.jpg)
លោក UENO Atsushi ឯកអគ្គរាជទូតជប៉ុនថ្មីប្រចាំកម្ពុជា និងលោក គង់ វិបុល ក្នុងជំនួបពិភាក្សាកាលពីថ្ងៃទី ២៩ ខែឧសភា។ រូបថត GTD
ភ្នំពេញៈ អគ្គនាយកនៃអគ្គនាយកដ្ឋានពន្ធដារ លោក គង់ វិបុល បានស្នើឱ្យភាគីជប៉ុនជួយពន្លឿនដំណើរការចរចាកិច្ចព្រមព្រៀងស្ដីពីការចៀសវាងការយកពន្ធត្រួតគ្នា (DTA) រវាងព្រះរាជាណាចក្រកម្ពុជា និងជប៉ុន ឱ្យបានឆាប់ ខណៈក្នុងឆ្នាំ ២០២២ ទំហំពាណិជ្ជកម្មរវាងកម្ពុជា ជប៉ុន មានទឹកប្រាក់សរុប ១ ៩៤៨,០២ លានដុល្លារ កើនឡើង ១២,៣ ភាគរយធៀបឆ្នាំ ២០២១។
ក្នុងជំនួបពិភាក្សាជាមួយនឹងលោក UENO Atsushi ឯកអគ្គរាជទូតជប៉ុនថ្មីប្រចាំកម្ពុជា នៅអគ្គនាយកដ្ឋានពន្ធដារ កាលពីថ្ងៃទី ២៩ ខែឧសភា លោក គង់ វិបុល បានលើកឡើងពីកិច្ចសហការដ៏ល្អរវាងរដ្ឋាភិបាល និងប្រជាជននៃប្រទេសទាំង ២ ជាពិសេសរដ្ឋាភិបាល និងប្រជាជនជប៉ុនដែលតែងតែផ្តល់កិច្ចគាំទ្រ និងផ្តល់កិច្ចសហប្រតិបត្តិការល្អជាមួយកម្ពុជា ពិសេសជំនួយបច្ចេកទេស តាមរយៈទីភ្នាក់ងារសហប្រតិបត្តិការអន្តរជាតិនៃប្រទេសជប៉ុន (JICA) ដល់អគ្គនាយកដ្ឋានពន្ធដារដោយផ្ដោតទៅលើការអភិវឌ្ឍសមត្ថភាព និងធនធានមនុស្សរបស់អគ្គនាយកដ្ឋានពន្ធដារ តាំងពីឆ្នាំ ២០០៤ មក។
លោកក៏បានលើកឡើងពីវឌ្ឍនភាពថ្មីៗ និងវិធានការលើកទឹកចិត្តរបស់រដ្ឋាភិបាលកម្ពុជាដើម្បីស្ដារ និងជំរុញកំណើនសេដ្ឋកិច្ចតាមរយៈការប្រើប្រាស់ប្រព័ន្ធបច្ចេកវិទ្យាក្នុងការផ្តល់សេវាជូនអ្នកជាប់ពន្ធ និងការយកចិត្តទុកដាក់របស់អគ្គនាយកដ្ឋានពន្ធដារចំពោះវិនិយោគិនជប៉ុន ដោយផ្តល់កិច្ចសហការគ្រប់ជ្រុងជ្រោយនៅក្នុងការដោះស្រាយបញ្ហាប្រឈមនានាពាក់ព័ន្ធនឹងពន្ធដារទៅដល់សមាគមពាណិជ្ជកម្មកម្ពុជា-ជប៉ុន (JBAC)។ ក្នុងពេលជាមួយគ្នានេះ លោក វិបុល ក៏បានស្នើភាគីជប៉ុនឱ្យជួយពន្លឿនដំណើរការចរចាលើកិច្ចព្រមព្រៀងស្ដីពីការចៀសវាងការយកពន្ធត្រួតគ្នា (DTA) រវាងប្រទេសទាំង ២ ផងដែរ។
