ទិន្នផលទុរេននៅស្រុកសំឡូត ខេត្តបាត់ដំបងកន្លងមក។ រូបថត សហការី
បាត់ដំបងៈ ក្រុមបណ្តុំអាជីវកម្មទុរេនសំឡូត ខេត្តបាត់ដំបង បាននិងកំពុងប្រឹងប្រែងបង្កើនបច្ចេកទេសក្នុងការដាំដុះរបស់ខ្លួនទៅតាមការណែនាំពីក្រសួងនិងមន្ទីរកសិកម្ម បន្ទាប់ពីវិនិយោគិនចិនជាច្រើនក្រុមហ៊ុនបានជួប និងចរចាចង់ប្រមូលទិញទុរេនសំឡូតសម្រាប់នាំចេញទៅកាន់ប្រទេសចិននាពេលខាងមុខ។
លោក ណៃ ចន ប្រធានបណ្តុំអាជីវកម្មទុរេនសំឡូត ខេត្តបាត់ដំបងបានឱ្យដឹងនៅថ្ងៃទី ៩ ខែឧសភា ឆ្នាំ ២០២៣ ថា បណ្តុំអាជីវកម្មទុរេនសំឡូតបានជួបជាមួយនឹងក្រុមហ៊ុនច្រើនគួរសមដែរ ដែលក្រុមហ៊ុនទាំងនោះមានបំណងចង់នាំចូលទុរេនរបស់ស្រុកសំឡូតទាំងមូល ទៅលក់នៅទីផ្សារប្រទេសខ្លួន ប៉ុន្តែនៅមានឧបសគ្គខ្លះលើបរិមាណផ្គត់ផ្គង់ ដោយភាគីចិនបារម្ភខ្លាចខាងស្រុកសំឡូតផ្គត់ផ្គង់មិនបានតាមកិច្ចសន្យា។
លោក ណៃ ចន បានបញ្ជាក់ថា៖ «ខាងបណ្តុំអាជីវកម្មទុរេនសំឡូត និងខាងមន្ទីរកសិកម្មខេត្តបាត់ដំបងតែងតែពិភាក្សាគ្នាជាច្រើនដងទាក់ទងនឹងការនាំចេញទុរេនទៅចិននេះ ដោយកន្លងទៅ ចិន តែងសួរយើងថា តើយើងអាចផ្គត់ផ្គង់ទុរេនឱ្យគេក្នុង១ឆ្នាំបានប៉ុន្មាន?គេតម្រូវឱ្យយើងផ្តល់ទិន្នន័យលម្អិតឱ្យគេ ប៉ុន្តែយើងមានការព្រួយបារម្ភថា ប្រសិនបើយើងចុះកិច្ចសន្យាហើយ យើងមិនអាចផ្គត់ផ្គង់ឱ្យគេបានតាមកិច្ចសន្យា ដែលនេះហើយជាបញ្ហា»។
លោកបានបន្ថែមថា កាលពីពាក់កណ្តាលឆ្នាំ ២០២២ ខាងមន្ទីរកសិកម្មខេត្តបាត់ដំបងបាននាំខាងឈ្មួញជនជាតិថៃនិងចិន ចុះដល់ចម្ការទុរេនក្នុងបណ្តុំអាជីវកម្មទុរេនក្នុងឃុំសំឡូត ក្នុងគោលបំណងនាំចេញទុរេនទៅកាន់ប្រទេសចិនតាមរយៈទីផ្សារប្រទេសថៃ។ ក្រុមហ៊ុនចិននេះ មានការពេញចិត្តយ៉ាងខ្លាំងចំពោះរសជាតិ និងគុណភាពទុរេនសំឡូត។
លោកណៃ ចន បានបន្តថា ៖ «ចំពោះរសជាតិ និងគុណភាព យើងអាចធានាបានថា ទុរេនយើងមានគុណភាពល្អ ឆ្ងាញ់ ថែមទាំងមានការបញ្ជាក់ពីក្រសួងកសិកម្មទៀតផង ប៉ុន្តែចំពោះបរិមាណផ្គត់ផ្គង់ និងភូតគាមអនាម័យ គេទាមទារឱ្យយើងធ្វើឱ្យបានល្អប្រសើរជាង ដែលនេះវាទាមទារឱ្យមានការចំណាយដើមទុនច្រើន»។
