ផ្សារមូលបត្រកម្ពុជាមានទំហំមូលធនូបនីយកម្មនៃទីផ្សារមូលបត្រកម្មសិទ្ធិប្រហែល ១,៨៨ ពាន់លានដុល្លារ។ រូបថត ហុង មិនា
ភ្នំពេញៈ ទោះទទួលរងផលប៉ះពាល់ពីការធ្លាក់ចុះនៃសេដ្ឋកិច្ចសកល បញ្ហាជំងឺឆ្លងសកល និងការឡើងកម្តៅនៃភូមិសាស្ត្រនយោបាយ ក៏ការជួញដូរនៅតែមានសម្ទុះល្អប្រសើរ ដោយមូលធនូបនីយកម្មទីផ្សារសរុបនៃទីផ្សារមូលបត្រកម្មសិទ្ធិមានតម្លៃប្រហែល ១,៨៨ ពាន់លានដុល្លារគិតត្រឹមចុងត្រីមាសទី១ ឆ្នាំ ២០២៣។
យោងតាមរបាយការណ៍ប្រតិបត្តិទិន្នន័យជួញដូរមូលបត្ររបស់និយ័តករមូលបត្រកម្ពុជា (SERC) ចេញផ្សាយកាលពីថ្ងៃទី ២៩ ខែឧសភា គឺមានទំហំជួញដូរភាគហ៊ុនសរុបមានចំនួន ៥ ៤៧០ ១៧៨ ភាគហ៊ុន ដែលទំហំជួញដូរនៅទីផ្សារគោលមានប្រហែល ៩០,៤៥ ភាគរយ និងទីផ្សារកំណើន ៩,៥៥ ភាគរយនៃទំហំជួញដូរសរុប។ ចំពោះទីផ្សារមូលបត្របំណុលគឺពុំមានការជួញដូរលើសញ្ញាបណ្ណសាជីវកម្មណាមួយទេ។
លោក ស៊ូ សុជាតិ អគ្គនាយកនៃនិយ័តករមូលបត្រកម្ពុជា (SERC) ប្រាប់ ភ្នំពេញ ប៉ុស្តិ៍ នៅថ្ងៃទី ៣០ ខែឧសភាថា ក្នុងស្ថានភាពប្រឈមនៃភាពមិនប្រាកដប្រជារបស់កំណើនសេដ្ឋកិច្ចសកល ដំណើរការជួញដូរនៅលើផ្សារមូលបត្រកម្ពុជា (CSX) គឺបានទទួលរងផលប៉ះពាល់ពីឥទ្ធិពលនេះតិចតួច ដោយសកម្មភាពនៃការជួញដូរនៅដំណើរការល្អជាធម្មតា ប៉ុន្តែបរិមាណនៃការជួញដូរ គឺហាក់មានទំហំតូចៗជាងមុន។
លោកថ្លែងថា៖ «ទោះបីមានការថមថយថ្លៃលើទីផ្សារបន្តិចក៏ដោយ ប៉ុន្តែការចូលរួមទិញលក់នៅតែមានដំណើរការជាប្រក្រតី ដែលនេះជាចំណុចល្អរបស់ទីផ្សារយើង។ ប៉ុន្តែយើងបានសង្កេតឃើញថា ការទិញរបស់អ្នកទិញមានលក្ខណៈតូចៗ ដោយសារការសហការចូលរួមគ្រប់ភាគីពាក់ព័ន្ធ។ យើងបានជំរុញឱ្យអ្នកវិនិយោគចូលមកទីផ្សារច្រើនបើទោះបីការទិញក្នុងម្នាក់ៗតិចជាងមុនក្តី ហេតុដូច្នេះហើយទើបធ្វើឱ្យទំហំទិញសរុបច្រើន»។
លោកបន្ថែមថា ជាមួយនឹងការចូលរួមពីវិនិយោគិនច្រើនជាហេតុធ្វើឱ្យទំហំនូបនីយកម្មនៃទីផ្សារកាន់តែកើនធំ ពិសេសគឺការចូលរួមរបស់ក្រុមហ៊ុន ខេមជ្ជីអេសអឹម និងក្រុមហ៊ុន គួច ម៉េងលី នឹងធ្វើឱ្យទំហំទីផ្សារកាន់តែធំបន្ថែមទៀតនាពេលខាងមុខ។
លោក ហុង សុហួរ អគ្គនាយក CSX បានប្រាប់ថា ទំហំជួញដូរបានទទួលរងផលប៉ះពាល់នៃស្ថានភាពសេដ្ឋកិច្ច និងភាពតានតឹងនៃបញ្ហាភូមិសាស្ត្រនយោបាយ។
លោកលើកឡើងថា៖ «បើសិនយើងមិនទទួលរងផលប៉ះពាល់នេះខ្លះៗទេ យើងអាចនឹងមានទំហំជួញដូរច្រើនជាងនេះ។ យើងសង្កេតឃើញថា មានចំនួនប្រមាណជាង ៣០ ម៉ឺនដុល្លារក្នុង ១ ថ្ងៃ»។
លោកអះអាងថា ក្នុងរយៈពេលប៉ុន្មានខែមកនេះ ចំនួនអ្នកចូលមកថ្មីទទួលបានអ្នកទិញថ្មីច្រើនៗដែលភាគច្រើនជាអ្នកវិនិយោគរយៈពេលយូរ និងបានចូលរួមទិញលក់ក្នុង ១ ថ្ងៃនៅក្នុងរង្វង់ ៣-៤ ពាន់នាក់ ខណៈអ្នកបើកគណនីថ្មីក្នុង ១ ខែមានប្រមាណ ១ ពាន់នាក់។
លោកប្រាប់ថា៖ «ការណ៍នេះផ្តល់ក្តីសង្ឃឹមដល់យើងដោយរំពឹងថា ការជួញដូរនឹងខ្លាំងជាងឆ្នាំមុនទោះបីមានផលប៉ះពាល់ពីការធ្លាក់ចុះសេដ្ឋកិច្ចសកល និងបញ្ហាភូមិសាស្ត្រនយោបាយក៏ដោយ»។
កាលពីថ្ងៃទី ១៩ ខែមករា ឆ្នាំ ២០២៣ មានការចុះបញ្ជីថ្មី ១ ក្រុមហ៊ុនទៀតនៅទីផ្សារមូលបត្របំណុល គឺក្រុមហ៊ុន ហ្គោលដេនទ្រី ខណៈក្រុមហ៊ុនធំៗ ២ ទៀតគឺ ក្រុមហ៊ុនទូរស័ព្ទចល័ត ខេម ជ្ជីអេសអេម និងក្រុមហ៊ុន ម៉េងលី ជេ គួច អេឌ្យូខេសិនគ្រោងនឹងធ្វើការបោះផ្សាយមូលបត្រកម្មសិទ្ធិរបស់ខ្លួននៅចុងខែមិថុនាខាងមុខ៕