លោកលើកឡើងថា៖ «សូមស្នើភាគីជប៉ុនជួយពន្លឿនដំណើរការចរចាកិច្ចព្រមព្រៀងស្ដីពីការចៀសវាងការយកពន្ធត្រួតគ្នា (DTA) រវាងព្រះរាជាណាចក្រកម្ពុជា និងជប៉ុនឱ្យបានលឿន»។
អ្នកជំនាញសេដ្ឋកិច្ចនៃរាជបណ្ឌិត្យសភាកម្ពុជា លោក ហុង វណ្ណៈ បានប្រាប់ភ្នំពេញប៉ុស្តិ៍នៅថ្ងៃទី ១ ខែមិថុនាថា ជាទូទៅប្រទេសដែលមានទំនាក់ទំនងពាណិជ្ជកម្មល្អជាមួយគ្នា គឺតែងតែចង់ឱ្យមានកិច្ចព្រមព្រៀងស្តីពីការចៀសវាងការយកពន្ធត្រួតគ្នា (DTA) ព្រោះកិច្ចព្រមព្រៀងនេះនឹងជួយលើកទឹកចិត្ត និងជំរុញឱ្យមានចរន្តនៃការនាំចេញ-នាំចូលទំនិញរវាងប្រទេសដៃគូកាន់តែសកម្ម និងឆាប់រហ័ស។ លោកបន្តថា កិច្ចព្រមព្រៀងនេះក៏អាចជួយទាក់ទាញអ្នកវិនិយោគឱ្យទៅបណ្តាក់ទុនផ្ទាល់ក្នុងប្រទេសដៃគូទាំង២ដើម្បីអាចនាំចេញទំនិញក្រោមលក្ខខណ្ឌពិសេសផងដែរ។
លោកបានបន្តថា ជប៉ុនជាប្រទេសរីកចម្រើន និងមានសេដ្ឋកិច្ចរីកចម្រើន ដូច្នេះនៅពេលកិច្ចព្រមព្រៀងនេះលេចចេញជារូបរាង វានឹងទាក់ទាញវិនិយោ-គិនជប៉ុនឱ្យចូលមកបណ្តាក់ទុនផ្ទាល់នៅកម្ពុជាកាន់តែច្រើន និងនាំបច្ចេកវិទ្យាថ្មីមកកម្ពុជាផងដែរ។
លោកបានបញ្ជាក់ថា៖ «ក្រៅពីមានទំនាក់ទំនងការទូតល្អ ប្រទេសកម្ពុជា-ជប៉ុន ក៏ជាសមាជិកនៃកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ (RCEP) ផងដែរ ដូច្នេះបើសិនប្រទេសទាំង ២ មានកិច្ចព្រមព្រៀងស្ដីពីការចៀសវាងការយកពន្ធត្រួតគ្នាថែមទៀតនោះ ខ្ញុំជឿថា ទឹកប្រាក់ផ្លាស់ប្តូរពាណិជ្ជកម្ម និងការវិនិយោគផ្ទាល់របស់ជប៉ុននៅកម្ពុជា ប្រាកដជានឹងហក់ឡើងខ្ពស់នាពេលអនាគត»។
យោងតាមលោក វណ្ណៈ បច្ចុប្បន្នក្រៅពីខិតខំក្នុងការបង្កើតទំនាក់ទំនងល្អជាមួយបណ្តាប្រទេសនានាលើពិភពលោក រដ្ឋាភិបាលកម្ពុជាក៏បានធ្វើកំណែទម្រង់ក្នុងប្រទេសផងដែរដូចជា ប្រព័ន្ធច្បាប់វិនិយោគ ការពង្រឹងសមត្ថភាពកម្លាំងពលកម្ម និងកសាងហេដ្ឋារចនាសម្ព័ន្ធជាច្រើន ដើម្បីធ្វើជាគ្រឹះសម្រាប់ការអភិវឌ្ឍសេដ្ឋកិច្ចសង្គម។