បើតាមលោក ណៃ ចន បណ្តុំអាជីវកម្មទុរេនសំឡូត ក្នុងឃុំសំឡូតនេះ មានសមាជិកជាម្ចាស់ចម្ការចំនួនជិត២០ចម្ការ ដោយការប្រមូលផលក្នុង១ឆ្នាំ ចន្លោះ៣០០ទៅ៤០០តោន។
ជាមួយគ្នានេះ លោក ហេង សិទ្ធិ មន្ត្រីនៃមន្ទីរកសិកម្ម រុក្ខាប្រមាញ់ និងនេសាទ ខេត្តបាត់ដំបង បានឱ្យដឹងដែរថា ក្រសួង និងមន្ទីរកសិកម្មមានភារកិច្ចក្នុងការជួយរកទីផ្សារឱ្យកសិករ និងណែនាំឈ្មួញ ផលិតផលទុរេនសំឡូតនេះ។ លោកបន្តថា ដោយឡែកចំពោះការចរចាដែលនឹងឈានដល់ការនាំចេញ គឺវាអាស្រ័យទៅលើសហគមន៍ និងឈ្មួញ។
ចំពោះការដាំដុះទុរេនសំឡូតវិញ លោកបានប្រាប់ថា នៅខេត្តបាត់ដំបង មានតែស្រុកសំឡូតមួយប៉ុណ្ណោះ ដែលមានការដាំដុះទុរេន ដោយបច្ចុប្បន្នផ្ទៃដីដាំដុះទុរេនមានចំនួន៥៤៦ហិកតា ខណៈដែលផ្ទៃដីប្រមូលមានចំនួន៤១៧ហិកតា ដោយក្នុង១ហិកតាអាចប្រមូលបានជាង១២តោន។
លោកហេង សិទ្ធិ បានថ្លែងថា៖ «ការប្រមូលទុនរេនជារៀងរាល់ឆ្នាំមានបរិមាណជាង៥ ០០០តោន។ ចំពោះតម្លៃវិញចន្លោះ១៣ ០០០រៀលទៅ១៥ ០០០រៀល សម្រាប់ទុរេនដឹកចេញពីចម្ការទៅតាមប្រភេទទុរេននីមួយ។ ទុរេនពូជម៉ាន់ថងទឹកគោថ្លៃជាងគេ តែមិនសូវសម្បូរនោះទេ។ នៅដើមឆ្នាំនេះ ទុរេនមិនទាន់សម្បូរនៅឡើយទេ ទាល់ចុងខែ៦ ឬដើមខែ៧ ទើបសម្បូរច្រើន»។
ក្រសួងកសិកម្ម រុក្ខាប្រមាញ់ និងនេសាទ ធ្លាប់បានលើកឡើងថា មកទល់បច្ចុប្បន្ននេះ ប្រទេសកម្ពុជាពុំទាន់មានទីផ្សារទុរេននៅក្រៅប្រទេសនៅឡើយទេ ជាពិសេសប្រទេសចិនដែលកម្ពុជាពុំទាន់បានឈានទៅដល់ដំណាក់កាលនៃការចរចាបើករបាំងភូតគាមអនាម័យនៅឡើយ។
ម្យ៉ាងវិញទៀត ផលិតផលទុរេនរបស់កម្ពុជានៅមានកម្រិត ហើយក៏មានផលិតផលកសិកម្មជាច្រើនមុខទៀតរបស់កម្ពុជានៅរង់ចាំបន្តកន្ទុយគ្នាដើម្បីរង់ចាំការអនុញ្ញាតពីភាគីចិន ហើយខាងចិនអនុញ្ញាតឱ្យកម្ពុជាលើកយកផលិតផលកសិកម្មម្តងមួយមុខៗយកមកពិនិត្យ។ ទន្ទឹមនឹងនោះ ក៏ត្រូវរង់ចាំមើលបរិមាណនៃការផលិតនៅក្នុងស្រុកមានការកើនឡើងក្នុងកម្រិតណាដែរ៕
