សេចក្តីជូនដំណឹងពីការតាំងពិព័រណ៍ផលិផលសក្តានុពលរបស់ខេត្តកោះកុង ចំនួន ៤៤ មុខ។ រូបថត រដ្ឋបាលខេត្តកោះកុង
កោះកុងៈ ផលិផលសក្តានុពលរបស់ខេត្តកោះកុង ចំនួន ៤៤ មុខ នឹងត្រូវដាក់តាំងបង្ហាញក្នុងពិព័រណ៍ទេសចរណ៍ផ្លែឈើ និងផលិតផលភូមិ ១ ផលិតផល ១ ជាលើកទី១ នៅមុខសាលាខេត្តកោះកុង ក្នុងរយៈពេល ២ ថ្ងៃ គឺពីថ្ងៃទី១៧ និង ១៨ ខែមិថុនា ឆ្នាំ ២០២៣ ខាងមុខនេះ ដើម្បីរួមចំណែកផ្សព្វផ្សាយពីផលិតផលរបស់កសិករក្នុងខេត្តឱ្យបានទូលំទូលាយ និងក៏ដើម្បីចូលរួមអបអរសាទរបុណ្យចម្រើនព្រះជន្ម សម្តេចព្រះមហាក្សត្រី នរោត្ដម មុនិនាថ សីហនុ ព្រះវររាជមាតាជាតិខ្មែរផងដែរ។
លោក អន សុធារិទ្ធ អភិបាលរងខេត្តកោះកុង បានប្រាប់ឱ្យដឹងនៅថ្ងៃទី១២ ខែមិថុនាថា ការរៀបចំតាំងពិព័រណ៍នេះ គឺដើម្បីជំរុញចលនាភូមិ១ផលិតផល១ ដោយខេត្តកោះកុង នឹងតាំងបង្ហាញផលិតផលកសិកម្ម ដែលមានសក្តានុពលចំនួន៤៤មុខរបស់ខេត្ត នៅក្នុងពិព័រណ៍នេះ។
លោកបានថ្លែងថា៖ «យើងរៀបចំកម្មវិធីនោះ ក្នុងគោលដៅដើម្បីជំរុញ និងផ្សព្វផ្សាយពីផលិតផលរបស់បងប្អូនប្រជាកសិករ សហគមន៍ ម្ចាស់សហគ្រាស ទូទាំងខេត្ត នៅលើទីផ្សារឱ្យបានទូលំទូលាយ។ ដូចយើងដឹងស្រាប់ហើយ ខេត្តកោះកុងមានផលិតផលកសិកម្ម ដែលមានភាពល្បីល្បាញច្រើនណាស់ ដូចជា សាវម៉ាវស្រែអំបិល,មង្ឃុត និងទុរេន ផងដែរ ដោយភ្ញៀវទេសចរ មកកម្សាន្តនៅខេត្តយើង មិនដែលមើលរំលងលើផលិតផលនេះឡើយ»។
លោកបន្ថែមថា គណៈកម្មាធិការជំរុញចលនាភូមិ១ផលិតផល១ នៃខេត្តកោះកុង បានរៀបចំស្តង់ប្រមាណ២០ស្តង់ សម្រាប់ដាក់តាំងបង្ហាញ និងលក់ផលិតផល ផ្លែឈើ និងផលិតផល ដែលផលិតបាន ក្នុងមូលដ្ឋានរបស់ខេត្តឱ្យបានច្រើន ខណៈដែលប្រជាពលរដ្ឋទាំងអស់ អាចចូលរួមទស្សនា និងភ្លក្សផ្លែឈើដោយឥតគិតថ្លៃ និងជួយទិញនូវផ្លែឈើ ក៏ដូចជាផលិតផលដទៃទៀត។
លោកបញ្ជាក់ដូច្នេះថា៖«យើងរំពឹងថា ព្រឹត្តិការណ៍តាំងពិព័រណ៍នេះ នឹងរួមចំណែកធ្វើឱ្យទីផ្សារផលិតផលសក្តានុពលរបស់ខេត្ត កាន់តែមានភាពទូលំទូលាយ ក៏ដូចជាទាក់ទាញអ្នកទេសចរមកពីគ្រប់ទិសទី មកភ្លក្សរសជាតិផលិតផលផ្លែឈើក្នុងខេត្តរបស់យើង ថាមានឱជារសឆ្ងាញ់ប៉ុនណា»។
