អ្នកលក់មៀននៅភូមិកោះក្របី ខណ្ឌច្បារអំពៅ កាលពីថ្ងៃទី ១ ខែកក្កដា។ រូបថត ហុង មិនា
ភ្នំពេញៈ ការនាំចេញផ្លែមៀនស្រស់ពីកម្ពុជាទៅប្រទេសចិន សម្រាប់រដូវកាលប្រមូលផលឆ្នាំ ២០២៣-២០២៤ ត្រូវរំពឹងថា នឹងអាចកើនលើសរដូវកាលមុន (ឆ្នាំ ២០២២-២០២៣) ៥ ដង ខណៈការប្រមូលផលនឹងចាប់ផ្តើមពីខែកញ្ញា តទៅ។
ទីផ្សារផ្លែមៀនស្រស់កម្ពុជា ចាប់ផ្តើមមានភាពប្រសើរតាំងពីចុងខែតុលា ឆ្នាំ ២០២២ មក ដោយប្រទេសចិន បានអនុញ្ញាតឱ្យកម្ពុជានាំចេញផ្លែមៀនស្រស់ជាផ្លូវការទៅទីផ្សារខ្លួន។ មៀនស្រស់ គឺជាផ្លែឈើទី៣ របស់កម្ពុជាដែលបានបង្ហាញវត្តមាននៅទីផ្សារប្រទេសចិនបន្ទាប់ពីផ្លែស្វាយ និងចេក។
លោក ភត់ សុផាន់បូរី ប្រធានក្រុមប្រឹក្សាភិបាលនៃក្រុមហ៊ុន ពេជ្រចិន្តា ហ្រ្វូតប្រូដាក់សិន ភីអែហ្វភី ដែលជាក្រុមហ៊ុនប្រមូលទិញ និងវេចខ្ចប់ផ្លែមៀន បានប្រាប់ភ្នំពេញប៉ុស្តិ៍នៅថ្ងៃទី ៣ ខែកក្កដាថា តាមបទពិសោធន៍រយៈពេល ១ ឆ្នាំកន្លងមក និងការត្រៀមខ្លួនជាមុន បរិមាណនៃការនាំចេញផ្លែមៀនស្រស់ទៅទីផ្សារចិននាពេលប្រមូលខាងមុខនឹងអាចលើសមុន ៥ ដង។
លោកបន្តថា ដោយសារផ្លែមៀនមានទីផ្សារ សូម្បីតែចម្ការដែលពីមុនគេទុកចោល ក៏ត្រូវបានកសិករយកចិត្តទុកដាក់ និងខិតខំពង្រីកការដាំដុះផងដែរនាពេលនេះ។ ជាទូទៅការប្រមូលផលផ្លែមៀន គឺចាប់ផ្តើមពីខែកញ្ញានៃឆ្នាំនីមួយៗ រហូតដល់ខែឧសភា នៃឆ្នាំបន្ទាប់។
លោកបន្ថែមថា៖ «សម្រាប់រដូវកាលប្រមូលផលខាងមុខ ខ្ញុំសង្ឃឹមការនាំចេញទៅចិននឹងកើនលើសរដូវកាលមុន ៥ ដង ហើយតម្លៃក៏នឹងកើនខ្ពស់ជាងមុនដែរ។ ផលិតកម្មផ្លែមៀនបានចូលរួមចំណែកកាន់តែសំខាន់នៅក្នុងការជំរុញកំណើនសេដ្ឋកិច្ចជាតិ»។
របាយការណ៍ក្រសួងកសិកម្ម ឱ្យដឹងថា ក្នុងត្រីមាសទី ១ ឆ្នាំ ២០២៣ កម្ពុជានាំចេញផ្លែមៀនស្រស់ ៣ ៤២២,២៥ តោនទៅទីផ្សារប្រទេសចិន។ ផ្លែមៀនស្រស់ ត្រូវបាននាំចេញជាផ្លូវការទៅប្រទេសចិនជាលើកដំបូងកាលពីចុងខែតុលា ឆ្នាំ ២០២២។
