រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក ឌិត ទីណា ថ្លែងកាលពីថ្ងៃទី ២៤ ខែមីនា។ រូបថត SPM
ភ្នំពេញៈ រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក ឌិត ទីណា បានស្នើឱ្យសភាពាណិជ្ជកម្មអឺរ៉ុប (EuroCham) ជួយពិនិត្យលទ្ធភាពធនាគារនៅអឺរ៉ុបដើម្បីជួយឱ្យកម្ពុជាអាចទទួលបានប្រាក់កម្ចីក្នុងអត្រាការប្រាក់ទាប និងព្យាយាមផ្តល់នូវស្តង់ដាដែលជួយឱ្យផលិតផលកសិកម្មកម្ពុជានាំទៅទីផ្សារអឺរ៉ុបកាន់តែច្រើន។
សំណើនេះបានលើកឡើងក្នុងឱកាសនៃជំនួបទ្វេភាគីរវាងលោក ឌិត ទីណា រដ្ឋមន្ត្រីក្រសួងកសិកម្ម ជាមួយលោក Tassilo Brinzer ប្រធានសភាពាណិជ្ជកម្មអឺរ៉ុប (EuroCham) ប្រចាំកម្ពុជា កាលពីថ្ងៃទី ២៧ ខែមីនា នៅទីស្តីការក្រសួងកសិកម្ម។
នៅក្នុងឱកាសនោះលោក ឌិត ទីណា បានសម្តែងការស្វាគមន៍ចំពោះសមាសភាពប្រធាន និងអនុប្រធានថ្មីនៃ EuroCham និងបានថ្លែងអំណរគុណចំពោះ EuroCham ដែលបានយកចិត្តទុកដាក់ចំពោះវិស័យកសិកម្មកម្ពុជា។ តាមរយៈជំនួបខាងលើលោករដ្ឋមន្ត្រីក៏បានស្នើឱ្យមានការជំរុញការធ្វើកសិកម្មល្អ (GAP) និងផ្តោតលើមុខដំណាំគន្លឹះឱ្យមានគុណភាពខ្ពស់ ព្រមទាំងនិរន្តរភាពកសិកម្ម។
លោកថ្លែងថា៖ «ក្រសួងកសិកម្មនឹងត្រៀមខ្លួនក្នុងការជួយជំរុញ និងគាំទ្រដល់វិស័យឯកជន ពិសេសការផ្តល់អ្នកបច្ចេកទេសដើម្បីបង្រៀនកសិករឱ្យផលិតកសិផលស្របតាមស្តង់ដារបស់ទីផ្សារអឺរ៉ុប តាមរយៈការអនុវត្តកសិកម្មតាមកិច្ចសន្យា (Contract Farming) ដោយមានការធានា។ បន្ថែមលើនេះខ្ញុំក៏ស្នើឱ្យ EuroCham ពិនិត្យលទ្ធភាពធនាគារអឺរ៉ុប ក្នុងការទទួលបានប្រាក់កម្ចីដែលមានអត្រាការប្រាក់ទាប និងព្យាយាមផ្តល់ស្តង់ដាដែលអាចនាំចូលទៅអឺរ៉ុបបាន»។
លោក សុខ យ៉ន អនុប្រធានសមាគមសុវត្ថិភាព បន្លែ ត្រី សាច់ បានឱ្យភ្នំពេញប៉ុស្តិ៍ដឹងកាលពីថ្ងៃទី ២៧ ខែមីនាថា បើទោះបីបច្ចុប្បន្នរដ្ឋាភិបាលបានយកចិត្តទុកដាក់ខ្លាំងទៅលើការជំរុញការបង្កបង្កើនផល ប៉ុន្តែទិដ្ឋភាពជាក់ស្តែង គឺការដាំដុះហាក់មិនសូវមានសម្ទុះទេ ព្រោះផលដែលប្រមូលបានគឺមានតម្លៃទាប។ តម្លៃទាបនេះ ក៏អាចមកពីមានការនាំចូលច្រើនពីប្រទេសជិតខាង ខណៈបច្ចេកទេសនៃការដាំដុះ ថែទាំ និងការជ្រើសរើសពូជ ក៏នៅមានកម្រិត។