លោកស្រី កែវ មុំ ប្រធានសមាគមសហគ្រិនស្ត្រីកម្ពុជា បានសាទរចំពោះការរៀបចំពិព័រណ៍ទេសចរណ៍ផ្លែឈើ និងផលិតផលភូមិ១ ផលិតផល១របស់ខេត្តកោះកុងនាពេលខាងមុខនេះ ដោយលោកស្រីបញ្ជាក់ថា វត្តមានស្រ្តីជាម្ចាស់សិប្បកម្ម ឬសហគ្រាស ដែលបានបើកអាជីវកម្មក្នុងខេត្តកោះកុងមានច្រើនគួរសម។
លោកស្រីបានបញ្ជាក់ថា៖«វាជាការបង្កើតទីផ្សារថ្មីៗសម្រាប់ផលិតផលក្នុងស្រុក ព្រោះមានផលិតផលខ្លះដែលយើងផលិតបានមកហើយ ប៉ុន្តែប្រជាជនយើងខ្លះគាត់មិនទាន់បានស្គាល់។ ខ្ញុំគាំទ្រឱ្យខេត្តនីមួយៗ មានរៀបចំការតាំងពិព័រណ៍បែបនេះ កាន់តែច្រើន កាន់តែល្អ ព្រោះវាជាការរួមចំណែកលើកស្ទួយផលិតផលក្នុងស្រុកយើងមួយកម្រិតទៀត»។
សូមជម្រាបថា ផលិតផលសក្តានុពល របស់ខេត្តកោះកុង ដែលផលិតដោយក្រុមកសិករ សមាគម-សហគមន៍កសិកម្ម សហគ្រាសនានា រួមមានដូចជា បន្លែសុវត្ថិភាព មាន់ស្រែ ផ្លែឈើ ត្រី បង្គាក្រៀម កាពិ ទឹកត្រីបុកកោះកុង ទឹកឃ្មុំតំបន់ឆ្នេរ នំអន្សម នំចាក ជាដើម។
សូមរំឭកផងដែរថា តាមរយៈសារលិខិតអបអរសាទរទិវាជាតិលើកកម្ពស់ការប្រើប្រាស់ផលិតផលខ្មែរ លើកទី៦ ឆ្នាំ២០២៣ កាលពីខែមេសា កន្លងទៅនេះ លោកនាយករដ្ឋមន្រ្តី ហ៊ុន សែន បានធ្វើការបានអំពាវនាវដល់ក្រសួង ស្ថាប័ននិងអ្នកពាក់ព័ន្ធទាំងអស់ បន្តជំរុញការផលិត ការកែច្នៃផលិតផលខ្មែរ និងស្វែងរកទីផ្សារជូនផលិតករឱ្យបានទូលំទូលាយ ដើម្បីឱ្យស្របតាមទស្សនទានចលនាភូមិ១ ផលិតផល១។
លោកបានធ្វើការវាយតម្លៃខ្ពស់ចំពោះកិច្ចខិតខំប្រឹងប្រង របស់គណៈកម្មាធិការជាតិជំរុញ ចលនាភូមិ១ផលិតផល១ ក្រសួងពាណិជ្ជកម្ម ស្ថាប័នពាក់ព័ន្ធ និងគណៈកម្មាធិការជំរុញចលនាភូមិ១ផលិតផល១ រាជធានី ខេត្តទាំង២៤ ដែលបានសហការគ្នាយ៉ាងប្រទាក់ក្រឡា ក្នុងការលើកកម្ពស់ផលិតផលខ្មែរ និងដោះស្រាយនូវបញ្ហាប្រឈមសំខាន់ៗជាច្រើនក្នុងវិស័យផលិតកម្ម និងសេវាកម្ម។
លោកនាយករដ្ឋមន្រ្តី បញ្ជាក់ថា ៖ «ពេលវេលាប្រមាណ៣០ឆ្នាំមុន ដែលរាជរដ្ឋាភិបាលបានហែលឆ្លងស្ថានភាពដ៏លំបាកលំបិនមួយ ដែលស្ថានភាពពេលនោះគឺដៃម្ខាងត្រូវខិតខំបញ្ចប់សង្គ្រាម ស្វែងរកសុខសន្តិភាព និងដៃម្ខាងទៀតគឺប្រឹងកសាងស្តារឡើងវិញ និងអភិវឌ្ឍប្រទេស រហូតឈានដល់ការសម្រេចបាននូវការបញ្ចប់សង្គ្រាមបានទាំងស្រុង ក្រោមនយោបាយ ឈ្នះ ឈ្នះ ដែលនាំប្រទេសជាតិកម្ពុជា ឆ្ពោះទៅរកការអភិវឌ្ឍលើគ្រប់វិស័យ»៕
