កម្មករកំពុងប្រមូលផលដូងប្រេងនៅចម្ការលោក ម៉ុង ឫទ្ធី។ រូបថត ហ្វេសប៊ុក ម៉ុង ឫទ្ធី
ភ្នំពេញៈ លោក ម៉ុង ឫទ្ធី អគ្គនាយកក្រុមហ៊ុន ម៉ុង ឫទ្ធី គ្រុប បានប្រាប់ឱ្យដឹងនៅថ្ងៃទី ៧ សីហាថា ការនាំចេញដូងប្រេងនៅឆមាសទី១ ឆ្នាំ ២០២៣ នេះ សម្រេចបាន ២២ ០០០ តោន ដោយសារបញ្ហារបាយទឹកភ្លៀងតិច បានធ្វើឱ្យទិន្នផលដូងប្រេងមានការធ្លាក់ចុះ តែធ្វើឱ្យតម្លៃផលិតមានការកើនឡើងខ្ពស់។
លោក ម៉ុង ឫទ្ធី បានប្រាប់យ៉ាងដូច្នេះថា៖ «ជាធម្មតាដូងប្រេងនៅពេលដែលផលវាធ្លាក់ចុះទឹកភ្លៀងតិច នោះតម្លៃផលិតវានឹងឡើងខ្ពស់វិញ។ អ៊ីចឹងបច្ចុប្បន្ន យើងលក់បានតម្លៃជាមធ្យមពី ៨០០ ទៅ ៨៥០ ដុល្លារ ក្នុង ១ តោន ហើយពីមុនមកបើយើងធៀបនឹងរយៈពេលដូចគ្នាកាលពីឆ្នាំមុន (២០២២) ជាមធ្យម ១ ៣០០ ដុល្លារ ក្នុង ១ តោន»។
លោកបន្ថែមថា កត្តាដែលធ្វើឱ្យតម្លៃដូងប្រេងនៅឆ្នាំនេះទាបជាងឆ្នាំមុន ក៏អាចដោយសារកត្តានៃតម្លៃខ្ពស់ នៅក្នុងឆ្នាំមុនដែរ ហើយម្យ៉ាងវិញទៀតស្ថានភាពនៃប្រទេសរុស្ស៊ី និងអ៊ុយក្រែន ការហាមឃាត់ការនាំចេញរបស់ឥណ្ឌូនេស៊ីក្នុងខែឧសភា ឆ្នាំ ២០២២ ផងដែរ។ លោកបានកត់សម្គាល់ឃើញទៀតថា តម្រូវការទីផ្សារខ្ពស់ជាងមុន ជាពិសេសបន្ទាប់ពីជំងឺកូវីដ ១៩ បានធូរស្បើយឡើងវិញប៉ុន្តែដោយសារការធ្លាក់ចុះនៃផលិតកម្ម ដោយសារតែទិន្នផលបានទាប ដោយសារទឹកភ្លៀងនេះបានធ្វើឱ្យផលចំណេញមានការធ្លាក់ចុះ ហើយត្រូវចំណាយច្រើនលើតម្លៃផលិតកម្ម។
លោក ម៉ុង ឫទ្ធីថា៖ «សព្វថ្ងៃខ្ញុំមានផ្ទៃដីដាំដុះ ១៦ ៥០០ ហិកតា ដោយក្នុង ១ ហិកតា អាចប្រមូលផលបានពី ១៦ ទៅ ២០ តោនក្នុង ១ ហិកតា ហើយដំណាំដូងប្រេងនេះ វាស៊ីទឹកណាស់ កាលណាមានភ្លៀងច្រើន ផលរបស់វាក៏បានច្រើនទៅតាមហ្នឹងដែរ។ បើកាលណាទឹកភ្លៀងមិនគ្រប់គ្រាន់ហើយ ផលក៏ថយទៅតាមហ្នឹងដែរ»។
ទាក់ទងនឹងផលប៉ះពាល់ នៃការប្រែប្រួលអាកាសធាតុចំពោះដំណាំនេះដែរ អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ កញ្ញា អ៊ឹម រចនា ធ្លាប់បានប្រាប់ឱ្យដឹងថា បញ្ហាប្រែប្រួលអាកាសធាតុនេះ ជាកត្តាធ្វើឱ្យប៉ះពាល់ដល់ដំណាំគ្រប់ប្រភេទ ដោយមិនអាចចៀសរួចបានឡើយ។ ក្រសួងកសិកម្មបានជូនដំណឹងពីផលប៉ះពាល់នេះ ចាប់តាំងពីការជូនដំណឹងពីការព្យាករអាកាសធាតុរបស់ក្រសួងធនធានទឹកតាំងពីមុនរួចហើយដើម្បីរកមធ្យោបាយកាត់បន្ថយផលប៉ះពាល់ការទប់ទល់ និងថែទាំដំណាំ ជាពិសេសក្នុងពេលដែលកម្ពុជាត្រូវរងឥទ្ធិពលពីបាតុភូត El Nino នេះ។
