ភ្នំពេញៈ​ សមា​គម​ធនាគារ​នៅ​កម្ពុជា​បាន​ជូន​ដំណឹង​ដល់​សា​ធារណជន​ឱ្យ​មាន​ការប្រុង​ប្រយ័ត្ន​ខ្ពស់​ចំពោះ​ព័ត៌មាន​ផ្ទាល់​ខ្លួន​ ដោយ​សារ​​បាន​កត់​សម្គាល់​ឃើញ​ថា ​ថ្មីៗ​នេះ​មាន​ការ​កើន​ឡើង​នូវ​សារ​ក្លែង​បន្លំតាម​ប្រព័ន្ធ​ទូរ​ស័ព្ទ ​(SMS Phis​hing) ជា​មួយ​នឹង​តំណ​ភ្ជាប់​បោក​បញ្ឆោត​ (Frau​dul​ent Link) ដើម្បី​ទទួល​បាន​ព័ត៌​មាន​សម្ងាត់​។​

​តាម​រយៈ​សេចក្តី​ជូន​ដំណឹង​របស់​សមា​គម​ធនា​គារ​នៅ​កម្ពុជាស្ដី​អំពី​សារ​ក្លែងបន្លំ​តាម​ប្រព័ន្ធ​ទូរ​ស័ព្ទ​(SMS Scam)​ដែល​បានចេ​ញ​ផ្សាយ​កាលពី​ថ្ងៃទី​៤ ​ខែមិថុនា ​ឆ្នាំ​២០២៣​ បាន​បញ្ជាក់​ថា ៖ «​ប្រសិន​បើ​លោក​អ្នក​ទទួល​បា​ន​តំណ​ភ្ជាប់​ដែល​មាន​កា​រសង្ស័យ ​សូមកុំ​ចុច​បើក​ ឬ​បំពេញ​ព័ត៌​មាន​របស់​លោក​អ្នក ​រួម​មាន​៖ លេខ​ទូរ​ស័ព្ទ​, លេខ​គណនី​, លេខ PIN, លេខ​កូដ​សម្ងាត់ ​ទិន្ន​ន័យ​ផ្ទាល់​ខ្លួន​»​។

​ប្រភព​ដដែល​ថា ក្នុង​ករណី​លោក​អ្នក​បាន​ចុច​បើក​ ឬ​បំពេញ​លើ​តំណ​ភ្ជាប់​ដែល​មាន​ការ​សង្ស័យ​ទាំង​អ​ស់នោះ​ហើយ សូម​ទាក់​ទង​ទៅកា​ន់​ធនា​គារ​ដែល​លោក​អ្នក​ប្រើ​ប្រាស់​សេវា​ជា​បន្ទាន់​តាម​រយៈ​លេខ​ទំនាក់​ទំន​ង(Hotline) ឬ លេខ​ទំនាក់​ទំនង​អតិថិ​ជន (Toll-Free)​របស់​គ្រឹះ​ស្ថាន​។​

​សមា​គម​ធនាគា​រ​នៅ​កម្ពុជា បាន​បញ្ជាក់​ទៀត​ថា ​ដោយសា​រ​ចំនួន​សារ​ក្លែង​បន្លំ​តាម​ប្រព័​ន្ធទូរ​ស័ព្ទ ​(SMS Phishing) ឬ​តាម​បច្ចេក​វិទ្យា​អ៊ី​ន​ធឺ​ណិត ​មាន​ការរីក​រាល​ដាល និង​មាន​ភាព​ស្មុគស្មាញ​ សមាគម​បានស្នើ​​ឱ្យមាន​ការប្រុង​ប្រយ័ត្ន​ខ្ពស់​នូវ​ព័ត៌មាន​ផ្ទាល់​ខ្លួន​។ ជន​បន្លំ​បោក​ប្រាស់​អាច​ចូល​ទៅ​បញ្ជាក្នុង​កម្មវិធី​ទូរ​ស័ព្ទ​ដៃ ឬ ប្រតិប​ត្តិការ​ធនា​គារ​តាម​អ៊ី​ន​ធឺណិ​ត(Internet Banking) របស់​លោក​អ្នក​បាន ​ប្រសិន​បើ​លោកអ្ន​ក​មិនបានការពារ​លេខ PIN_​ឬ​លេខ​កូដ​សម្ងាត់បាន​ល្អ​ទេនោះ​ ទោះបីជា​​លោក​អ្នក​មាន​វិធាន​សន្តិ​សុខ​រឹងមាំ​ក្នុងការ​ការ​ពារ​យ៉ាង​ណា​ក៏​ដោយ​។​

