សហគមន៍ចំនួន ៤០ និងក្រុមផលិតចំនួន ៦ ក្នុងពិធីចុះអនុស្សរណៈយោគយល់ជាមួយគ្រឹះស្ថានមីក្រូហិរញ្ញវត្ថុ កាលពីថ្ងៃទី ២៧ ខែមិថុនា។ រូបថត រដ្ឋបាលខេត្តកំពង់ធំ
កំពង់ធំៈ សហព័ន្ធស្រូវអង្ករកម្ពុជា បានឱ្យដឹងថា នៅថ្ងៃទី ២៧ ខែមិថុនា កិច្ចសន្យាកសិកម្ម ត្រូវបានធ្វើឡើងដោយមានចំនួន ៤៦ កិច្ចសន្យា ដែលអនុវត្តដោយសហគមន៍ចំនួន ៤០ និងក្រុមផលិតចំនួន ៦ រួមទាំងអនុស្សរណៈយោគយល់ចំនួន ១ ជាមួយគ្រឹះស្ថានមីក្រូហិរញ្ញវត្ថុ ក្នុងការធានាការទូទាត់នៅពេលប្រមូលផល ដោយនឹងមានការប្រមូលទិញស្រូវចំនួនជិត ២ ម៉ឺនតោន និងបន្លែទៅតាមការប្រមូលផលជាក់ស្តែង។
សេចក្តីប្រកាសព័ត៌មាន របស់សហព័ន្ធស្រូវអង្ករកម្ពុជាបានឱ្យដឹងថា កិច្ចសន្យាទាំង ៤៦ ដែលបានធ្វើឡើងនាពេលនេះរួមមាន៖ កិច្ចសន្យាជាមួយក្រុមហ៊ុន AMRU Rice (Cambodia) Co.,Ltd មាន ២២ កិច្ចសន្យា ស្មើនឹង ៣ ០០០ តោនស្រូវ និងបន្លែ, ក្រុមហ៊ុន Signatures of Asia Co.,Ltd ចំនួន ៨ កិច្ចសន្យា ស្មើនឹង ៦ ៦៩០ តោន,ក្រុមហ៊ុន Kompong Thom Rice Mill ១៦៨៨ ចំនួន ៤ កិច្ចសន្យា ស្មើនឹង ២០២០ តោន។ ប្រភពដដែលបន្តថា ក្រុមហ៊ុន B.R.M Agro Co.,Ltd ចំនួន ២ កិច្ចសន្យាស្មើនឹង ២ ៩២៨ តោន,ក្រុមហ៊ុន Daily Fresh Food,រោងម៉ាស៊ីនកិនស្រូវ ជូ ផេង ចំនួន ២ កិច្ចសន្យា ស្មើនឹង ១ ១៨០ តោន និងរោងម៉ាស៊ីនកិនស្រូវ ងួន ហុង ចំនួន ៣ កិច្ចសន្យា ស្មើនឹង ១ ៨៤៥ តោន និងអនុស្សរណៈយោគយល់រវាងក្រុមហ៊ុន Signatures of Asia Co.,Ltd និងស្ថាប័នមីក្រូហិរញ្ញវត្ថុ AMK។
ក្នុងឱកាសអញ្ជើញជាអធិបតីនៃពិធីចុះកិច្ចសន្យានេះដែរ លោក ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទថ្លែងថា ទាំងខាងក្រសួងកសិកម្ម ធនាគារអភិវឌ្ឍន៍ជនបទ ក៏ដូចជាសហព័ន្ធស្រូវអង្ករកម្ពុជា និងភាគីពាក់ព័ន្ធជាច្រើនទៀត មានការយកចិត្តទុកដាក់ខ្លាំងណាស់ លើការធ្វើកិច្ចសន្យាកសិកម្មដើម្បីដោះស្រាយបញ្ហាទីផ្សារ។
