ផ្ទះបន្តោងដើមឈើនៅ Okinawa ប្រទេសជប៉ុន។ រូបថត Treeful Treehouse
ភ្នំពេញៈ ក្រុមហ៊ុន TreeFul របស់ប្រទេសជប៉ុន គ្រោងបោះទុនវិនិយោគសាងសង់ផ្ទះបន្តោងដើមឈើប្រណីតលំដាប់សណ្ឋាគារផ្កាយ ៥ ពិភពលោក នៅលើភ្នំគូលែននៃទឹកដីខេត្តសៀមរាប ដើម្បីឱ្យទីតាំងនេះក្លាយជាកញ្ចប់ផលិតផលទេសចរណ៍មួយថ្មីនៅកម្ពុជា ក្នុងការជួយទាក់ទាញអ្នកទេសចរពីគ្រប់ទិសទី។
គម្រោងវិនិយោគនេះ បន្ទាប់ពីក្រុមហ៊ុន TreeFul បានបំបែកឯកទគ្គកម្មផ្ទះបន្តោង (Tree house) ប្រណីតកម្រិតសណ្ឋាគារផ្កាយ ៥ ពិភពលោក(Guinness World Records) នៅកោះអូគីណាវ៉ា កាលពីដើមខែសីហា ឆ្នាំ ២០២២ កន្លងមកនេះ។
លោក Nabesshima Katsuhito តំណាងក្រុមហ៊ុន TreeFul បានឱ្យដឹងថា ក្រោយបំបែកកំណត់ត្រារួចមក កាលពីដើមឆ្នាំ ២០២៣ នេះ លោក Satoru Kikugawa ជាវិស្វករដ៏ល្បីម្នាក់លំដាប់ពិភពលោក និងជាស្ថាបនិកក្រុមហ៊ុន TreeFul បានអញ្ជើញមកប្រទេសកម្ពុជាដោយលោកបានចុះទៅផ្ទាល់នៅតាមទីតាំងមួយចំនួននៅក្នុងប្រទេសកម្ពុជា។ នេះបើតាមមន្ទីរព័ត៌មានខេត្តសៀមរាប។
តំណាងក្រុមហ៊ុន TreeFul បន្តទៀតថា បន្ទាប់ពីឃើញសក្តានុពលរបស់ភ្នំគូលែនដោយផ្ទាល់ភ្នែក លោក Satoru Kikugawa ក៏មានចំណាប់អារម្មណ៍ក្នុងការសាងសង់ផ្ទះបន្តោងប្រណីត នៅលើភ្នំប្រវត្តិសាស្ត្រ ព្រមទាំងបានបញ្ជូនអ្នកជំនាញទាំងផ្នែកកសិកម្ម ផ្នែកបរិស្ថាន និងផ្នែកបច្ចេកទេស ខណៈតំបន់ភ្នំគូលែននេះ មានដើមឈើធំៗ មានទឹក មានសត្វព្រៃ ដូច្នេះវាត្រូវនឹងគំនិតនៃការបង្កើត ផ្ទះបន្តោងដើមឈើនេះ។
លោកឱ្យដឹងថា៖ «អ្នកជំនាញបានមកពិនិត្យវាយតម្លៃអំពីសក្តានុពល និងផលប៉ះពាល់នៅតំបន់នេះ និងឈានដល់ការកសាងផែនការមេ ដាក់ជូនក្រសួងពាក់ព័ន្ធដើម្បីសុំការអនុញ្ញាតសម្រាប់ការវិនិយោគមួយនេះ»។
លោក Katsuhito បញ្ជាក់ផងដែរថា ក្នុងករណីទទួលបានការអនុញ្ញាតពីរាជរដ្ឋាភិបាល គម្រោងនេះ នឹងផ្តល់ផលចំណេញច្រើនដល់កម្ពុជា ទាំងផ្នែកសេដ្ឋកិច្ច បរិស្ថាន និងការកាត់បន្ថយភាពក្រីក្ររបស់ពលរដ្ឋនៅក្នុងតំបន់ផងដែរ។