​សមា​គម​ដដែល​នេះក៏បាន​អំពាវ​នាវ​ឱ្យ​អតិថិ​ជនកុំ​មា​នការ​ស្ទាក់ស្ទើ​រ​ក្នុងការ​សាក​សួរ​ព័ត៌មាន​ជាមួយ​គ្រឹះស្ថាន​ធនា​គារ​ដែល​បាន​និ​ងកំពុង​ប្រើប្រា​ស់​សេវា​ទាក់​ទង​នឹង​គន្លឹះ​ខ្លីៗ​ពី​របៀប​​រក្សា​គណនី​ឱ្យមាន​សុវត្ថិភា​ព និង​ចែករំ​លែក​សេចក្ដី​ជូន​ដំណឹង​នេះ​ជា​មួយ​គ្រួសារ​សាច់​ញាតិ និងមិត្ត​ភក្តិ​ផង​ដែរ​។​

​លោក​ អ៊ិន ចាន់នី ប្រធាន​នាយក​ប្រតិ​បត្តិ​ធនា​គារ ​អេស៊ីលីដា​ បាន​ឱ្យដឹង​​នៅ​ថ្ងៃទី​៦ ​ខែមិថុនា ថា សារ​ក្លែង​បន្លំតាម​ប្រព័ន្ធ​ទូរ​ស័ព្ទ ជា​មួយ​នឹង​តំណ​ភ្ជាប់​បោក​បញ្ឆោត ដើម្បី​ទទួលបា​ន​ព័ត៌មា​ន​សម្ងាត់​នេះបាន​កើត​មាន​ជា​យូរ​មក​ហើយ ​ដែល​មិន​ត្រឹម​តែ​កើតមា​ន​នៅ​កម្ពុជា​ទេ គឺ​កើ​តមាន​នៅតាម​បណ្តា​ប្រទេស​ជាច្រើន​ទៀតផ​ង​ដែរ​។

​លោក​បាន​បន្ថែម​ថា ​ជាទូទៅ​ស្ថាប័​ន​ធនាគារ​ ឬក៏​គ្រឹះ​ស្ថាន​ហិរញ្ញ​វត្ថុ​ តែងតែ​ណែនាំ​ដល់​អតិថិ​ជនជារឿយៗ​​អំពីកា​រដាក់​ពាក្យ​សម្ងាត់ ឬ​ការ​ចៀស​វាង​ចែក​រំលែក​ព័ត៌​មាន​សម្ងាត់​របស់​ខ្លួន​ទៅ​អ្នក​ដទៃ​ដើម្បី​កុំឱ្យ​ចាញ់​បោក​ជន​ខិល​ខូច​។​

​លោក​បានប​ញ្ជាក់​ថា​៖«​ការ​ផ្តល់​ព័ត៌មាន​ផ្ទាល់​ខ្លួន​ដល់​ជន​មិន​ស្គាល់មុ​ខ តាមរ​យៈ​ការ​Call,SMS ,Internet bank, ឬក៏​Email ជា​ដើម​នោះ ​វា​ដូច​ជា​ការ​បើក​ឱកាស​ជ​ន​ខិល​ខូច​ អាច​លួច​យក​ព័ត៌​មាន​របស់​យើង​បាន​ដូច្នេះ​ដែរ​។ ដូចនេះ​ទាំង​អតិថិ​ន​ជន ​និង​ស្ថា​ប័ន​ធនា​គារ​ត្រូវ​តែមា​ន​ការ​ផ្ទៀង​ផ្ទាត់​ឱ្យ​បាន​ញឹក​ញាប់​»​។​

