ក្រសួងសាធារណការស្នើជប៉ុនពិនិត្យលទ្ធភាពជួយជ្រោមជ្រែងបណ្តុះបណ្តាលវិស្វករកម្ពុជាមានជំនាញច្បាស់លាស់ត។ រូបថត ក្រសួងសាធារណការ
ភ្នំពេញៈ ក្រសួងសាធារណការ និងដឹកជញ្ជូន ស្នើជប៉ុនឱ្យបន្តជួយអភិវឌ្ឍសមត្ថភាពធនធានមនុស្ស ក៏ដូចជាពិនិត្យលទ្ធភាពជួយជ្រោមជ្រែងដល់ដំណើរការរបស់វិទ្យាស្ថានតេជោសែន សាធារណការ និងដឹកជញ្ជូន ដើម្បីបណ្តុះបណ្តាលវិស្វករកម្ពុជាឱ្យមានជំនាញច្បាស់លាស់។
ការស្នើនេះធ្វើឡើងក្នុងជំនួបនាថ្ងៃទី១៧ ខែមីនា រវាងលោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន និងលោក Atsushi Ueno ឯកអគ្គរាជទូតជប៉ុនថ្មី ប្រចាំកម្ពុជានៅទីស្តីការក្រសួង។
ក្រសួងសាធារណការបញ្ជាក់ក្នុងហ្វេសប៊ុកនាថ្ងៃទី១៨ ខែមីនា ថា លោក ស៊ុន ចាន់ថុល បានថ្លែងអំណរគុណចំពោះរាជរដ្ឋាភិបាលជប៉ុន ដែលកន្លងមក បានពង្រឹងចំណងមិត្តភាព និងកិច្ចសហប្រតិបត្តិការល្អរវាងប្រទេសទាំង ២។
លោកបានប្រាប់លោក Atsushi អំពីការបំពេញការងារប្រកបដោយការទទួលខុសត្រូវ និងកិច្ចសហប្រតិបត្តិការដ៏ល្អរវាងរាជរដ្ឋាភិបាលនៃប្រទេសទាំង ២ដោយមានគម្រោងអភិវឌ្ឍន៍អាទិភាពសំខាន់ៗដែលសម្រេចបាន និងកំពុងអនុវត្តបន្ត។
គម្រោងទាំងនោះរួមមាន គម្រោងសាងសង់ផែកុងតឺន័រថ្មី ដំណាក់កាលទី១ របស់កំពង់ផែស្វយ័តក្រុងព្រះសីហនុ ការសិក្សាគម្រោងសាងសង់ចំណតផែកុងតឺន័រថ្មីជំហានទី២ និងជំហានទី៣ ដែលកំពង់ផែនេះជាច្រកសេដ្ឋកិច្ចសម្រាប់ការនាំទំនិញចេញ-ចូល គម្រោងកែលម្អប្រព័ន្ធភ័ស្តុភារកម្មកម្ពុជា គម្រោងពង្រីក និងលើកកម្រិតគុណភាពផ្លូវជាតិលេខ៥ និងគម្រោងផ្សេងៗទៀត។
ក្រសួងបញ្ជាក់ថា គម្រោងអភិវឌ្ឍន៍ហេដ្ឋារចនាសម្ព័ន្ធដឹកជញ្ជូននានា ដែលក្រសួងសម្រេចបាន និងកំពុងធ្វើការអភិវឌ្ឍ ដូចជាផ្លូវល្បឿនលឿន ភ្នំពេញ-ព្រះសីហនុ ដែលបានដាក់ដំណើរការកាលពីខែវិច្ឆិកា ឆ្នាំមុន គម្រោងផ្លូវល្បឿនលឿន ភ្នំពេញ-បាវិត ដែលគ្រោងនឹងបើកការដ្ឋានសាងសង់នៅខែមិថុនា ឆ្នាំនេះ។
ក្រសួងបន្តថា ក្រៅពីនេះ មានគម្រោងសិក្សាសមិទ្ធិលទ្ធភាពផ្លូវល្បឿនលឿន ភ្នំពេញ-សៀមរាប និងការសិក្សាសមិទ្ធលទ្ធភាពគម្រោងលើកកម្រិតផ្លូវរថភ្លើងភាគខាងជើង ភ្នំពេញ-ប៉ោយប៉ែត គម្រោងសិក្សាសមិទ្ធិលទ្ធភាពដឹកជញ្ជូនតាមផ្លូវទឹកពីទន្លេបាសាក់ទៅកាន់កំពង់ផែឆ្នេរសមុទ្រខេត្តកែប ជាពិសេសលើវិស័យដឹកជញ្ជូនសាធារណៈក្នុងទីក្រុង។
ក្រសួងបញ្ជាក់ថា៖«ឯកឧត្តមទេសរដ្ឋមន្ត្រី បានស្នើឱ្យជប៉ុនជួយបន្តអភិវឌ្ឍ កសាងសមត្ថភាពធនធានមនុស្ស តាមរយៈការផ្ដល់សាស្ត្រាចារ្យ វគ្គបណ្តុះបណ្តាលខ្លីៗ ដោយផ្ទាល់ ឬតាមប្រព័ន្ធ online ក៏ដូចជាពិនិត្យលទ្ធភាពជួយជ្រោមជ្រែងដល់ដំណើរការរបស់វិទ្យាស្ថានតេជោសែន សាធារណការ និងដឹកជញ្ជូន ដើម្បីបណ្តុះបណ្តាលវិស្វករកម្ពុជាឱ្យមានជំនាញច្បាស់លាស់»។
ថ្មីៗនេះ ជប៉ុនបានផ្តល់គ្រឿងចក្រ Stabilizer មកកាន់ក្រសួង ដើម្បីបម្រើការងារក្នុងវិស័យផ្លូវថ្នល់។ ជប៉ុនក៏បានផ្តល់ជំនួយចំពោះការសិក្សាគម្រោងអាងប្រព្រឹត្តិកម្មទឹកកខ្វក់ និងផែនការយុទ្ធសាស្រ្តភាពជាដៃគូគ្រប់ជ្រុងជ្រោយផងដែរ៕
