ភ្ញៀវទេសចរដែលបានទស្សនានៅប្រាសាទអង្គរវត្តកន្លងមក។ រូប SPM
ភ្នំពេញៈ ភ្ញៀវទេសចរបរទេសមកពីក្នុងតំបន់អាស៊ាន ៣ គឺ ថៃ វៀតណាម និងឡាវ ឈរនៅលំដាប់ខ្ពស់ជាងគេនៃការមកដល់ភ្ញៀវទេសចរបរទេសសរុបមកកាន់ប្រទេសកម្ពុជាចំនួនជិត ១,៣ លាននាក់នៅក្នុងត្រីមាសទី១ ឆ្នាំ ២០២៣។ នេះបើយោងតាមក្រសួងទេសចរណ៍។
របាយការណ៍របស់ក្រសួងទេសចរណ៍ឆ្នាំ ២០២៣ បង្ហាញថា គិតចាប់ពីខែមករា ដល់ខែមីនា ឆ្នាំ ២០២៣ កម្ពុជាទទួលបានភ្ញៀវអន្តរជាតិសរុប ជិត ១,៣ លាននាក់កើនឡើង ៧០៩,៥ ភាគរយបើធៀបនឹងរយៈពេលដូចគ្នាឆ្នាំ ២០២២ ដែលមានចំនួន ១៥៩ ៥៤៦ នាក់។ ក្នុងចំនួនខាងលើ គឺភ្ញៀវមកពីប្រទេសថៃមានច្រើនជាងគេ គឺ ៤២៤ ២៤១ នាក់ កើនឡើង ៩៧០,៩ ភាគរយ, វៀតណាមនៅលេខរៀងទី២ ចំនួន ២០៧ ៥២៧ នាក់ កើនឡើង ៣៤៨,២ ភាគរយ, និងប្រទេសឡាវ ស្ថិតនៅលេខ ៤ មានចំនួន ៦១ ៧០៩ នាក់ កើន ១៣ ១៧០,៨ ភាគរយ។ ចំនួនភ្ញៀវបរទេសមកពីប្រទេសទាំង ៣ គឺស្មើនឹង ៥៣,៦៩ ភាគរយនៃចំនួនភ្ញៀវបរទេសសរុបក្នុងត្រីមាសទី១។
ក្រៅពីប្រទេសជិតខាងទាំង ៣ គឺភ្ញៀវមកពីប្រទេសចិន ស្ថិតនៅចំណាត់ថ្នាក់លេខ ៤, មានចំនួន ១៣២ ៦៦៥ នាក់ និងពីលេខ ៥ ដល់លេខ ១០ មានដូចជា កូរ៉េខាងត្បូង, អាមេរិក, បារាំង, រុស្ស៊ី, ចក្រភពអង់គ្លេស និងឥណ្ឌូនេស៊ី។
ប្រធានសមាគមទេសចរណ៍អាស៊ីប៉ាស៊ីហ្វិកកម្ពុជា លោក ធួន ស៊ីណាន បានប្រាប់ ភ្នំពេញ ប៉ុស្តិ៍ នៅថ្ងៃទី ២៤ ខែឧសភាថា ទោះបីនៅពេលនេះវិបត្តិជំងឺកូវីដ ១៩ ដែលបានធ្វើឱ្យវិស័យទេសចរណ៍នៅគ្រប់ប្រទេសលើពិភពលោកធ្លាក់ចុះស្ទើរដល់សូន្យចន្លោះពីឆ្នាំ ២០២០-២០២២ បានបិទបញ្ចប់ស្ទើរទាំងស្រុងហើយក៏ដោយ ប៉ុន្តែវិបត្តិដែលកើតមានជាបន្តបន្ទាប់ដូចជាបញ្ហាជម្លោះភូមិសាស្ត្រនយោបាយ និងសង្គ្រាមរវាងប្រទេសរុស្ស៊ី និងអ៊ុយក្រែន មិនបានធ្វើឱ្យកំណើនសេដ្ឋកិច្ចពិភពលោកមានភាពរឹងមាំនោះទេ។ លោកបន្តថា សម្រាប់ប្រទេសកម្ពុជាភ្ញៀវទេសចរអន្តរជាតិបានចាប់កើនឡើងវិញជាបណ្តើរៗចាប់តាំងពីដើមឆ្នាំ ២០២២ មក ប៉ុន្តែភាគច្រើនគឺជាភ្ញៀវមកពីប្រទេសនៅជាប់ព្រំដែនប៉ុណ្ណោះ។
