បុរសម្នាក់ជិះម៉ូតូកាត់ពីមុខផ្សារមូលបត្រកម្ពុជា (CSX)។ ហេង ជីវ័ន
ភ្នំពេញៈ គ្រឹះស្ថានហិរញ្ញវត្ថុចំនួន ២ ដែលចុះបញ្ជីសញ្ញាបណ្ណសាជីវកម្មបានរាយការណ៍ពីភាពរឹងមាំនៃប្រាក់ចំណូលបានពីប្រតិបត្តិការអាជីវកម្មនៅក្នុងត្រីមាសទី ១ ឆ្នាំ ២០២៣ បើទោះបីសង្គ្រាមរវាងរុស្ស៊ី និងអ៊ុយក្រែន បានអូសបន្លាយពេលយូរ និងការកើនឡើងនៃអតិផរណាក៏ដោយ។
បើយោងតាមរបាយការណ៍ហិរញ្ញវត្ថុបានពីធនាគារភ្នំពេញពាណិជ្ជ (PPBBank) ដែលផ្ញើទៅផ្សារមូលបត្រកម្ពុជា (CSX) នៅថ្ងៃទី ១៨ ខែឧសភា គឺក្នុងត្រីមាសទី ១ ឆ្នាំ ២០២៣ ប្រាក់ចំណេញមុនពេលបង់ពន្ធមានចំនួន ២៧ ០៧៨ លានរៀល (២២ ភាគរយទាបជាងត្រីមាសទី ១ ឆ្នាំ ២០២២)។ ការធ្លាក់ចុះប្រាក់ចំណេញភាគច្រើនដោយសារការកើនឡើងការចំណាយលើការប្រាក់នៃប្រាក់បញ្ញើ។
នៅត្រីមាសទី ១ ឆ្នាំ ២០២៣ ប្រាក់ចំណេញសុទ្ធសម្រាប់រយៈពេលនេះមានចំនួន ២១ ២២៦ លានរៀល គឺ ២៣ ភាគរយតិចជាងកាលពីត្រីមាសទី ១ ឆ្នាំមុនដែលភាគច្រើនដោយសារតែការផ្លាស់ប្តូរដូចដែលបានលើកឡើងនៅក្នុងផ្នែកទី ៤ (ប្រាក់ចំណេញ[ខាត] មុនពេលវិភាគពន្ធ) ហើយ PPCBank បានកត់ត្រាការធ្លាក់ចុះប្រាក់ចំណូលការប្រាក់សុទ្ធចំនួន ៤៧ ៤៨៤ លានរៀលដែលតំណាងឱ្យទាបជាង ៩,៣ ភាគរយបើធៀបរយៈពេលដូចគ្នាក្នុងឆ្នាំ ២០២២។
ធនាគារនេះឱ្យដឹងទៀតថា ផលប៉ះពាល់សេដ្ឋកិច្ចដោយសារតែជម្លោះឆ្នាំ ២០២២ រវាងរុស្ស៊ី និងអ៊ុយក្រែន។ ជម្លោះ និងការដាក់ទណ្ឌកម្មនានាបានជះឥទ្ធិពលអវិជ្ជមានយ៉ាងខ្លាំងដល់ការស្ទុះងើបឡើងវិញនៃសេដ្ឋកិច្ចពិភពលោកក្នុងអំឡុងពេលវិបត្តិជំងឺកូវីដ ១៩។ បន្ថែមពីលើនេះការប្រកាសក្ស័យធនរបស់ធនាគារអាមេរិកនាពេលថ្មីៗនេះបានធ្វើឱ្យទីផ្សារចលាចល ដែលប៉ះពាល់ខ្លាំងលើគ្រឹះស្ថានហិរញ្ញវត្ថុដែលខ្សោយ ហើយកំពុងជម្នះនឹងផលវិបាកដោយយថាហេតុ ដោយសារតែការកើនឡើងអត្រាការប្រាក់ និងអត្រាអតិផរណាខ្ពស់។