លោកថ្លែងថា៖ «ព្រោះថា ផ្ទះបន្តោងនេះ វាក្លាយជាកញ្ចប់ផលិតផលទេសចរណ៍មួយថ្មីនៅកម្ពុជា ពិសេសវានឹងជួយទាក់ទាញអ្នកទេសចរដែលមានគុណភាពឱ្យមកលេង និងពន្យារពេលស្នាក់នៅកម្ពុជា ក្នុងនោះខេត្តសៀមរាបផ្ទាល់»។
លោកបានលើកឡើងថា ផ្ទះបន្តោងនេះ វានឹងត្រូវរចនាឡើងដោយប្រណីតភាព វាក៏ជាគម្រោងមួយដែលមានមេត្រីភាពជាមួយបរិស្ថាន ខណៈប្រទេសជប៉ុន ជាប្រទេសដែលស្រឡាញ់បរិស្ថាន ដូច្នេះគម្រោងនេះ វាមិនបានបំផ្លាញបរិស្ថាននោះទេ ហើយវាក៏ស្របទៅតាមគោលដៅអភិវឌ្ឍន៍ប្រកបដោយចីរភាព (SDG)។ តំណាងក្រុមហ៊ុន TreeFul បន្ថែមថា ហេតុនេះពេលគម្រោងនេះអនុវត្ត កម្ពុជាក៏អាចក្លាយជាគោលដៅដាក់ទុនវិនិយោគរបស់ក្រុមហ៊ុនជប៉ុនដទៃទៀត ដែលគេបានស្គាល់កម្ពុជា តាមរយៈផ្ទះបន្តោងដើមឈើ (Tree house) របស់ក្រុមហ៊ុន TreeFul នេះ។
ជុំវិញគម្រោងវិនិយោគនេះ លោកស្រី ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជា (CATA) បានឱ្យដឹងថា គម្រោងវិនិយោគនេះគឺជារឿងល្អសម្រាប់វិស័យទេសចរណ៍នៅខេត្តសៀមរាប និងសម្រាប់ប្រទេសកម្ពុជាទាំងមូលផងដែរ។ លោកស្រី ថ្លែងថា៖ «ភាគច្រើនក្រុមហ៊ុនរបស់ជប៉ុនប្រសិនជាពួកគាត់បោះទុនវិនិយោគហើយ គឺទទួលបានទាំងគុណភាព ព្រមទាំងបានរួមចំណែកជួយទៅដល់ប្រជាពលរដ្ឋនៅក្នុងមូលដ្ឋាន»។
លោកស្រីបន្តទៀតថា រាល់ការវិនិយោគរបស់ក្រុមហ៊ុនជប៉ុន តែងតែផ្ដល់អត្ថប្រយោជន៍ច្រើនដល់ពលរដ្ឋខ្មែរ ពីព្រោះជប៉ុន គឺមិនសូវយកបុគ្គលិកពីប្រទេសរបស់ពួកគាត់នោះទេ ស្របពេលដែលការវិនិយោគរបស់ពួកគាត់ ផ្ដោតខ្លាំងទៅលើគុណភាព ហើយក៏ចៀសវាងផលប៉ះពាល់លើបរិស្ថានជាដើម។
ក្រៅពីនេះទៀត លោកស្រីថា ការបោះទុនវិនិយោគទៅលើការសាងសង់ផ្ទះបន្តោងដើមឈើប្រណីតលំដាប់សណ្ឋាគារផ្កាយ ៥ ពិភពលោកនៅកម្ពុជា វានឹងបង្កើនការចាប់អារម្មណ៍ដល់ភ្ញៀវទេសចរមកទស្សនានៅកម្ពុជាផងដែរ។ លោកស្រីថ្លែងថា៖ «ប្រសិនជាបដិសណ្ឋារកិច្ចបែបលក្ខណៈលំដាប់ផ្កាយ ៥ នេះកើតឡើង វានឹងធ្វើការទាក់ទាញភ្ញៀវទេសចរច្រើនទូទាំងពិភពលោក ហើយក៏កាន់តែធ្វើឱ្យកេរ្តិ៍ឈ្មោះរបស់កម្ពុជា គឺកាន់តែល្បីរន្ទឺផងដែរតាមរយៈការវិនិយោគសេវាកម្មបែបនេះ»៕
