លោកអុិត សំហេង ពេលចូលរួមពិធីបុណ្យចូលឆ្នាំខ្មែរជាមួយពលករនៅកូរ៉េពីថ្ងៃទី ១៦ មេសា។ រូបថត ក្រសួងការងារ
ភ្នំពេញៈ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ លោក អ៊ិត សំហេង បានថ្លែងថា ប្រជាពលរដ្ឋខ្មែរប្រមាណជាង ៦ ម៉ឺននាក់ ដែលបាននិងកំពុងធ្វើការនៅប្រទេសកូរ៉េ បានផ្ញើប្រាក់មកគ្រួសារជាមធ្យមពី ៥០០ ទៅជិត ៦០០លានដុល្លារ ជារៀងរាល់ឆ្នាំ ដែលនេះជាការរួមចំណែកជួយគ្រួសាររបស់ពួកគេផង និងចូលរួមជួយអភិវឌ្ឍសេដ្ឋកិច្ចជាតិផងដែរ។
លោក អ៊ិត សំហេង បានថ្លែងបែបនេះ នៅក្នុងឱកាសដែលលោកអញ្ជើញជាអធិបតី ក្នុងពិធីបុណ្យចូលឆ្នាំថ្មី ប្រពៃណីជាតិខ្មែរមហាសង្ក្រាន្តកូរ៉េ រៀបចំធ្វើឡើងនៅទីក្រុងអឹយចុងប៊ូ នៃសាធារណរដ្ឋកូរ៉េ នាព្រឹកថ្ងៃទី ១៦ ខែមេសា ឆ្នាំ ២០២៣។ លោកបន្ថែមថា ពលករខ្មែរ ដែលបានទៅធ្វើការប្រទេសកូរ៉េ បានចំនួនប្រមាណជាង ៤ ម៉ឺននាក់ក្នុងចំណោមប្រជាជនខ្មែរដែលរស់នៅ និងធ្វើការនៅប្រទេសកូរ៉េសរុបជាង៦ម៉ឺននាក់។
លោកមានប្រសាសន៍ថា៖ «នៅឆ្នាំ ២០២៣ នេះ ដោយសារតែពលករខ្មែរយើង ខិតខំធ្វើការងារកន្លងទៅបានល្អបានធ្វើឱ្យការវាយតម្លៃរបស់ពលករខ្មែរយើង ឈរនៅលំដាប់ថ្នាក់ទី ១ ក្នុងចំណោមពលករមកពីប្រទេសផ្សេងទៀត ដែលបាននិងកំពុងធ្វើការនៅកូរ៉េនេះ។ ភាគីកូរ៉េ បានសន្យានឹងបង្កើនចំនួនពលករ ១ ម៉ឺននាក់បន្ថែមទៀត ឬលើសពីនេះ ដែលនេះជាព័ត៌មានដ៏ល្អបំផុតសម្រាប់បងប្អូនពលករយើង»។
លោកបានសង្កត់ធ្ងន់ថា ក្នុងចំណោមពលករចំណាកស្រុកទៅធ្វើការនៅក្រៅប្រទេស មានតែមកកូរ៉េទេ ដែលទទួលបានប្រាក់ខែខ្ពស់ជាងគេ។ ម្យ៉ាងវិញទៀត ដោយសារតែការធ្វើការនៅប្រទេសកូរ៉េ ជាការងារដែលមានជំនាញខ្ពស់ផងនោះ ពលករខ្មែរទាំងអស់មិនត្រឹមតែអាចរកប្រាក់ចំណូលបានទេប៉ុន្តែគួរគប្បីសិក្សារៀនសូត្រ លើជំនាញវិជ្ជាជីវៈនៅទីនេះបន្ថែម ដើម្បីអាចទទួលបានឱកាសការងារ ពេលត្រឡប់ទៅខ្មែរវិញ ឬសន្សំថវិកាបានខ្លះ ដើម្បីអាចបើកមុខរបរដោយខ្លួនឯងបាន។
បើតាមលោក អ៊ិត សំហេង រាជរដ្ឋាភិបាលកម្ពុជា បានបង្កើនទំនាក់ទំនងជាមួយសាធារណរដ្ឋកូរ៉េតាំងពីឆ្នាំ ១៩៩៧ មក ដោយបានជំរុញឱ្យកិច្ចសហប្រតិបត្តិការកម្ពុជា កូរ៉េ មានការរីកចម្រើនល្អណាស់។
លោកបានបញ្ជាក់ថា៖ «ក្រៅពីការពង្រឹងសហប្រតិបត្តិការលើវិស័យសេដ្ឋកិច្ច សង្គមកិច្ច វិស័យនយោបាយផ្សេងៗរវាងកម្ពុជាកូរ៉េ ប្រមុខរាជរដ្ឋាភិបាល តែងតែបានយកចិត្តទុកដាក់ខ្លាំងណាស់ ក្នុងការបើកឱកាសទីផ្សារការងារឱ្យខ្មែរយើងមកកូរ៉េ»។
លោក អន ប៊ុនហាក់ ប្រធានសមាគមទីភ្នាក់ងារហត្ថពលកម្មកម្ពុជា បានឱ្យដឹងនៅថ្ងៃទី ១៧ ខែមេសាថា ពលរដ្ឋកម្ពុជាភាគច្រើនមានចំណាប់អារម្មណ៍ខ្លាំងក្នុងការធ្វើការនៅប្រទេសកូរ៉េ ព្រោះប្រទេសនេះបានផ្តល់ប្រាក់បៀវត្សរ៍ច្រើន ជាងប្រទេសដទៃទៀត ដល់ពលករបរទេស។
លោកថ្លែងថា៖« យើងឃើញបងប្អូនពលករយើងជាច្រើន ដែលគាត់បានចាប់ផ្តើមអាជីវកម្មផ្ទាល់ខ្លួនក្រោយពីត្រឡប់មកពីកូរ៉េវិញ ជាពិសេសអ្នកនៅផ្នែកកសិកម្ម ដូចជាការដាំដុះបន្លែតាមបែបទំនើប និងធម្មជាតិជាដើម។ ពួកគាត់បានប្រើចំណេះជំនាញ និងបទពិសោធន៍ ដែលបានពីការធ្វើការ និងយល់ដឹងនៅប្រទេសកូរ៉េ មកអនុវត្តនៅស្រុកកំណើត។ ជាការពិតណាស់ ប្រាក់ចំណូលរបស់ពលករកម្ពុជាយើងបានរួមចំណែកក្នុងការអភិវឌ្ឍសេដ្ឋកិច្ចគ្រួសារ និងសង្គមផងដែរ»។
លោក អន ប៊ុនហាក់ ឱ្យដឹងទៀតថា ពលរដ្ឋកម្ពុជាទៅធ្វើការនៅប្រទេសកូរ៉េ ទទួលបានប្រាក់ចំណូលច្រើន និងទទួលបានបទពិសោធន៍ការងារដោយកន្លងទៅមានពលករកូរ៉េជាច្រើន មានជីវភាពធូរធារ និងមានដើមទុន ដើម្បីចាប់ផ្តើមអាជីវកម្មខ្លួនឯង នៅពេលវិលត្រឡប់មកពីកម្ពុជាវិញ៕