លោកថ្លែងថា៖ «ទោះកម្ពុជាបានប្រកាសបើកទទួលភ្ញៀវគ្រប់ជាតិសាសន៍ជាង ១ ឆ្នាំហើយក៏ដោយ ក៏ភ្ញៀវដែលចូលមកធ្វើទេសចរណ៍នៅកម្ពុជា គឺមានភាគច្រើនសុទ្ធតែមកពីប្រទេសជិតខាង និងក្នុងតំបន់តែប៉ុណ្ណោះ»។
ប្រធានសមាគមមគ្គុទ្ទេសក៍ទេសចរអង្គរ លោក ខៀវ ធី ឱ្យដឹងថា បើទោះបីចំនួនជើងហោះហើរពីបរទេសមកកម្ពុជាបានកើនឡើងវិញច្រើនបើធៀបនឹងរយៈពេលប៉ុន្មានឆ្នាំកន្លងមក ប៉ុន្តែចំនួនភ្ញៀវបរទេសដែលមកទស្សនានៅតាមប្រាសាទនានាក្នុងខេត្តសៀមរាប គឺនៅមានចំនួនតិចតួចនៅឡើយបើធៀបនឹងមុនពេលមានវិបត្តិកូវីដ ១៩។ លោកបន្តថា ភាគច្រើននៃភ្ញៀវបរទេស គឺជាក្រុមភ្ញៀវមកពីប្រទេសថៃ និងវៀតណាម ខណៈភ្ញៀវទេសចរជនជាតិចិន ដែល មានចំនួនច្រើនជាងគេមុនពេលមានវិបត្តិកូវីដ ១៩ គឺនៅមានចំនួនតិចតួចនៅឡើយ។
លោកលើកឡើងថា៖ «ភាគច្រើននៃភ្ញៀវទេសចរបរទេសមកកម្ពុជា គឺមកពីប្រទេសថៃ និងវៀតណាម ដោយសារតែការធ្វើ ដំណើររបស់ពួកគេមានភាពងាយស្រួល ហើយអាចធ្វើបានទាំងតាមផ្លូវគោក និងអាកាស។ វិស័យទេសចរកម្ពុជាត្រូវការពេលបន្ថែមទៀតដើម្បីអាចស្រូបយកភ្ញៀវមកពីប្រទេសឆ្ងាយៗ»។
ឆ្នាំ ២០១៩ គឺជាពេលដែលកម្ពុជាទទួលបានភ្ញៀវអន្តរជាតិច្រើនបំផុត ដោយមានចំនួនជាង ៦,៦ លាននាក់។ ក្នុងនោះភ្ញៀវមកពីប្រទេសជាប់ព្រំប្រទល់ទាំង ៣ មានសរុបជាង ១,៧ លាននាក់ ស្មើនឹង ២៦,៣១ ភាគរយនៃចំនួនសរុប។ ឆ្នាំ ២០២២ កម្ពុជាទទួលបានភ្ញៀវទេសចរអន្តរជាតិ ប្រមាណជិត ២,២៨ លាននាក់ កើនឡើងជាង ១ ពាន់ភាគរយបើធៀបនឹងឆ្នាំ ២០២១។ នេះបើតាមក្រសួងទេសចរណ៍៕