លោកថ្លែងថា៖ «ការចុះកិច្ចសន្យាកសិកម្ម ទាមទារឱ្យភាគីទាំងសងខាង ទាំងខាងក្រុមហ៊ុននាំចេញ រោងម៉ាស៊ីនកិនស្រូវ និងសហគមន៍ មានការគោរពកិច្ចសន្យានេះឱ្យបានច្បាស់លាស់ដោយការគោរពតាមកិច្ចសន្យា មានភាពស្មោះត្រង់ជាមួយគ្នា មានន័យថា ជាការជួយគ្នាទៅវិញទៅមក និងជាការជួយខ្លួនឯងផងដែរ»។
លោក ឌិត ទីណា ក៏បានជំរុញឱ្យសហគមន៍ប្រើប្រាស់ពូជសុទ្ធ និងអនុវត្តបច្ចេកទេសឱ្យបានត្រឹមត្រូវ ដោយក្រសួងគ្រោងនឹងរៀបចំប្រព័ន្ធកសិកម្មថ្មី ដែលជួយកសាងសហគមន៍ឱ្យរឹងមាំតាមរយៈការដាក់ចេញគោលនយោបាយមន្ត្រីបច្ចេកទេសកសិកម្មតាមឃុំ និងការគិតគូរក្នុងការជួយសហគមន៍ឱ្យរឹងមាំ គឺត្រូវធ្វើការរួមគ្នាប្រកបដោយតម្លាភាព គណនេយ្យភាព និងការទទួលខុសត្រូវរបស់សហគមន៍។
លោក កៅ ថាច ប្រតិភូរាជរដ្ឋាភិបាលទទួលបន្ទុកជាអគ្គនាយកនៃធនាគារអភិវឌ្ឍន៍ជនបទ និងកសិកម្ម (ARDB) បានលើកឡើងនាឱកាសនោះថា ផ្អែកលើលទ្ធផលនៃការវាយតម្លៃពីស្ថានភាពវិស័យស្រូវអង្ករកម្ពុជា ដែលបានរៀបចំឡើងដោយ ក្រុមហ៊ុនស្រាវជ្រាវ និងប្រឹក្សានព្វន្ត ក្រោមកិច្ចគាំទ្រដោយធនាគារ ARDB លើក្រុមហ៊ុនកិនកែច្នៃស្រូវអង្ករ និងរោងម៉ាស៊ីនកិនស្រូវចំនួន ៦៧ និងសហគមន៍កសិកម្មចំនួន៥៨ នៅតាមបណ្តាខេត្តចំនួន១៤ ក្នុងប្រទេស ចាប់ពីខែធ្នូ ឆ្នាំ ២០១៩ រហូតដល់ខែមីនា ឆ្នាំ ២០២០ បានបង្ហាញថា សមត្ថភាពផ្គត់ផ្គង់នៃវិស័យស្រូវ-អង្ករជាពិសេសសមត្ថភាពផលិតកម្មស្រូវ ឃ្លាំងស្តុក ឡសម្ងួត និងការកិនកែច្នៃស្រូវ-អង្ករ មានការអភិវឌ្ឍគួរឱ្យកត់សម្គាល់។
លោកគូសបញ្ជាក់ទៀតថា បច្ចុប្បន្ននេះ សមត្ថភាពឃ្លាំងស្តុកស្រូវ-អង្ករ ឡសម្ងួត និងការកិនកែច្នៃស្រូវ-អង្ករ មានលទ្ធភាពគ្រប់គ្រាន់ក្នុងការគាំទ្រគោលនយោបាយនាំចេញអង្កររបស់រាជរដ្ឋាភិបាលយ៉ាងតិច ១ លានតោនក្នុង ១ ឆ្នាំ ក៏ប៉ុន្តែដើម្បីសម្រេចបានគោលដៅនេះ វិស័យស្រូវ-អង្ករអាចនៅបន្តមានបញ្ហាប្រឈមចម្បងមួយចំនួនទៀតដូចជា កត្តាពូជ ភាពសុទ្ធនៃពូជ និងកង្វះទុនជាដើមដែលត្រូវរួមគ្នាដោះស្រាយ។