លោកបន្ថែមថា បើកសិករអាចទទួលបានការជួយគាំទ្រផ្នែកបច្ចេកទេស ទុន ជាពិសេសទីផ្សារកាន់តែប្រសើរនោះ ការដាំដុះដំណាំកសិកម្មនឹងមានសម្ទុះថែមទៀត ព្រមទាំងអាចឈានទៅដល់ការនាំចេញទៅក្រៅប្រទេសកាន់តែច្រើន។
លោកប្រាប់ថា៖ «បញ្ហាទីផ្សារ គឺជាមូលហេតុចម្បងដែលធ្វើឱ្យការដាំដុះកសិកម្មកម្ពុជាមិនសូវបានតម្លៃខ្ពស់។ សម្រាប់គុណភាពកសិផលកម្ពុជា គឺល្អអាចទទួលយកបាន»។
លោកលើកឡើងទៀតថា ក្រៅពីបញ្ហាទាំងអស់ខាងលើ ប្រជាកសិករ និងអ្នកវិនិយោគក្នុងវិស័យកសិកម្មក៏តែងជួបបញ្ហាទាក់ទងនឹងភាពលំបាកនៃការទទួលបានប្រាក់កម្ចីពីគ្រឹះស្ថានហិរញ្ញវត្ថុ (លក្ខខណ្ឌនៃទ្រព្យបញ្ចាំ) ព្រមទាំងមានអត្រាការប្រាក់ខ្ពស់។
រដ្ឋមន្ត្រីក្រសួងកសិកម្ម លោក ឌិត ទីណា ក្នុងពិធីបិទសន្និបាតប្រចាំឆ្នាំរបស់ក្រសួងកសិកម្ម កាលពីសប្តាហ៍មុនបានលើកឡើងថា ក្រសួងនឹងបន្តអនុវត្តការផ្តល់ឥណទានការប្រាក់ទាប ដែលជាមធ្យោបាយលើកទឹកចិត្ត និងតម្រង់ទិសតួអង្គទាំងឡាយដែលចង់ចងក្រងជាបណ្តាញពីកសិករដល់ទីផ្សារ និងអនុវត្តផលិតកម្មតាមកិច្ចសន្យា។
លោកបន្តថា ពាក់ព័ន្ធនឹងការផ្តល់ឥណទានការប្រាក់ទាប ធនាគារអភិវឌ្ឍន៍ជនបទ និងកសិកម្ម បានផ្តល់ឥណទានប្រមាណ ៣៨០ លានដុល្លាររួចហើយដល់កសិករនៅឆ្នាំ ២០២២ ទាំងកសិករ និងអ្នកកែច្នៃដែល ៦០ ភាគរយនៃឥណទានមានការប្រាក់ប្រចាំឆ្នាំក្នុងរង្វង់ ៥-៥,៥ ភាគរយ។
លោកថ្លែងថា៖ «ក្នុងឆ្នាំ ២០២៣ នេះ ក្រសួងសង្ឃឹមថា ទំហំឥណទានការប្រាក់ទាបនឹងកើនឡើង ហើយផ្តល់ចំគោលដៅអាទិភាពដែលកំណត់»។
ក្រសួងកសិកម្មប៉ាន់ស្មានថា រយៈពេល ១១ ខែ ឆ្នាំ ២០២២ កម្ពុជារកចំណូលបាន ៣ ៣៦២,៤០១ លានដុល្លារ។ ក្នុងចំណោមចំណូលខាងលើ មាន ៤៧៨,០២៨ លានដុល្លារបានពីការនាំចេញអង្ករ, ៥៩១,៤៦ លានដុល្លារបានពីនាំចេញស្រូវ និងចំនួន ២ ២៩២,៩១ លានដុល្លារពីការនាំចេញកសិផលក្រៅពីស្រូវអង្ករ៕
