រុក អ្នកប្រើប្រាស់ក្នុងស្រុក និងធនាគារក្នុងស្រុកស្ទើរតែ ១០០ ភាគរយផ្តល់ឥណទានគឺមានទ្រព្យធានា ដូច្នេះគឺពុំមានបញ្ហានោះទេ គឺយើងមានសុវត្ថិភាព ១០០ ភាគរយ»។
លោកនាយករដ្ឋមន្ត្រី ហ៊ុន សែន ក៏បានលើកឡើងថា ប្រសិនបើពលរដ្ឋដែលបានដាក់ប្រាក់កន្លងមក រួចប្រញាប់ប្រញាល់ទៅដកប្រាក់ដោយសារតែក្តីបារម្ភនោះ ពួកគេនឹងបាត់បង់ទាំងអស់នូវអត្រាការប្រាក់ដោយសារគេមិនឱ្យ ព្រោះដកមុនកាលកំណត់។
លោកបានក៏ថ្លែងបញ្ជាក់ទៀតថា ឆ្នាំ ២០០៨-២០០៩ ផ្តល់មេរៀនឱ្យប្រទេសអាមេរិកគ្រប់គ្រាន់ណាស់ទៅហើយ អ៊ីចឹងអាមេរិកក៏មិនធ្វើឱ្យមានភាពច្របូកច្របល់លើទឹកដីអាមេរិកដោយសារដួលរលំនៃធនាគារ ២ នេះដែរ។
លោកនាយករដ្ឋមន្ត្រីបានថ្លែងថា៖ «សូមបងប្អូនកុំតក់ស្លត់ កុំភិតភ័យចំពោះការកើតឡើងច្រំដែលនៃការដួលរលំរបស់ធនាគារអាមេរិក។ សូមអំពាវនាវដល់ប្រជាពលរដ្ឋជឿទុកចិត្តដល់សមត្ថភាពគ្រប់គ្រងលើវិស័យហិរញ្ញវត្ថុ និងធនាគារនៅកម្ពុជា ដោយសារធនាគារមានទុនបម្រុងគ្រប់គ្រាន់ក្នុងការដោះស្រាយបញ្ហា»។
យោងតាមរបាយការណ៍ប្រចាំឆ្នាំ ២០២២ របស់ធនាគារជាតិនៃកម្ពុជា ប្រព័ន្ធធនាគារកម្ពុជាមានធនាគារពាណិជ្ជ ៥៩ ធនាគារឯកទេស ៩ គ្រឹះស្ថានមីក្រូហិរញ្ញវត្ថុទទួលប្រាក់បញ្ញើ ៥ គ្រឹះស្ថានមីក្រូហិរញ្ញវត្ថុ ៨២ គ្រឹះស្ថានឥណទានជនបទ ២២៤ គ្រឹះស្ថានភតិសន្យាហិរញ្ញវត្ថុ ១៦ គ្រឹះស្ថានផ្តល់សេវាទូទាត់សងប្រាក់ ៣៤៕
វីដេអូ៖
