ភ្នំពេញៈ លោកនាយក​រដ្ឋមន្ត្រី ហ៊ុន សែន បាន​ថ្លែងថា ស្ត្រី​បាន​ដើរតួ​យ៉ាងសំខាន់​លើ​វិស័យសេដ្ឋកិច្ច​ទាំង​ក្នុង​ប្រព័ន្ធ និង​សេដ្ឋ​កិច្ច​ក្រៅ​ប្រព័ន្ធ ហើយ​ពេញចិត្ត​ចំពោះ​ការ​វិ​វ​ឌ្ឍ​សមត្ថភាព​របស់​ស្ត្រី​នៅ​កម្ពុជា ជា​ពិសេស​សហគ្រិន​ជាច្រើន គឺជា​ស្ត្រី នាពេល​បច្ចុប្បន្ន​។​

​លោកនាយក​រដ្ឋមន្ត្រី​បាន​ថ្លែង​បែបនេះ នៅក្នុង​ពិធី​ប្រគល់​សញ្ញាបត្រ ជូន​និស្សិត​បញ្ចប់​ការសិក្សា​ពី​សាកលវិទ្យាល័យ​ភូមិន្ទ​​នីតិសាស្ត្រ និង​វិទ្យាសាស្ត្រ​សេដ្ឋកិច្ច ថ្ងៃទី​ ៥ ខែមិថុនា ឆ្នាំ​ ២០២៣ នៅក្នុង​រាជធានី​ភ្នំពេញ​។​

​លោកថ្លែងថា​៖ «​យើង​បាន​សង្កេតឃើញថា ស្ត្រី​ដើរតួនាទី​ក្នុង​បញ្ហា​សេដ្ឋកិច្ច​នេះ​ធំ​ណាស់ វា​ជា​ចំណែក​នៃ​ការទទួលខុសត្រូវ​នៅក្នុង​សង្គម​គ្រួសារ ហើយ​ទម្លាប់​ដែលថា ពេល​មាន​ប្តី​ហើយ​ត្រូវតែ​ពឹងពាក់​លើ​លុយ​របស់​ប្តី ឥឡូវនេះ​មិនអាច​ដូច​ពីមុន​បានទេ ព្រោះ​ស្ត្រី​គេ​ក៏មាន​ប្រាក់​បៀ​វត្ស​រ៍ដែរ កុំ​សូវ​មើលស្រាល​គេ​ពេក​»​។​

​លោកនាយក​រដ្ឋមន្ត្រីថ្លែងថា​៖ «​ពី​ដើម​វប្បធម៌​ពឹងផ្អែក​ទៅលើ​ប្តី ឥឡូវនេះ​វប្បធម៌​មិនមែន​យ៉ាង​ដូច្នេះ​ទេ​។ យើង​នៅក្នុង​ចំណោម​សេដ្ឋកិច្ច​ទាំង​ក្នុង​ប្រព័ន្ធ ទាំង​ក្រៅ​ប្រព័ន្ធ​ស្ត្រី​បាន​ដើរតួនាទី​សំខាន់​ណាស់ យើង​ក៏ត្រូវ​ផ្តោត​ការយកចិត្តទុកដាក់​ជំរុញ​បន្តទៀត លើកទឹកចិត្ត​ឱ្យ​ស្ត្រី​ទទួលបាន​នូវ​ការបណ្តុះបណ្តាល បើ​មិន​ទទួលបាន​នូវ​ការបណ្តុះបណ្តាល​ក្នុង​ប្រព័ន្ធ​ទេ ក៏​ទទួលបាន​នូវ​ការបណ្តុះបណ្តាល​ក្រៅ​ប្រព័ន្ធ ដែល​យើង​នឹង​ផ្តល់ឱកាស​សម្រាប់​ស្ត្រី​»​។​

​លោកស្រី កែវ មុំ ប្រធាន​សមាគម​សហ​គ្រិន​ស្ត្រី និង​ជា​ម្ចាស់​សហគ្រាស​ផលិត​នំ​ស្រួយ​លី​លីបាន​ប្រាប់​ឱ្យដឹងថា បច្ចុប្បន្ននេះ ស្ត្រី​ដែលជា​ម្ចាស់​អាជីវកម្ម មាន​ច្រើនជាង​បុរស ដែល​នេះ​សបញ្ជាក់​ឱ្យឃើញថា ការចូលរួម​របស់​ស្ត្រី​នៅក្នុង​សេដ្ឋកិច្ច​ក្នុង និង​ក្រៅ​ប្រព័ន្ធ មាន​ភាព​សកម្ម​ខ្ពស់​។​