យោងអគ្គនាយកដ្ឋានពន្ធដារគិតត្រឹមចុងខែកុម្ភៈ ឆ្នាំ ២០២២ កម្ពុជាបានចុះហត្ថលេខាលើកិច្ចព្រមព្រៀងស្ដីពីការចៀសវាងការយកពន្ធត្រួតគ្នាចំនួន ១១ ប្រទេស/តំបន់រួចមកហើយ ដែលរួមមាន សិង្ហបុរី, ចិន, ប្រ៊ុយណេ, ថៃ, ឥណ្ឌូនេស៊ី, វៀតណាម, តំបន់រដ្ឋបាលពិសេសហុងកុង, ម៉ាឡេស៊ី, សាធារណរដ្ឋកូរ៉េ, តំបន់រដ្ឋបាលពិសេសម៉ាកាវ និងតួកគី។ ទន្ទឹមនឹងនេះ កម្ពុជាក៏កំពុងចរចា DTA ជាមួយប្រទេសដៃគូមួយចំនួន ដូចជា ជប៉ុន ហ្វីលីពីន ឡាវ និងអេមីរ៉ាតអារ៉ាប់រួម ជាដើម។
ធនាគារជាតិនៃកម្ពុជា (NBC) បានឱ្យដឹងថា គិតត្រឹមចុងឆ្នាំ ២០២១ ជប៉ុន គឺជាប្រទេសដែលមកវិនិយោគផ្ទាល់នៅកម្ពុជាច្រើនជាងគេលំដាប់ទី ៥ ដោយមានទឹកប្រាក់ ២,៤ ពាន់លានដុល្លារ តាមពីក្រោយប្រទេសចិន, កូរ៉េ, សិង្ហបុរី និងវៀតណាម។
ទិន្នន័យពីអគ្គនាយកដ្ឋានគយ និងរដ្ឋាករកម្ពុជា ឱ្យដឹងថា ក្នុងឆ្នាំ ២០២២ ទំហំពាណិជ្ជកម្មទ្វេភាគីកម្ពុជា ជប៉ុន មានទឹកប្រាក់សរុប ១ ៩៤៨,០១៩ លានដុល្លារ កើន ១២,៣ ភាគរយបើធៀបឆ្នាំ ២០២១ ក្នុងនោះការនាំទំនិញពីកម្ពុជាទៅជប៉ុន ១ ១៧៣,០៣ លានដុល្លារ កើន ៧,៣ ភាគរយ និងនាំចូល ៧៧៤,៩៨៩ លានដុល្លារកើនឡើង ២១ ភាគរយ។
ទោះយ៉ាងណា វិបត្តិសេដ្ឋកិច្ចពិភពលោកដែលកំពុងបន្តកើតមាននាពេលនេះបានធ្វើឱ្យការផ្លាស់ប្តូរពាណិជ្ជកម្មរវាងប្រទេសទាំង ២ ធ្លាក់ចុះគួរឱ្យកត់សម្គាល់។ ទិន្នន័យបានឱ្យដឹងថា ក្នុងរយៈពេល ៤ ខែដើមឆ្នាំ ២០២៣ ពាណិជ្ជកម្មរវាងកម្ពុជា-ជប៉ុន មានទឹកប្រាក់សរុប ៥៧៣,១ លានដុល្លារ ធ្លាក់ចុះ ៩,៨ ភាគរយធៀបរយៈពេលដូចគ្នាឆ្នាំ ២០២២។ ក្នុងចំណោមទឹកប្រាក់ខាងលើ គឺកម្ពុជានាំទៅជប៉ុន ៣៧១,៥៩ លានដុល្លារ ធ្លាក់ចុះ ៤,៥ ភាគរយ និងជប៉ុននាំចូល ២០១,៥១ លានដុល្លារ ធ្លាក់ចុះ ១៨,២ ភាគរយ៕
