ភ្នំពេញៈ កម្ពុជាបានស្នើឱ្យក្រុមហ៊ុន Aircraft Maintenance and Engineering Cooperation (AMECO) ពិចារណាពីការវិនិយោគនៅក្នុងប្រទេសកម្ពុជា ខណៈវិស័យអាកាសចរស៊ីវិលនៅកម្ពុជាកំពុងមានការរីកចម្រើន។
ការស្នើនេះត្រូវបានធ្វើឡើងនៅក្នុងដំណើរទស្សនកិច្ចរបស់លោក ម៉ៅ ហាវណ្ណាល់ រដ្ឋមន្ត្រីទទួលបន្ទុករដ្ឋលេខាធិការដ្ឋានអាកាសចរស៊ីវិល ទៅក្រុមហ៊ុន AMECO ដែលមានមូលដ្ឋាននៅទីក្រុងប៉េកាំង ប្រទេសចិនកាលពីថ្ងៃទី ២៦ ខែមេសា។ នេះបើតាម លោក ស៊ិន ចាន់សេរីវុត្ថា អនុរដ្ឋលេខាធិការ និងជាអ្នកនាំពាក្យនៃរដ្ឋលេខាធិការដ្ឋានអាកាសចរស៊ីវិល ដែលបានប្រាប់ភ្នំពេញប៉ុស្តិ៍ កាលពីថ្ងៃទី ២៧ ខែមេសា។
ក្នុងដំណើរទស្សនកិច្ចនោះ លោក ហាវណ្ណាល់ បានជួបពិភាក្សាជាមួយលោក NI Jiliang ប្រធានក្រុមប្រឹក្សាភិបាលរបស់ក្រុមហ៊ុន AMECO និងស្វែងយល់លើដំណើរការ និងប្រតិបត្តិការអាជីវកម្មលើការងារថែទាំជួសជុលអាកាសយាន និងវិស្វកម្មអាកាសយាន។
លោក ចាន់សេរីវុត្ថា បាននិយាយថា ភាគីកម្ពុជាបានលើកសំណើដល់ក្រុមហ៊ុន AMECO និងក៏បានអញ្ជើញក្រុមហ៊ុនដើម្បីធ្វើការសិក្សាលទ្ធភាពនៃការវិនិយោគ និងបង្កើតរោងជាងជួសជុលថែទាំអាកាសយាននៅកម្ពុជា ដោយមូលដ្ឋានដែលក្រុមហ៊ុនអាចធ្វើការវិនិយោគនោះគឺស្ថិតក្នុងអាកាសយានដ្ឋានអន្តរជាតិសៀមរាបអង្គរថ្មីតែម្តង ស្របពេលព្រលានយន្តហោះនេះគ្រោងនឹងចាប់ផ្តើមបើកដំណើរការជាផ្លូវការក្នុងខែតុលាខាងមុខ។
លោកបានថ្លែងថា៖ «ជាមួយវត្តមានរោងជាងជួសជុលថែទាំ និងវិស្វកម្មអាកាសយានខ្នាតអន្តរជាតិដែលមានការទទួលស្គាល់ជាសកលនៅកម្ពុជា នឹងអាចនាំឱ្យមានការរីកចម្រើនផ្នែកសេដ្ឋកិច្ច និងជាពិសេសជួយជំរុញឱ្យវិស័យអាកាសចរស៊ីវិលនៅកម្ពុជារីកចម្រើនថែមទៀត។ លើសពីនេះយើងក៏អាចឈានដល់ការប្រកួតប្រជែងជាមួយប្រទេសក្នុងតំបន់ផងដែរ»។
បើយោងតាមលោក ចាន់សេរីវុត្ថា ជាមួយសំណើដែលបានលើកឡើង គឺ AMECO នឹងបញ្ជូនក្រុមបច្ចេកទេសមកសិក្សាលទ្ធភាពនៃការបង្កើតរោងជាងជួសជុល និងថែទាំអាកាសយាននៅអាកាសយានដ្ឋានអន្តរជាតិសៀមរាបអង្គរ (ថ្មី) នាពេលខាងមុខ។
លោក ចាន់សេរីវុត្ថា ឱ្យដឹងទៀតថា បច្ចុប្បន្នក្រុមហ៊ុន AMECO មានបុគ្គលិកសរុប ១១ ០០០ នាក់ និងមានផ្តល់សេវាទាក់ទងនឹងវិស័យអាកាសចរណ៍ដូចជា Aircraft Line Maintenance, Aircraft Overhaul, PTF Conversion, Aircraft Engine Overhaul, Landing Gear Services, Cabin Solutions, Engineering Services, Aircraft Component Services។
កាលពីថ្ងៃទី ២៥ មេសា ឆ្នាំ ២០២៣ រដ្ឋលេខាធិការដ្ឋានអាកាសចរស៊ីវិលកម្ពុជា និងអាកាសចរស៊ីវិលចិន បានចុះហត្ថាលេខាលើកិច្ចព្រមព្រៀងកិច្ចសហប្រតិបត្តិការស្តីពីការពង្រឹងសុវត្ថិភាពហោះហើររួមគ្នា។
ជាមួយគ្នានោះដែរ កម្ពុជាក៏បានស្នើភាគីចិនឱ្យបង្កើនចំនួនជើងហោះហើរត្រង់រវាងប្រទេសទាំង ២ យ៉ាងហោចណាស់ ៣០០ ជើងក្នុង ១ សប្តាហ៍ដើម្បីជួយសម្រួលដល់ការដឹកអ្នកដំណើររវាងប្រទេសទាំង ២។
ក្នុងឆ្នាំ ២០២២ កម្ពុជាទទួលបានភ្ញៀវអន្តរជាតិ ២,២៨ លាននាក់ កើន ១ ០៥៩ ភាគរយធៀបឆ្នាំ ២០២១។ នេះបើតាមក្រសួងទេសចរណ៍៕