​លោកស្រី​បាន​បន្ថែមថា កន្លងទៅ​រាជ​រដ្ឋាភិបាល​កម្ពុជា តាមរយៈ​ក្រសួង​ស្ថាប័ន​នានា បាន​សម្របសម្រួល​ច្រើន​ដល់​ស្ត្រី​ក្នុងការ​បង្កើត​អាជីវកម្ម​ផ្ទាល់ និង​មានការ​លើកទឹកចិត្ត​ទាំង​ផ្នែក​ពន្ធដារ និង​ការ​​បណ្តុះបណ្តាល​ច្រើន​គួរឱ្យកត់សម្គាល់​។​

​លោកស្រីថ្លែងថា​៖ «​ស្ត្រី​យើង​នៅតែ​ជួបប្រទះ​នឹង​បញ្ហា​មួយចំនួន​ផងដែរ ជា​ពិសេស​ពាក់ព័ន្ធ​នឹង​ការទទួលខុសត្រូវ​ក្នុង​គ្រួសារ ដោយ​ស្ត្រី​មាន​ការងារ​ច្រើន​ខាងក្រៅ​ហើយ ត្រូវធ្វើ​ការងារ​ក្នុងផ្ទះ​ទៀត ដែល​ធ្វើឱ្យ​ពេលខ្លះ គាត់​ត្រូវ​ខកខាន​ការ​ចូលរួម​ក្នុងសង្គម​»​។​

​សមាគម​សហគ្រិន​ស្ត្រី​កម្ពុជាបាន​បញ្ជាក់ថា បច្ចុប្បន្ននេះ ចំនួន​ស្ត្រី​ដែលមាន​អាជីវកម្ម​ក្នុង​ដៃ ទាំង​សេដ្ឋកិច្ច​ក្នុង​ប្រព័ន្ធ និង​សេដ្ឋកិច្ច​ក្រៅ​ប្រព័ន្ធ មាន​ចំនួន​ ៦០ ​ភាគរយ ខណៈដែល​បុរស​មាន​ត្រឹមតែ​ ៤០ ​ភាគរយ​ប៉ុណ្ណោះ​។​

​លោក ប៉ិច បូ​ឡែ​ន អគ្គនាយក​ក្រុមហ៊ុន វេស​ឡាញ អេ​ឌ្យូ​ខេ​សិន គ្រុប ក៏បាន​ថ្លែង​ឱ្យដឹង​ដែរ​ថា ក្រៅពី​មាន​តួនាទី​ជា​ម្តាយ​ដ៏​ល្អ​លើ​ការងារ​គ្រប់គ្រង​និង​ថែទាំ​ក្រុម​​គ្រួសារ ស្ត្រី​គឺជា​ដៃគូ​សហការ និង​ដើរតួនាទី​យ៉ាងសំខាន់​ក្នុងការ​រួមចំណែក​អភិ​​វ​ឌ្ឍ​សេដ្ឋកិច្ច​គ្រួសារ និង​សង្គមជាតិ​។

​លោកថ្លែងថា​៖ «​ខ្ញុំ​ឃើញ​ម្ចាស់​អាជីវកម្ម​ធុន​តូច និង​មធ្យម​ភាគច្រើន​ស្ត្រី​ជា​អ្នក​គ្រប់​គ្រង និង​ដឹកនាំ ដូចជា​ការលក់​ចាប់ហួយ​ម្ហូប អាហារ​សម្លៀក​បំពាក់មុខ​របរ​កសិកម្ម​និង​សម្ភារ​ផ្សេងៗ​ទៀត​លើសពីនេះ​រួមទាំង​ការងារ​ចាត់ចែង​ការចំណាយ​ផ្សេងៗ​ក្នុង​ក្រុមគ្រួសារ​ផងដែរ​។ ជាក់ស្តែង​នៅ​បណ្តាញ​គ្រឹះស្ថាន​អប់រំ​វេស​ឡាញ​អេ​ឌ្យូ​ខេ​សិន​គ្រុប​មាន​បុគ្គលិក​ជា​ស្ត្រី​ជិត​ ៧០​ ភាគរយ​បាននិងកំពុង​ដើរតួ​យ៉ាងសំខាន់​ក្នុង​ការជួយ​គាំទ្រ និង​អភិវឌ្ឍ​សាលារៀន​»៕