ទិដ្ឋភាពនៅទីតាំងកំពង់ផែពហុបំណងក្នុងខេត្តកំពង់ឆ្នាំងនៅថ្ងៃទី២៧ មិថុនា ។ រូបថត ក្រសួងសាធារណការ
កំពង់ឆ្នាំងៈលោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានអះអាងថា កំពង់ផែពហុបំណងនិងមណ្ឌលភ័ស្តុភារកម្មកំពង់ឆ្នាំងគ្រោងនឹងដាក់ឱ្យដំណើរការនាពេលឆាប់ៗខាងមុខ ខណៈកំពង់ផែនេះ បានបំពាក់ប្រព័ន្ធបច្ចេកវិទ្យាឌីជីថលសម្រាប់គ្រប់គ្រងប្រតិបត្តិការដឹកជញ្ជូនទំនិញចូលកំពង់ផែក្នុងការធ្វើអាជីវកម្មរបស់វិស័យឯកជន លើកស្ទួយសេដ្ឋកិច្ច និងធានាការគ្រប់គ្រងចំណូលជូនជាតិបានកាន់តែប្រសើរ។
ការបញ្ជាក់របស់លោក ស៊ុន ចាន់ថុល បែបនេះធ្វើឡើងនៅក្នុងឱកាសដែលលោកចុះពិនិត្យទីតាំងសាងសង់កំពង់ផែពហុបំណង និងមណ្ឌលភ័ស្តុភារកម្មកំពង់ឆ្នាំង កាលពីថ្ងៃទី ២៦ ខែមិថុនា។
ថ្លែងប្រាប់អ្នកសារព័ត៌មាននាពេលនោះ លោក ស៊ុន ចាន់ថុល បានឱ្យដឹងថា បច្ចុប្បន្នកំពង់ផែពហុបំណង និងមណ្ឌលភ័ស្តុភារកម្មកំពង់ឆ្នាំង បានត្រៀមខ្លួនរួចរាល់សម្រាប់បើកប្រតិបត្តិការដឹកជញ្ជូន និងនាំចេញជាផ្លូវការ នាពេលឆាប់ៗខាងមុខ។
លោកបានបន្តថា កំពង់ផែននេះ បានបំពាក់ប្រព័ន្ធបច្ចេកវិទ្យាឌីជីថល សម្រាប់គ្រប់គ្រងប្រតិបត្តិការដឹកជញ្ជូនទំនិញចូលកំពង់ផែ ក្នុងការធ្វើអាជីវកម្មរបស់វិស័យឯកជន លើកស្ទួយសេដ្ឋកិច្ច និងធានាការគ្រប់គ្រងចំណូលជូនជាតិបានកាន់តែប្រសើរ។
លោក ស៊ុន ចាន់ថុល បានបញ្ជាក់ថា៖«នៅក្នុងកំពង់ផែពហុបំណង និងមណ្ឌលភ័ស្តុភារកម្មនេះ បានរៀបចំបំពាក់ឧបករណ៍បច្ចេកវិទ្យាបញ្ញាសិប្បនិម្មិត និងប្រព័ន្ធកត់ត្រារថយន្តដឹកជញ្ជូនដោយស្វ័យប្រវត្តិ Smart Truck Monitoring System (STM) ដែលមានលក្ខណៈងាយស្រួលសម្រាប់គ្របគ្រង តាមដាន និងត្រួតពិនិត្យរបាយការណ៍»។
លោករដ្ឋមន្ត្រី បានបន្ថែមទៀតថា ទំនើបកម្មប្រព័ន្ធបច្ចេកវិទ្យាឌីជីថល ក្នុងការគ្រប់គ្រងប្រតិបត្តិការដឹកជញ្ជូនទំនិញចូលកំពង់ផែមួយនេះបាននិងកំពុងនាំមកនូវប្រសិទ្ធភាពការងារ កាត់បន្ថយការដឹកជញ្ជូនលើសទម្ងន់កម្រិតដោយច្បាប់ជាពិសេសផ្តល់តម្លាភាពក្នុងការធ្វើអាជីវកម្មរបស់វិស័យឯកជន។
យោងតាមក្រសួងសាធារណការនិងដឹកជញ្ជូន ការបំពាក់ឧបករណ៍បច្ចេកវិទ្យាបញ្ញាសិប្បនិម្មិត និងប្រព័ន្ធកត់ត្រារថយន្តស្វ័យប្រវត្តិដឹកជញ្ជូននៅកំពង់ផែនេះឡើង ក្នុងបំណងជំរុញការដឹកជញ្ជូននិងនាំចេញកសិផលពីខេត្តកំពង់ឆ្នាំង ខេត្តពោធិ៍សាត់ ខេត្តបាត់ដំបង ខេត្តបន្ទាយមានជ័យ ខេត្តសៀមរាប និងខេត្តកំពង់ធំ ទៅកាន់ទីផ្សារជាតិនិងអន្តរជាតិតាមរយៈផ្លូវទឹក ដោយកាត់បន្ថយការចំណាយពេលវេលា និងសោហ៊ុយក្នុងការដឹកជញ្ជូនផងដែរ។
ពាក់ព័ន្ធនឹងកំពង់ផែនេះ លោក ស៊ុន សុវណ្ណារិទ្ធិ អភិបាលខេត្តកំពង់ឆ្នាំងបានបង្ហាញការគាំទ្រនិងស្វាគមន៍ចំពោះវត្តមានសមិទ្ធផលថ្មីៗរបស់លោកនាពេលខាងមុខ។
លោកបានបញ្ជាក់នៅថ្ងៃទី ២៧ ខែមិថុនាថា ៖ «យើងរំពឹងថា ប្រព័ន្ធកត់ត្រារថយន្តដឹកជញ្ជូនដោយស្វ័យប្រវត្តិ នឹងជួយកាត់បន្ថយការដឹកជញ្ជូនលើសកម្រិតកំណត់យ៉ាងមានប្រសិទ្ធភាព ជាពិសេសជួយជំរុញកំណើនសេដ្ឋកិច្ចជាតិឱ្យកាន់តែស្ទុះឡើងថែមទៀត»។
សូមរំឭកដែរថា កំពង់ផែពហុបំណង និងមណ្ឌលភ័ស្តុភារកម្មកំពង់ឆ្នាំងដែលមានទំហំវិនិយោគចន្លោះពី៣០០លានដុល្លារ-៥០០លានដុល្លារអាមេរិក គឺជាប៉ូលសេដ្ឋកិច្ចទី៤របស់កម្ពុជា បន្ទាប់ពីប៉ូលសេដ្ឋកិច្ចសំខាន់ៗទាំង៣ ដូចជា ប៉ូលសេដ្ឋកិច្ចភ្នំពេញ ប៉ូលសេដ្ឋកិច្ចព្រះសីហនុ និងប៉ូលសេដ្ឋកិច្ចសៀមរាប៕