«​ចំពោះ​ធនា​គារ​អេស៊ី​លីដា តាំ​ងពី​កកើត​ធនាគារ​មក​ យើង​មិន​ទាន់​មានការ​Hack ចូលក្នុង​ប្រព័ន្ធ​របស់​យើង ឬ​គណនី​របស់​អតិថិ​ជន​យើង​នោះ​ទេ ​ហើយក៏​កម្រ​មាន​អតិថិ​ជន ​ចាញ់បោក​ជន​ខិលខូ​ច​ដែរ ព្រោះ​យើង​រំឭក​អតិថិ​ជន​របស់​យើង​ជា​ទៀង​ទាត់...»​។ ​លោក ​អ៊ិន ​ចាន់នី ​បញ្ជាក់​បន្ថែម​។​

​ចំណែកលោ​ក កាំ​ង តុង​ងី អ្នក​នាំពា​ក្យ​សមាគម​មីក្រូហិរ​ញ្ញវត្ថុបាន​ឱ្យដឹង​ដែរ​ថា នៅ​ក្នុង​វិស័យ​ហិរ​ញ្ញវត្ថុ ទម្រង់​នៃ​ការ​ក្លែង​បន្លំ (Scam)ខុសពី​វិស័យ​ធនា​គារដោយ​សារតែ​គ្រឹះ​ស្ថាន​មីក្រូ​ហិរ​ញ្ញវត្ថុ​ភា​គច្រើន​ផ្តោត​លើ​កា​រផ្តល់​ឥណ​ទាន​ដោយ​មិន​សូវ​មាន​ជា Mobile​ banking​ នោះ​ទេ លើ​កលែ​ងតែ​គ្រឹះស្ថាន​មីក្រូហិរ​ញវត្ថុ​ទទួល​អ្នក​ប្រាក់​បញ្ញើ​ចំនួន​៥​ប៉ុណ្ណោះ​។​

​លោក​បាន​បញ្ជាក់​បន្ថែ​ម​​ថា​៖«​កន្លង​មក​ដោយ​សារតែទំហំ​អតិថិ​ជន​ដែល​ប្រើប្រាស់​Mo​bile banking នៅក្នុង​វិស័យ​ហិរញ្ញ​វត្ថុ​នៅ​មាន​កម្រិត​នៅឡើ​យ អ៊ី​ចឹ​ង​ហើយ​បានជា​ក្រុម​បោក​ប្រាស់​ទាំង​អស់​នោះ ​មិនទាន់​យក​អតិថិ​ជន​នៅក្នុ​ង​វិស័យ​​មីក្រូហិ​រញ្ញវត្ថុ​ជា​គោល​ដៅ​បោក​ប្រាស់​នៅឡើ​យ​ទេ​»​។​

​ទោះជា​​យ៉ាង​ក៏ដោយ​ តាម​រយៈ​បទ​ពិសោធ​ន៍​ដែល​វិស័យ​ធនាគារ​បាន​ជួប​ប្រទះលើ​បញ្ហា​នេះ ​លោក កាំ​ង តុង​ងី បញ្ជាក់​ថា គ្រឹះស្ថា​ន​មីក្រូហិ​រញ្ញ​វត្ថុ​ ដែល​ទទួល​​ប្រាក់​បញ្ញើ ឬ​ការផ្ត​ល់សេ​វា​ធនាគារ​តាម​ទូរស័ព្ទ​នេះ​គឺ​បាន​ភ្ជាប់​ប្រព័ន្ធ​ ដែល​មាន​ភាព​រឹង​មាំ ដើម្បី​ការពារ​ការ​ជ្រៀត​ចូល ​រួមទាំង​ការ​អប់រំ​អតិថិ​ជន​ឱ្យមាន​ការប្រុង​ប្រយ័ត្ននិង​តាម​ដាន​ជាប្រចាំ​ចំពោះ​ប្រតិ​បត្តិការ​ណាដែលមា​ន​ភាព​សង្ស័យ​ផង​ដែរ​៕