លោក សុផាន់បូរី បានប្រាប់ទៀតថា បច្ចុប្បន្ននេះក្រុមហ៊ុនលោកបានធ្វើកិច្ចសន្យាកសិកម្ម ជាមួយកសិករមួយចំនួនហើយ ដោយផ្តល់តម្លៃប្រមាណ ៨០០ ដុល្លារក្នុង ១ តោននៅពេលប្រមូលផល ដែលតម្លៃនេះគឺកើនឡើងពីក្នុងរង្វង់ជិត ៦០០ ដុល្លារកាលពីរយៈពេលដូចគ្នាឆ្នាំមុន។ លោកបញ្ជាក់ថា៖ «តម្លៃនេះអាចនឹងមានការប្រែប្រួលនៅចុងខែសីហា គឺនៅពេលភាគីចិនទម្លាក់ផែនការនាំចូលមៀនពីកម្ពុជា»។
ផ្លែមៀនស្រស់កម្ពុជាដាក់លក់នៅទីផ្សារប្រទេសចិន អាចមានតម្លៃជាមធ្យមជិត ២ ដុល្លារក្នុង ១ គីឡូក្រាម។
ទោះយ៉ាងណា លោក សុផាន់បូរី អះអាងថា បញ្ហាតម្លៃដឹកជញ្ជូន និងរយៈពេលដឹកទំនិញពីកម្ពុជាទៅប្រទេសចិននៅតែជួបបញ្ហាច្រើន ដែលអាចប៉ះពាល់ទៅដល់គុណភាពផលិតផល និងការចំណាយលើតម្លៃដើមខ្ពស់។
ប្រធានសហគមន៍កសិកម្មផលិតផលមៀនប៉ៃលិន លោក សួស ស៊ីយ៉ាត បាននិយាយថា ការប្រកាសបើកទីផ្សារចិនកាលពីឆ្នាំ ២០២២ បានជំរុញ និងលើកទឹកចិត្តឱ្យកសិករពង្រីកការដាំដុះថ្មី និងថែទាំដើមមៀនចាស់ៗឡើងវិញ។
ប៉ុន្តែទន្ទឹមនឹងនេះ ដោយសារឆ្នាំនេះមិនសូវមានភ្លៀង ដូច្នេះគុណភាពផ្លែមៀនក៏មិនសូវល្អដែរ។ លោកបន្តថា ប្រទេសចិន គឺជាទីផ្សារធំ និងអាចផ្តល់ផលវិជ្ជមានច្រើនសម្រាប់កសិករដាំមៀននៅកម្ពុជា។ ក្រៅពីទីផ្សារនាំចេញទៅចិន ផ្លែមៀនស្រស់ក៏ត្រូវបាននាំទៅប្រទេសជិតខាងផងដែរ។
លោកប្រាប់ថា៖ «ការនាំចេញទៅចិនប្រាកដជាកើនឡើងច្រើនក្នុងឆ្នាំនេះ ប៉ុន្តែសម្រាប់គុណភាពផ្លែមៀននៅតំបន់ខ្លះ អាចមិនសូវល្អដូចរដូវកាលមុន»។
ក្នុងពិធីសម្ពោធការនាំចេញផ្លែមៀនស្រស់កម្ពុជាជាផ្លូវការទៅប្រទេសចិន កាលពីខែតុលា ឆ្នាំ ២០២២ លោក ឌិត ទីណា រដ្ឋមន្ត្រីក្រសួងកសិកម្ម បានឱ្យដឹងថា៖ «ការសម្រេចបានសិទ្ធិនាំចេញផ្លែមៀនស្រស់ជាផ្លូវការទៅប្រទេសចិន គឺជាការបោះជំហានទៅមុខយ៉ាងវែងសម្រាប់ផលិតផលកសិកម្មកម្ពុជា»។
យោងតាមស្ថិតិរបស់អគ្គនាយកដ្ឋានកសិកម្ម ក្នុងឆ្នាំ ២០២១ កម្ពុជាមានផលិតកម្មមៀន ជាង ១,៨ ម៉ឺនហិកតា ដោយអាចប្រមូលផលបានជាង ១៣១ ពាន់តោន ក្នុង ១ ឆ្នាំ៕