កញ្ញាបានបញ្ជាក់ដូច្នេះថា៖ «មន្ទីរកសិកម្មទូទាំង ២៥ រាជធានី ខេត្ត បានធ្វើការយ៉ាងជិតស្និទ្ធជាមួយនឹងកសិករ ដើម្បីជួយដល់កសិករ ក្នុងការផ្តល់បច្ចេកទេសនានា ដើម្បីកាត់បន្ថយផលប៉ះពាល់ដល់ដំណាំនានា ដោយសារបាតុភូត El Nino (គ្រោះរាំងស្ងួតអូសបន្លាយ)»។
កញ្ញាបន្តថា បាតុភូតនេះ នឹងត្រូវជះឥទ្ធិពលអាក្រក់ដល់ដំណាំគ្រប់ប្រភេទ ដោយមិនអាចចៀសបានទេប៉ុន្តែទន្ទឹមនឹងនោះ ក្រសួងកសិកម្មនៅតែបន្តធ្វើការជាមួយកសិករ ដែលត្រូវការជំនួយបច្ចេកទេស ដោយក្រសួងមានមន្ត្រីជំនាញកសិកម្ម សម្រាប់ផ្តល់យោបល់លើការបង្ការ និងទប់ស្កាត់ផលប៉ះពាល់ទាំងនោះ។
បើទោះជាតម្លៃដូងប្រេងហាក់មិនសូវល្អក៏ពិតមែន តែលោក ម៉ុង ឫទ្ធីបញ្ជាក់ថា លោកនឹងនៅតែបន្តផលិតដូងប្រេងនេះជាធម្មតា ដើម្បីផ្តល់ការងារ និងប្រាក់ចំណូលដល់ប្រជាពលរដ្ឋរាប់ពាន់គ្រួសារ ដែលត្រូវការចំណូលសម្រាប់ផ្គត់ផ្គង់គ្រួសារ និងអាស្រ័យផលតាមរយៈការធ្វើការងារនៅចម្ការ និងរោងចក្រចម្រាញ់ដូងប្រេងរបស់លោក។
ចម្ការដូងប្រេងរបស់លោក ម៉ុង ឫទ្ធី អាចប្រមូលផលបានចន្លោះពី ១ ៨០០ ទៅ ២ ០០០ តោន ក្នុង ១ ថ្ងៃ ដោយផ្លែដូងប្រេងទាំងនេះ ត្រូវបញ្ជូនចូលទៅក្នុងរោងចក្រចម្រាញ់ បន្ទាប់ពីបេះរួច ព្រោះថា បើពុំដូច្នោះទេ វានឹងស្អុយរលួយចោល ដោយសារតែអាស៊ីតឡើងខូចគុណភាព។
សូមជម្រាបថា បច្ចុប្បន្ន ក្រុមហ៊ុន ម៉ុង ឫទ្ធី គ្រុប មានរោងចក្រចម្រាញ់ដូងប្រេងចំនួន ២ ដោយរោងចក្រទី១ មានសមត្ថភាពចម្រាញ់ប្រេងប្រមាណ ៣០ តោន ក្នុង ១ ម៉ោង ខណៈរោងចក្រទី២ អាចចម្រាញ់បាន ៦០ តោន ក្នុង ១ ម៉ោង។ រោងចក្រទាំង ២ នេះ ដើរដោយថាមពលកកើតឡើងវិញ ដោយប្រើប្រាស់កាកសំណល់ដូងប្រេងដុតយកចំហាយទឹក ដើម្បីប្រើប្រាស់សម្រាប់ការផលិតអគ្គិសនីប្រើប្រាស់ក្នុងរោងចក្រវិញ និងមិនមានប្រើប្រាស់ប្រេងឥន្ធនៈសម្រាប់ផលិតអគ្គិសនីទេ។
របាយការណ៍ពីក្រសួងកសិកម្ម រុក្ខាប្រមាញ់ និងនេសាទ បានបង្ហាញថា នៅឆមាសទី១ ឆ្នាំ ២០២៣ នេះ ការនាំចេញដូងប្រេងសម្រេចបានក្នុងបរិមាណ ៣៣ ៩៧៥ តោនកើនឡើងជាង ៣៨ ភាគរយ បើធៀបនឹងរយៈពេលដូចគ្នាក្នុងឆ្នាំ ២០២២៕