ចំណែក លោក សុង សារ៉ន ប្រធានក្រុមប្រឹក្សាភិបាលសហព័ន្ធស្រូវអង្ករកម្ពុជាថ្លែងថា ការចុះកិច្ចសន្យាកសិកម្មនេះ ជានិមិត្តរូបនៃការចាប់ផ្តើមរីកចម្រើននៃប្រព័ន្ធខ្សែចង្វាក់តម្លៃ និងការផ្គត់ផ្គង់នៅក្នុងវិស័យកសិកម្មនៅកម្ពុជា ជាពិសេសផលិតកម្មស្រូវ ដែលផ្សារភ្ជាប់ និងធ្វើតំណភ្ជាប់ ទៅគ្រប់ភាគីពាក់ព័ន្ធទាំងអស់ ដូចជាអ្នកផលិត អ្នកកែច្នៃ អ្នកនាំចេញ អ្នកផ្តល់ឥណទាន និងអ្នកផ្គត់ផ្គង់ធាតុចូលដើម្បីឆ្ពោះទៅរកគោលដៅរួមមួយគឺការកសាងវិស័យស្រូវអង្ករនៅកម្ពុជាឱ្យប្រកបដោយនិរន្តរភាព និងភាពប្រកួតប្រជែងដោយបានប្រាក់ចំណេញ។
លោកបញ្ជាក់ថា៖ «តាមរយៈកិច្ចសន្យាកសិកម្មនាថ្ងៃនេះនឹងបង្ហាញពីគំរូល្អបន្ថែមទៀតដល់ប្រភេទដំណាំកសិកម្មផ្សេងទៀត និងជួយឱ្យកសិករ មានលំនឹងលើការផ្គត់ផ្គង់ និងតម្លៃលក់កសិផលរបស់ខ្លួន។ តាមរយៈកិច្ចសន្យាកសិកម្មនេះដែរនឹងជួយដល់រោងម៉ាស៊ីនកិនស្រូវ និងអ្នកនាំចេញ អាចធានាបាននិរន្តរភាពនៃការផ្គត់ផ្គង់ ផលិតកម្មកែច្នៃ និងគុណភាព សម្រាប់បំពេញតម្រូវការរបស់អតិថិជនផងដែរ»។
រីឯលោក ចាន់ សុឃាំង ប្រធានសហព័ន្ធស្រូវអង្ករកម្ពុជា ឱ្យដឹងថា កិច្ចសន្យាទាំង ៤៦ គ្របដណ្ដប់លើផ្ទៃដី ៦ ៦៩០ ហិកតា និងអនុវត្តដោយកសិករចំនួន ២ ២៣៦ គ្រួសារ នៅក្នុងស្រុកទាំង ៧ គ្របដណ្តប់លើប្រភេទពូជស្រូវ និងទទួលទិញស្រូវចំណី ១៧ ៦៦៣ តោន។
លោកបន្ថែមថា មានប្រភេទស្រូវមួយចំនួន ដែលភាគីទាំង ២ បានធ្វើកិច្ចសន្យាលើការទទួលទិញរួមមាន៖ ប្រភេទផ្ការំដួលមានចំនួន ៦ ២៣៣ តោន,ស្រូវសែនក្រអូប មានចំនួន ២ ៨៩០ តោន,ស្រូវប្រភេទអូអឹមមានចំនួន ១ ៨៥០ តោន,ស្រូវគ្រាប់ខ្ចី ចំនួន ៦ ៦៩០ តោន និងមានកិច្ចសន្យាលើបន្លែតាមបរិមាណជាក់ស្ដែងផងដែរ។
យោងតាមក្រសួងកសិកម្មបានឱ្យដឹងថា ចាប់តាំងពីខែមករា ឆ្នាំ ២០២៣ រហូតមកដល់ពេលនេះ ការអនុវត្តកិច្ចសន្យាកសិកម្មបានចំនួន ៩១ កិច្ចសន្យា នៅក្នុងខេត្តចំនួន ៥ រួមមាន បន្ទាយមានជ័យ ព្រៃវែង បាត់ដំបង កំពង់ធំ និងខេត្តព្រះវិហារ។ ក្នុងនោះរោងម៉ាស៊ីកិនស្រូវ ដែលចូលរួមក្នុងកិច្ចសន្យាកសិកម្មនេះមានចំនួន ១៤ និងសហគមន៍កសិកម្ម ៩១ ដែលមានសមាជិកជិត ៧ ០០០ នាក់ ស្មើបរិមាណផលជាស្រូវចំនួនជាង ៧ ម៉ឺនតោន៕
