ភ្ញៀវទេសចរជាតិនិងអន្តរជាតិ ទស្សនាព្រះអាទិត្យរះចំកំពូលប្រាសាទអង្គរវត្ត កាលពីថ្ងៃទី ២១ ខែមីនា ឆ្នាំ ២០២៣។ រូបថត SPM
ភ្នំពេញៈ ភាពធូរស្បើយនៃការរីករាលដាលកូវីដ ១៩ ទូទាំងពិភពលោកបានធ្វើឱ្យភ្ញៀវទេសចរអន្តរជាតិទិញសំបុត្រចូលទស្សនារមណីយដ្ឋានអង្គរ នៅក្នុងត្រីមាសទី១ ឆ្នាំ ២០២៣ មានចំនួនជាង ២៣,៦ ម៉ឺននាក់ ដែលជួយឱ្យអង្គភាពនេះប្រមូលចំណូលបានជាង ១១,១ លានដុល្លារ កើន ១ ពាន់ភាគរយបើធៀបនឹងរយៈពេលដូចគ្នាឆ្នាំ ២០២២ ខណៈចំណូលពីការលក់សំបុត្រចូលទស្សនាប្រាសាទកោះកេរ និងកំពង់ផែចុងឃ្នៀស មានទឹកប្រាក់ ២៤៤ ៥៤៩ ដុល្លារ។
គ្រឹះស្ថានអង្គរ គឺជាគ្រឹះស្ថានសាធារណៈរដ្ឋបាល ដែលត្រូវបង្កើតឡើងកាលពីឆ្នាំ ២០១៦ ដោយស្ថិតក្រោមអាណាព្យាបាលបច្ចេកទេសនៃក្រសួងទេសចរណ៍ និងស្ថិតក្រោមអាណាព្យាបាលហិរញ្ញវត្ថុ នៃក្រសួងសេដ្ឋកិច្ច និងហិរញ្ញវត្ថុ។
តម្លៃសំបុត្រចូលទស្សនារមណីយដ្ឋានអង្គរ បានចែកចេញជា ៣ ប្រភេទ គឺសំបុត្រចូលទស្សនា ១ ថ្ងៃ មានតម្លៃ ៣៧ ដុល្លារ, ៣ ថ្ងៃ តម្លៃ ៦២ ដុល្លារ និង ៧ ថ្ងៃ មានតម្លៃ ៧២ ដុល្លារ។ នេះបើយោងតាមគ្រឹះស្ថានអង្គរ។
សេចក្តីប្រកាសព័ត៌មានរបស់គ្រឹះស្ថានអង្គរ ដែលទើបចេញផ្សាយ ឱ្យដឹងថា នៅក្នុងត្រីមាសទី ១ ឆ្នាំ ២០២៣ ភ្ញៀវទេសចរបរទេសទិញបណ្ណចូលទស្សនារមណីយដ្ឋានអង្គរ មានចំនួនសរុប ២៣៦ ៣៤១ នាក់ កើនឡើង ១ ០៩១,២៣ ភាគរយពីចំនួន ១៩ ៨៤០ នាក់កាលពីត្រីមាសទី ១ ឆ្នាំ ២០២២។ ទឹកប្រាក់ដែលទទួលបានចំនួន ១១ ១៣៥ ៤៩២ ដុល្លារ កើនឡើង ១ ២៦៥,៣៥ ភាគរយ។
ដោយឡែកសម្រាប់ខែមីនា ឆ្នាំ ២០២៣ ភ្ញៀវចូលទស្សនារមណីយដ្ឋានអង្គរ មានចំនួន ៧៩ ៣៩០ នាក់ កើន ៨៧០,៨៩ ភាគរយ និងទទួលបានប្រាក់ ៣ ៧៤៨ ៧០០ដុ ល្លារ កើន ១ ០១០,៧៣ ភាគរយ។
សេចក្តីប្រកាសព័ត៌មានបានឱ្យដឹងទៀតថា ក្រៅពីចំណូលពីការលក់សំបុត្រឱ្យភ្ញៀវអន្តរជាតិចូលទស្សនារមណីយដ្ឋានអង្គរ គ្រឹះស្ថានមួយនេះក៏បានចំណូលពីការលក់សំបុត្រចូលទស្សនាប្រាសាទកោះកែរ ចំនួន ៦៥ ៣៨៥ ដុល្លារ និងការលក់សំបុត្រទូក(នៅកំពង់ផែចុងឃ្នៀស) ចំនួន ១៨០ ១៦៤ ដុល្លារផងដែរ។