លោក YIM Yong Taick ប្រធានធនាគារ PPCBank បានឱ្យដឹងក្នុងឯកសារនេះថា ឆ្នាំ ២០២៣ អាចជាឆ្នាំដ៏ពិបាកមួយផ្សេងទៀតទោះបីជាទើបតែរួចផុតពីការរីករាលដាលជំងឺកូវីដ ១៩ ក៏ដោយ។ លោកឱ្យដឹងថា ថ្មីៗនេះរដ្ឋាភិបាលបានទម្លាក់ការព្យាករកំណើនសេដ្ឋកិច្ចឆ្នាំ ២០២៣ ពី ៦,៦ ភាគរយ មកត្រឹម ៥,៦ ភាគរយ។
លោកលើកឡើងថា៖ «យើងនឹងបន្តពង្រីកវិសាលភាពរបស់យើងទៅកាន់អតិថិជនទូទាំងប្រទេស។ ដើម្បីបង្កើតប្រវត្តិប្រកបដោយជោគជ័យនៅអាស៊ីអាគ្នេយ៍ ផ្នែកឧស្សាហកម្មហិរញ្ញវត្ថុដោយការកសាងប្រព័ន្ធ IT ដែលអាចបត់បែនបាន និងមូលដ្ឋានឌីជីថលូបនីយកម្មក្នុងរយៈពេលខ្លី មានសុវត្ថិភាព និងបង្កើនសមត្ថភាពប្រកួតប្រជែងតាមរយៈការផ្លាស់ប្តូរក្នុងពាក់កណ្តាលអាណត្តិ»។
ចំណែកគ្រឹះស្ថានមីក្រូហិរញ្ញវត្ថុ ប្រាសាក់ ភីអិលស៊ី ដែលចុះបញ្ជីសញ្ញាបណ្ណសាជីវកម្មក៏បានរាយការណ៍ថា នៅត្រឹមចុងត្រីមាសទី ១ ឆ្នាំ ២០២៣ ទ្រព្យសកម្មរបស់ខ្លួនមានចំនួនសរុប ៥,១៥ ពាន់លានដុល្លារកើនឡើង ១៣,២០ ភាគរយបើធៀបទៅនឹងត្រីមាសដូចគ្នាឆ្នាំ ២០២២។ សមតុល្យប្រាក់បញ្ញើបានកើនឡើងដល់ ២,៨៣ ពាន់លានដុល្លារ ហើយផលបត្រកម្ចីសរុបមានចំនួនដល់ ៤,៥៣ ពាន់លានដុល្លារ។ ភាគហ៊ុនរបស់ម្ចាស់ភាគហ៊ុនក៏បានកើនឡើងផងដែរនិងបានកើនឡើងដល់ ៨៩១ លានដុល្លារ។ ដើមទុនចុះបញ្ជី ៤០០ លានដុល្លារក្នុងរយៈពេលរាយការណ៍។
លោក JUN Kwi Sang ប្រធានគ្រឹះស្ថានប្រាសាក់ បានឱ្យដឹងថា ក្នុងផ្នែកប្រតិបត្តិការហិរញ្ញវត្ថុប្រាសាក់ជាថ្មីម្តងទៀតបានបង្ហាញនូវការរីកចម្រើនយ៉ាងខ្លាំងលើគ្រប់ប៉ារ៉ាម៉ែត្រសំខាន់ៗរួមទាំងទ្រព្យសកម្មសរុបប្រាក់បញ្ញើ និងប្រាក់កម្ចីប្រាក់ចំណេញក៏ដូចជា បច្ចេកវិទ្យាហិរញ្ញវត្ថុផងដែរ។
លោកលើកឡើងថា៖ «យើងបានរៀនសូត្រច្រើនពីបញ្ហាប្រឈមនារយៈពេលប៉ុន្មានឆ្នាំមកនេះដែលធ្វើឱ្យប្រាសាក់ក្លាយជាគ្រឹះស្ថានមួយដ៏រឹងមាំ និងស្ថិរភាពសម្រាប់កំណើនប្រកបដោយនិរន្តរភាពរយៈពេល ២៧ ឆ្នាំ។ លទ្ធផលទាំងនេះត្រូវបានជំរុញដោយការអនុវត្តប្រកបដោយជោគជ័យនៃយុទ្ធសាស្ត្រអាជីវកម្មដ៏ត្រឹមត្រូវ ការផ្តល់ជូនផលិតផលហិរញ្ញវត្ថុ និងសេវាកម្មដែលសមស្របទៅនឹងអតិថិជនគោលដៅ»៕
