ភ្ញៀវទេសចរចូលទស្សនាប្រាសាទអង្គរវត្ត នាពេលកន្លងទៅ។ រូបថត ហុង មិនា
ភ្នំពេញៈ កម្ពុជារកចំណូលបានជាង ១៨ លានដុល្លារ នៅក្នុងឆមាសទី ១ ឆ្នាំ ២០២៣ ពីការលក់សំបុត្រឱ្យភ្ញៀវបរទេសចូលកម្សាន្តរមណីយដ្ឋានទាំង ៣ ដែលគ្រប់គ្រងដោយគ្រឹះស្ថានអង្គរ ដោយកើនជាង ៦ ដងធៀបរយៈពេលដូចគ្នាឆ្នាំ ២០២២។ នេះបើតាមសេចក្តីប្រកាសព័ត៌មានពីគ្រឹះស្ថានអង្គរ។
គ្រឹះស្ថានអង្គរ គឺជាគ្រឹះស្ថានសាធារណៈរដ្ឋបាល ដែលត្រូវបានបង្កើតឡើងកាលពីឆ្នាំ ២០១៦ ដោយស្ថិតក្រោមអាណាព្យាបាលបច្ចេកទេសនៃក្រសួងទេសចរណ៍ និងស្ថិតក្រោមអាណាព្យាបាលហិរញ្ញវត្ថុ នៃក្រសួងសេដ្ឋកិច្ច និងហិរញ្ញវត្ថុ។ ការប្រមូលចំណូលរបស់គ្រឹះស្ថានអង្គរ រួមមាន រមណីយដ្ឋានអង្គរ, ប្រាសាទកោះកែរ, និងលក់សំបុត្រទូក នៅកំពង់ផែចុងឃ្នៀស។ សម្រាប់សំបុត្រចូលទស្សនារមណីយដ្ឋានអង្គរ ត្រូវចែកចេញជា ៣ប្រភេទ គឺសំបុត្រចូលទស្សនា ១ ថ្ងៃមានតម្លៃ ៣៧ ដុល្លារ, រយៈពេល ៣ ថ្ងៃ ៦២ ដុល្លារ និង ៧ ថ្ងៃ តម្លៃ ៧២ ដុល្លារ។
សេចក្តីប្រកាសព័ត៌មានរបស់គ្រឹះស្ថានអង្គរ ចេញផ្សាយកាលពីថ្ងៃទី ៥ ខែកក្កដា ឆ្នាំ ២០២៣ ឱ្យដឹងថា ចាប់ពីខែមករា ដល់ខែមិថុនា គ្រឹះស្ថានអង្គរប្រមូលចំណូលពីការលក់សំបុត្របានចំនួន ១៨ ២៦៥ ៨៩៣ ដុល្លារ កើនឡើង ៦៣៦,៦ ភាគរយបើធៀបរយៈពេលដូចគ្នាឆ្នាំ ២០២២ ដែលមានត្រឹមតែ ២ ៤៧៩ ៧៣៣ ដុល្លារ។
ក្នុងនោះសម្រាប់រមណីយដ្ឋានអង្គរ គឺមានភ្ញៀវទេសចរបរទេសទិញសំបុត្រចូលទស្សនា ៣៨៥ ៧៦៩ នាក់ កើនឡើង ៥៤៣,១៣ ភាគរយធៀបរយៈពេលដូចគ្នាឆ្នាំ ២០២២ ដោយប្រាក់រកបានពីការលក់សំបុត្រ មានចំនួន ១៧ ៨៧៧ ៤១៨ ដុល្លារ កើន ៦៣៨,៧១ ភាគរយ។ ចំពោះប្រាក់ទទួលបានពីភ្ញៀវទិញសំបុត្រចូលប្រាសាទកោះកែរ គឺ ៩៥ ៥៣៥ ដុល្លារ និងកំពង់ផែចុងឃ្នៀស ២៩២ ៩៤០ ដុល្លារ។
ប្រធានសមាគមមគ្គុទ្ទេសក៍ទេសចរអង្គរ លោក ខៀវ ធី បានប្រាប់ ភ្នំពេញ ប៉ុស្តិ៍ នៅថ្ងៃទី ៤ ខែកក្កដាថា ចំនួនភ្ញៀវទេសចរបរទេសចូលមកកម្សាន្តតំបន់អង្គរ គឺពិតជាកើនឡើងបើធៀបនឹងឆ្នាំ ២០២១-២០២២ ប៉ុន្តែបើធៀបមុនឆ្នាំ ២០២០ គឺនៅតិចតួចនៅឡើយ។ ភ្ញៀវក្នុងពេលនេះភាគច្រើនជាអ្នកនៅក្នុងតំបន់អាស៊ាន។ ជាធម្មតាភ្ញៀវទេសចរបរទេសនឹងមានចំនួនច្រើននៅចុងឆ្នាំនីមួយៗ ដូច្នេះអ្វីៗគឺគេត្រូវរង់ចាំមើលនៅចុងឆ្នាំសិន។ លោកបន្តថា ប្រសិនបើស្ថានភាពសេដ្ឋកិច្ច និងនយោបាយពិភពលោកល្អប្រសើរ ចំនួនភ្ញៀវទេសចរបរទេសចូលមកកម្ពុជាប្រាកដជានឹងកើនឡើងវិញ។