លោក ខៀវ ធី ប្រធានសមាគមមគ្គុទ្ទេសក៍ទេសចរណ៍អង្គរ បានប្រាប់ភ្នំពេញប៉ុស្តិ៍នៅថ្ងៃទី ៣ ខែមេសាថា ចំនួនភ្ញៀវទេសចរអន្តរជាតិធ្វើដំណើរមកកម្សាន្តនៅតំបន់អង្គរក្នុងខេត្តសៀមរាប បានកើនឡើងជាបន្តបន្ទាប់ ជាពិសេសចាប់ពីដើមឆ្នាំ ២០២៣ មក។
កំណើនភ្ញៀវទេសចរជាតិ និងអន្តរជាតិ បានជួយឱ្យអ្នកក្នុងវិស័យទេសចរណ៍ទទួលបានការងារ និងចំណូលឡើងវិញជាបណ្តើរៗហើយ បន្ទាប់ពីធ្លាក់ចុះយ៉ាងគំហុកក្នុងអំឡុងឆ្នាំ ២០២០ និង ២០២១ ដោយសារវិបត្តិការឆ្លងរាលដាលជំងឺកូវីដ ១៩។ លោកបន្តថា ចំនួននេះនឹងកើនឡើងខ្ពស់នៅក្នុងអំឡុងខែមេសា និងឧសភា ជាពេលដែលកម្ពុជានឹងរៀបចំព្រឹត្តិការណ៍សង្ក្រាន្តនៅក្នុងខេត្តសៀមរាប និងការប្រកួតកីឡាស៊ីហ្គេម និងប៉ារ៉ាហ្គេម នៅរាជធានីភ្នំពេញ។
លោកថ្លែងថា៖ «ទោះពេលនេះភ្ញៀវអន្តរជាតិមិនច្រើនដូចមុនកូវីដ ប៉ុន្តែវាកំពុងស្ថិតលើដំណើរកើនឡើងជាបណ្តើរៗ។ បើវិបត្តិសេដ្ឋកិច្ចពិភពលោក និងជម្លោះអន្តរជាតិធំៗឆាប់បញ្ចប់ កម្ពុជារំពឹងនឹងអាចទទួលបានភ្ញៀវទេសចរកាន់តែច្រើន»។
បើតាមលោក ខៀវ ធី ភ្ញៀវទេសចរអន្តរជាតិមកកម្សាន្តនៅខេត្តសៀមរាបពេលនេះ គឺភាគច្រើននៅក្នុងតំបន់អាស៊ី។
អ្នកនាំពាក្យនៃរដ្ឋលេខាធិដ្ឋានអាកាសចរស៊ីវិល លោក ស៊ីន ចាន់សិរីវុត្ថា កាលពីខែមករា បាននិយាយថា វិស័យអាកាសចរណ៍ស៊ីវិលកម្ពុជាបានចាប់ផ្តើមដំណើរការល្អជាលំដាប់ចាប់ពីរដ្ឋាភិបាលបើកទទួលភ្ញៀវអន្តរជាតិឡើងវិញតាំងពីខែវិច្ឆិកា ឆ្នាំ ២០២១។ ឆ្នាំ ២០២៣ នេះវិស័យអាកាសចរណ៍កម្ពុជារំពឹងទទួលបានអ្នកដំណើរប្រមាណជាង ៤,៦ លាននាក់ ខណៈចំនួនជើងហោះហើរនឹងកើនដល់ជាង ៤៥ ០០០ ជើង។
លោកនាយករដ្ឋមន្ត្រី ហ៊ុន សែន ក្នុងពិធីបើកការដ្ឋានសាងសង់ស្ពានឆ្លងទន្លេមេគង្គ ក្នុងខេត្តក្រចេះ កាលពីថ្ងៃទី ២ ខែមករា បានប្រកាសថា កម្ពុជានឹងបើកទទួលភ្ញៀវបរទេសពីគ្រប់តំបន់ដោយមិនមានការរើសអើង។ លោកបានបន្ថែមថា នេះជាឱកាសដ៏ល្អរបស់កម្ពុជា និងប្រទេសក្នុងតំបន់ក្នុងការស្រូបទាញភ្ញៀវទេសចរដ៏ច្រើនពីប្រទេសចិន។
ទិន្នន័យក្រសួងទេសចរណ៍ ឱ្យដឹងថា ក្នុងឆ្នាំ ២០២២ កម្ពុជាទទួលបានភ្ញៀវទេសចរអន្តរជាតិប្រមាណជិត ២,២៨ លាននាក់ កើនឡើង ១ ០៥៩ ភាគរយធៀបឆ្នាំ ២០២១៕
