មន្ត្រីជាន់ខ្បស់ផ្សារមូលបត្រកម្ពុជា (CSX) បានឱ្យដឹងថា ជាមួយនឹងប្រាក់កម្ចីពីធនាគារហេដ្ឋារចនាសម្ព័ន្ធ និងវិនិយោគអាស៊ី (AIIB) ចំនួន ១០០ លានដុល្លារ ដល់ធនាគារ អេស៊ីលីដា ភីអិលស៊ី នឹងផ្តល់លទ្ធភាពបន្ថែមទៀត ដល់ធនាគារមួយនេះ ក្នុងការពង្រីកអាជីវកម្មរបស់ខ្លួន នៅក្នុងប្រទេសកម្ពុជា ហើយនឹងទទួលបានការជឿទុកចិត្តកាន់តែច្រើនពីវិនិយោគិនសាធារណៈ។
យោងតាមឯកសាររបស់ធនាគារ ដែលផ្ញើទៅ CSX នៅថ្ងៃទី៣០ ខែមិថុនា ធនាគារអេស៊ីលីដា នឹងទទួលបានប្រាក់កម្ចីប្រមាណ ១០០ លានដុល្លារ ពីធនាគារហេដ្ឋារចនាសម្ព័ន្ធ និងវិនិយោគអាស៊ី (AIIB) ដើម្បីពង្រីកឥណទានរបស់ខ្លួនដល់មីក្រូ សហគ្រាសធុនតូច និងមធ្យម (MSMEs)។ ប្រាក់កម្ចីនេះ នឹងមានរយៈពេល ៥ ឆ្នាំ ជាមួយនឹងអត្រាការប្រាក់ចាប់ពី៨,៨ ភាគរយដល់ ១១ ភាគរយ (ការប្រាក់ និងថ្លៃសេវា)។
ធនាគារមួយនេះ បានឱ្យដឹងនៅក្នុងឯកសារនេះថា៖ «ធនាគារនេះ (Acleda) នឹងផ្តល់ប្រាក់កម្ចីថ្មី ដល់មីក្រូសហគ្រាសធុនតូច និងមធ្យម។ កម្ចីនេះ មានរយៈពេលវែងគឺដើម្បីគាំទ្រដល់កំណើនជាយុទ្ធសាស្ត្រ និងការធ្វើពិពិធកម្មប្រភពមូលនិធិស្របតាមផែនការរបស់ធនាគារ»។
លោក ហុង សុហួរ អគ្គនាយក CSX បានប្រាប់ភ្នំពេញប៉ុស្តិ៍កាលពីថ្ងៃទី៥ ខែកក្កដា ថា ជាមួយនឹងយុទ្ធសាស្ត្រកំណើននៃក្រុមហ៊ុននីមួយៗ តែងតែមានប្រភពមូលនិធិផ្សេងៗ ដើម្បីគាំទ្រដល់កំណើនរបស់ពួកគេ តាមរយៈការខ្ចី និងការចុះបញ្ជីនៅលើទីផ្សារមូលធន។ ទោះជាយ៉ាងណាក៏ដោយ បំណុលទាំងអស់ត្រូវបានគ្រប់គ្រងយ៉ាងច្បាស់លាស់ និងអាចគ្រប់គ្រងបាន ដើម្បីចៀសវាងហានិភ័យណាមួយចំពោះក្រុមហ៊ុន។
លោកថ្លែងថា៖«ជាការប្រសើរណាស់ ប្រសិនបើក្រុមហ៊ុនណាមួយ មានប្រភពមូលនិធិជាច្រើន ដើម្បីគាំទ្រដល់កំណើនអាជីវកម្មរបស់ពួកគេនោះ។ ដូច្នេះ តាមរយៈការចុះបញ្ជីនៅលើទីផ្សារមូលបត្រកម្ពុជា ផ្តល់ឱ្យពួកគេនូវភាពជឿជាក់ដ៏ល្អមួយ ក្នុងការទទួលបានប្រាក់កម្ចី ឬផ្តល់ប្រាក់កម្ចីពីធនាគារផ្សេងទៀត យ៉ាងងាយស្រួល ជាពិសេសធនាគារបរទេស ដែលនឹងផ្តល់ឱ្យពួកគេនូវអត្រាការប្រាក់ទាប។ ដូច្នេះ បំណុលនេះនឹងជួយក្រុមហ៊ុនឱ្យរីកចម្រើនបន្ថែមទៀត ដោយសារពួកគេមានសមត្ថភាពបន្ថែមទៀត ក្នុងការពង្រីកអាជីវកម្មរបស់ពួកគេ»។
លោកលើកឡើងថា៖ «ទោះជាយ៉ាងណាក៏ដោយ ក៏ក្រុមហ៊ុន ត្រូវតែធ្វើឱ្យប្រាកដថា កម្រិតបំណុលត្រូវតែអាចគ្រប់គ្រងបាន ហើយនឹងមិននាំឱ្យមានហានិភ័យណាមួយកើតឡើងឡើយ។ ដូច្នេះ ប្រសិនបើក្រុមហ៊ុនអាចប្រើប្រាស់បំណុលបានយ៉ាងច្បាស់លាស់ វានឹងរួមចំណែកដល់យុទ្ធសាស្ត្រកំណើនរបស់ក្រុមហ៊ុន។ ការណ៍នេះ នឹងផ្តល់មុខមាត់ដ៏ល្អ សម្រាប់ក្រុមហ៊ុនដែលបានចុះបញ្ជីណាមួយ ព្រោះពួកគេអាចទាក់ទាញការចាប់អារម្មណ៍កាន់តែច្រើនពីវិនិយោគិនសាធារណៈ»។
បច្ចុប្បន្ន ធនាគារ អេស៊ីលីដា ភីអិលស៊ី មានសាខាចំនួន ៤ ដូចជា វិទ្យាស្ថានធុរកិច្ច អេស៊ីលីដា អេស៊ីលីដា ស៊ីឃ្យួរឹធី ភីអិលស៊ី ក្រុមហ៊ុន ACLEDA Bank Lao Ltd ក្រុមហ៊ុន ACLEDA MFI Myanmar Co., Ltd ព្រមទាំងការិយាល័យតំណាង នៅសាធារណរដ្ឋសហភាពមីយ៉ាន់ម៉ា ផងដែរ។
ត្រឹមចុងខែមីនា ឆ្នាំ២០២៣ ធនាគារអេស៊ីលីដា មានទ្រព្យសកម្មសរុបចំនួន ៩,៤៤ ពាន់លានដុល្លារ អាមេរិក សមតុល្យឥណទានសរុបចំនួន ៦,៥៨ ពាន់លានដុល្លារ និងប្រាក់បញ្ញើសន្សំសរុបចំនួន ៦,៧៩ ពាន់លានដុល្លារ អាមេរិក ដែលមានអតិថិជនជាង ៤,០៧ លាននាក់។ នៅចុងខែមេសា ឆ្នាំ២០២៣ ធនាគារមួយនេះ មានអតិថិជនប្រើប្រាស់ អេស៊ីលីដាម៉ូបាលចំនួន ២,៧៦ លាននាក់ និងអាជីវកម្មចំនួន ២៤០,០០០៕LA