លោកអះអាងថា៖ «ទោះបីទិន្នន័យក្រសួងទេសចរណ៍បង្ហាញថាមានភ្ញៀវបរទេសចូលមកកម្ពុជាជាង ២ លាននាក់ក្នុងរយៈពេល ៦ ខែ ឆ្នាំ ២០២៣ ប៉ុន្តែសម្រាប់ភ្ញៀវបរទេសដែលមកទស្សនាតំបន់ប្រាសាទក្នុងខេត្តសៀមរាប គឺមិនទាន់មានច្រើនទេ»។
ជាមួយនឹងបទពិសោធន៍ច្រើនឆ្នាំលើការងារជាមគ្គុទ្ទេសក៍ទេសចរណ៍ខេត្តសៀមរាប លោក ខៀវ ធី បានបញ្ជាក់ថា ដើម្បីដឹងច្បាស់ថាភ្ញៀវបរទេសនឹងត្រឡប់មកកម្ពុជាវិញបានកម្រិតណានោះ គឺគេត្រូវរង់ចាំមើលនៅចុងឆ្នាំសិន ព្រោះជាពេលមានភ្ញៀវបរទេសធ្វើដំណើរមកកម្សាន្តជាច្រើនរៀងរាល់ឆ្នាំ (High Season)។
រដ្ឋមន្ត្រីក្រសួងទេសចរណ៍ លោក ថោង ខុន កាលពីថ្ងៃទី ៣ ខែកក្កដា ឱ្យដឹងថា ចាប់ពីខែមករា ដល់ខែមិថុនា ឆ្នាំ ២០២៣ កម្ពុជាទទួលបានភ្ញៀវបរទេសប្រមាណ ២,៥៧ លាននាក់ កើនឡើង ៤០៩ ភាគរយបើធៀបនឹងរយៈពេលដូចគ្នាឆ្នាំ ២០២២ ដែលមាន ៥០៦ ៧៦២ នាក់។ ក្នុងចំណោមភ្ញៀវទាំង ២,៥៧ លាននាក់ គឺភ្ញៀវតាមផ្លូវគោក មានចំនួន ១,៦៣ លាននាក់ កើនឡើង ៥២៦ ភាគរយ, ផ្លូវអាកាស ៩១០ ០០០ នាក់ កើនឡើង ២៧៩ ភាគរយ, និងផ្លូវទឹក ៣០ ០០០ នាក់ កើនឡើង ៥៨៦ ភាគរយ។
លោកបន្ថែមថា ចាប់តាំងពីកម្ពុជាប្រកាសបើកប្រទេសឡើងវិញពីវិបត្តិជំងឺកូវីដ ១៩ ចំនួនភ្ញៀវមកពីប្រទេសថៃបានឈរនៅលើកំពូលតារាង និងតាមពីក្រោយដោយជនជាតិវៀតណាម ចិន ឡាវ អាមេរិក កូរ៉េ និងបារាំង។ ចំនួនភ្ញៀវទេសចរបរទេសចូលមកកម្ពុជាត្រូវបានរំពឹងថា នឹងរក្សាសម្ទុះកើនឡើងបន្ថែមទៀត ដោយតាមការព្យាករនៅឆ្នាំ ២០២៥ កម្ពុជានឹងអាចទទួលបានភ្ញៀវទេសចរបរទេស ៧ លាននាក់ ដោយកើនលើសពីកំណត់ត្រាក្នុងឆ្នាំ ២០១៩ ដែលមានចំនួន ៦,៦ លាននាក់។
យោងតាមគ្រឹះស្ថានអង្គរ នៅក្នុងឆ្នាំ ២០២២ គ្រឹះស្ថានអង្គរ រកចំណូលពីការលក់សំបុត្រឱ្យភ្ញៀវបរទេសបាន ១១ ៧៨៣ ៩១៦ លានដុល្លារ ក្នុងនោះចំណូលពីរមណីយដ្ឋានអង្គរចំនួន ១១ ៥២៨ ១៥៨ ដុល្លារ, កោះកែរ ៩០ ៤៥០ ដុល្លារ និងកំពង់ផែចុងឃ្នៀស ១៦៥ ៣០៨ ដុល្លារ៕
