កំពង់ផែទេសចរណ៍ខេត្តកោះកុង។ រូបថត ក្រសួងសាធារណការ និងដឹកជញ្ជូន
ភ្នំពេញៈ គណៈប្រតិភូសភាពាណិជ្ជកម្មខេត្តត្រាតនៃប្រទេសថៃ បានមកទស្សនកិច្ចស្វែងយល់ពីសក្ដានុពលផ្សេងៗ នៅកំពង់ផែទេសចរណ៍ ខេត្តកោះកុង ដើម្បីពិភាក្សាក្នុងការជំរុញសេដ្ឋកិច្ច តាមរយៈការផ្សារភ្ជាប់ផ្លូវពាណិជ្ជកម្ម ការវិនិយោគ និងទេសចរណ៍រវាងខេត្តទាំង ២។
បើយោងតាមរដ្ឋបាលខេត្តកោះកុង បានឱ្យដឹងនៅថ្ងៃទី១១ ខែកក្កដានេះថា គណៈប្រតិភូសភាពាណិជ្ជកម្មខេត្តត្រាត សហការជាមួយសភាពាណិជ្ជកម្មខេត្តកោះកុង បានអញ្ជើញមកទស្សនា និងធ្វើទស្សនកិច្ចស្វែងយល់ពីសក្ដានុពលផ្សេងៗ នៅកំពង់ផែទេសចរណ៍ និងទំនិញរាយដងទង់ ស្ថិតនៅក្រុងខេមរភូមិន្ទ ខេត្តកោះកុង ដើម្បីពិភាក្សាក្នុងការជំរុញសេដ្ឋកិច្ច តាមរយៈការផ្សារភ្ជាប់ផ្លូវពាណិជ្ជកម្ម ការវិនិយោគ និងវិស័យទេសចរណ៍រវាងខេត្តទាំង២ (កោះកុង-ត្រាត)។
ប្រភពដដែលបានឱ្យដឹងទៀតថា ក្រៅពីការពិភាក្សាក្នុងការជំរុញផ្នែកសេដ្ឋកិច្ចហើយ ភាគីទាំង២ ក៏បានពិភាក្សាគ្នាដើម្បីផ្លាស់ប្ដូរបទពិសោធន៍ ក្នុងការប្រើប្រាស់ឱ្យបានជាប្រយោជន៍នូវកំពង់ផែ ខេត្តទាំង២(កំពង់ផែទេសចរណ៍និងទំនិញរាយដងទង់ ខេត្តកោះកុង-កំពង់ផែពហុបំណងខ្លងយ៉ៃ ខេត្តត្រាត) ក្នុងការធ្វើចរាចរណ៍ដឹកជញ្ជូនទំនិញ និងភ្ញៀវទេសចរទៅវិញទៅមកផងដែរ។
លោក សុខ សុទ្ធី អភិបាលរងខេត្តកោះកុង បានឱ្យដឹងថា ដំណើរទស្សនកិច្ច របស់គណៈប្រតិភូ សភាពាណិជ្ជកម្មខេត្តត្រាតនាពេលនេះ គឺជាការចូលរួមមួយក្នុងការជំរុញសេដ្ឋកិច្ចក្នុងខេត្ត តាមរយៈការវិនិយោគ ការធ្វើពាណិជ្ជកម្ម និងលំហូរភ្ញៀវទេសចរមកកម្សាន្តរវាងខេត្តទាំង២ផងដែរ។ បន្ថែមពីនេះ លោកបញ្ជាក់ថា ខេត្តកោះកុង គឺជាខេត្តមួយដែលមានកន្លែងកម្សាន្ត និងមានកោះធម្មជាតិដ៏ស្រស់ស្អាតៗជាច្រើន។
ក្រៅពីនេះទៀត លោកថា នៅពេលដែលខេត្តកោះកុងមានទំនាក់ទំនងល្អជាមួយខេត្តត្រាតនេះ វាក៏ជាការពង្រឹងទំនាក់ទំនងព្រំដែនរវាងខេត្តទាំង២ ជាពិសេសវាជួយពង្រឹងទំនាក់ទំនងល្អ ខាងផ្នែកនយោបាយថែមទៀតផងបើទោះបីជាកន្លងមកខេត្តទាំង២មានទំនាក់ទំនងល្អលើវិស័យទាំងនោះស្រាប់ក៏ដោយ។
លោក សុខ សុទ្ធី ថ្លែងថា៖ «យើងមានទំនាក់ទំនងល្អជាមួយគ្នាកន្លងមកហើយ ទាំងការវិនិយោគ ទាំងវិស័យទេសចរណ៍ ដូច្នេះបើសិនជាមានភាគីណាមួយចង់វិនិយោគនោះ គឺវានឹងជំរុញឱ្យមានការវិនិយោគបន្ថែមទៀតលើគ្នាទៅវិញទៅមក រកស៊ីជាមួយគ្នានិង ផ្លាស់ប្ដូរទំនិញគ្នាទៅវិញទៅមក ហើយឥឡូវនេះយើងមានកំពង់ផែទៀត គឺវាកាន់តែមានទំនាក់ទំនងល្អជាមួយគ្នា និងធ្វើឱ្យសេដ្ឋកិច្ចកាន់តែរីកចម្រើនទៅមុខទៀត»។
គួរជម្រាបថា កំពង់ផែទេសចរណ៍ និងទំនិញរាយដងទង់ខាងលើនេះ ត្រូវបានដាក់សម្ពាធឱ្យប្រើប្រាស់ជាផ្លូវការនៅថ្ងៃទី២៣ ខែមិថុនា ឆ្នាំ២០២៣ ដែលកំពង់ផែនេះ គឺជាស្ថាបត្យកម្មថ្មីមួយដែលកើតចេញពីស្នាដៃកូនខ្មែរ ដោយមានរចនាប័ទ្មបែបទំនើប សាងសង់ស្របតាមបទដ្ឋានបច្ចេកទេសត្រឹមត្រូវ ដែលធានានូវការប្រើប្រាស់យូរអង្វែង។
នៅក្នុងពិធីនោះ លោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូនថ្លែងថា កំពង់ផែថ្មី លើទឹកដីកោះកុង នឹងរួមចំណែកលើកកម្ពស់ការតភ្ជាប់ និងភាពសម្បូរបែប នៃការដឹកជញ្ជូនតាមផ្លូវសមុទ្រឱ្យកាន់តែខ្លាំងថែមទៀត។
ចំណែកអភិបាលខេត្តកោះកុងលោកស្រី មិថុនា ភូថង បានចាត់ទុកដែរថា កំពង់ផែថ្មីនេះ គឺជាចំណែកមួយក្នុងការតភ្ជាប់ និងភាពសម្បូរបែបនៃហេដ្ឋរចនាសម្ព័ន្ធផ្លូវសមុទ្រ នៅក្នុងខេត្តតំបន់ឆ្នេរទាំង៤ នៃកម្ពុជា ក៏ដូចជាលើកកម្ពស់កំណើនសេដ្ឋកិច្ចប្រកបដោយបរិយាប័ន្ន នៅក្នុងប្រទេសជាប់សមុទ្រទាំង៣ នៃមហាអនុតំបន់មេគង្គ រួមមាន កម្ពុជា ថៃ និងវៀតណាមផងដែរ៕
