តំណាងអូស្ត្រាលី ក្នុងកិច្ចប្រជុំនៅទីស្នាក់ការនៃសភាពាណិជ្ជកម្មកម្ពុជា កាលពីថ្ងៃទី ៩ ខែសីហា។ រូបថត CCC
ភ្នំពេញៈ វិស័យឯកជននៃប្រទេសអូស្ត្រាលីគ្រោង នឹងបង្កើតការិយាល័យតំណាងពាណិជ្ជកម្មរបស់ខ្លួននៅប្រទេសកម្ពុជានាពេលឆាប់ៗនេះ ដើម្បីលើកកម្ពស់ការដោះដូរទំនិញ និងលំហូរវិនិយោគនៃប្រទេសទាំង ២ ជាពិសេសទាញយកប្រយោជន៍ពីការអនុវត្តនៃកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ (RCEP)។
អនុប្រធានសភាពាណិជ្ជកម្មកម្ពុជា លោក លឹម ហេង មានសុទិដ្ឋិនិយមថា ទំនាក់ទំនងពាណិជ្ជកម្មរវាងកម្ពុជា-អូស្ត្រាលី នឹងមានភាពមមាញឹក និងទំហំកាន់តែធំជាងមុន។
សភាពាណិជ្ជកម្មកម្ពុជា ដែលតំណាងដោយលោក លឹម ហេង កាលពីថ្ងៃទី ៩ ខែសីហា នៅទីស្នាក់ការនៃសភាពាណិជ្ជកម្មកម្ពុជា បានជួបពិភាក្សាការងារជាមួយ លោក Paul Keogh នាយកនៃ CAPRED ប្រចាំនៅកម្ពុជា និងលោក Ayden O''Neill លេខាទី ២ នៃស្ថានទូត អូស្ត្រាលីប្រចាំកម្ពុជា។
គោលបំណងនៃកិច្ចពិភាក្សានេះ គឺដើម្បីពិនិត្យលើដំណើរសកម្មភាពផ្នែកឯកជននៃយន្តការវេទិការដ្ឋាភិបាលផ្នែកឯកជន ដែលមានសភាពាណិជ្ជកម្មកម្ពុជា ជាតំណាងសម្របសម្រួលក្រុមការងារផ្នែកឯកជន និងជាលេខាធិការដ្ឋានផងដែរ។ កិច្ចពិភាក្សានេះក៏បានឯកភាពពិនិត្យ និងធ្វើយ៉ាងណាឱ្យយន្តការនេះមានភាពល្អប្រសើរ និងជួយសម្របសម្រួលដល់សកម្មភាព បរិយាកាសវិនិយោគរបស់អូស្ត្រាលីនៅកម្ពុជាផងដែរ។
ថ្លែងប្រាប់ ភ្នំពេញ ប៉ុស្តិ៍ នាថ្ងៃទី ១០ ខែសីហា លោក លឹម ហេង ឱ្យដឹងថា ជំនួបខាងលើពិតជាមានសារៈសំខាន់ណាស់ក្នុងការជំរុញកិច្ចសហប្រតិបត្តិរវាងផ្នែកឯកជននៃប្រទេសទាំង ២ ឱ្យបោះជំហានទៅមុខកាន់តែលឿនថែមទៀត ខណៈអូស្ត្រាលី និងកម្ពុជាសុទ្ធតែជាសមាជិកនៃកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ (RCEP)។
លោកបន្តថា នៅចំពោះមុខនេះអូស្ត្រាលីចង់ឃើញវត្តមានការិយាល័យតំណាងផ្នែកពាណិជ្ជកម្មរបស់ខ្លួននៅកម្ពុជា បន្ទាប់ពីផ្នែកឯកជនកម្ពុជាដែលតំណាងដោយសភាពាណិជ្ជកម្មកម្ពុជា បានបើកការិយាល័យចំនួន ២ រួចមកហើយនៅទីក្រុងមែលប៊ន និងស៊ីដនី ប្រទេសអូស្ត្រាលី កាលពីខែឧសភា។
លោកបញ្ជាក់ថា៖ «តាមរយៈជំនួបនេះ ផ្នែកឯកជនអូស្ត្រាលីក៏មានផែនការជំរុញដំណើរការបើកការិយាល័យតំណាងផ្នែកពាណិជ្ជកម្មរបស់ខ្លួននៅកម្ពុជាឱ្យបានឆាប់។ ការិយាល័យផ្នែកពាណិជ្ជកម្មនឹងជួយធ្វើឱ្យសកម្មភាពនៃការផ្លាស់ប្តូរពាណិជ្ជកម្មប្រទេសទាំង ២ កើនឡើង ១ កម្រិតទៀត»។
បើតាមលោក លឹម ហេង ផលិតផលសក្តានុពលដែលកម្ពុជានាំចេញទៅអូស្ត្រាលី មានដូចជា ផលិតផលវាយនភណ្ឌ កង់ និងកសិកម្ម ចំណែកទំនិញដែលកម្ពុជានាំចូលមកវិញ រួមមាន ផលិតផលអេឡិចត្រូនិក ឱសថ និងយានយន្ត ជាដើម។
CAPRED ជាកម្មវិធីអភិវឌ្ឍន៍សេដ្ឋកិច្ចដ៏សំខាន់របស់ប្រទេសអូស្ត្រាលី នៅកម្ពុជា ដែលគាំទ្រប្រទេសកម្ពុជាក្នុងការប្រើប្រាស់កិច្ចព្រមព្រៀងពាណិជ្ជកម្មសេរី ការរៀបចំខ្លួនសម្រាប់ការចាកចេញពីឋានៈជាប្រទេសអភិវឌ្ឍន៍តិចតួច ការលើកកម្ពស់គោលនយោបាយ និងការអនុវត្តពាណិជ្ជកម្ម និងការវិនិយោគប្រកបដោយបរិយាប័ន្ន និងកសាងប្រព័ន្ធដើម្បីបង្កើនពាណិជ្ជកម្ម និងការវិនិយោគ។
អគ្គនាយកដ្ឋានគយ និងរដ្ឋាករកម្ពុជា ឱ្យដឹងថា នៅរយៈពេល ៧ ខែនៃឆ្នាំ ២០២៣ ការផ្លាស់ប្តូរពាណិជ្ជកម្មរវាងកម្ពុជា អូស្ត្រាលី មានទឹកប្រាក់សរុប ២៩៥,៤៧ លានដុល្លារ ថយចុះ ៧,៧ ភាគរយបើធៀបរយៈពេលដូចគ្នាឆ្នាំ ២០២២ ដោយក្នុងនោះទំនិញកម្ពុជានាំទៅអូស្ត្រាលី មានទឹកប្រាក់ ២០១,៦លានដុល្លារ ធ្លាក់ចុះ ៩,៤ ភាគរយ និងអូស្ត្រាលីនាំមកកម្ពុជា ៩៣,៨៨ លានដុល្លារ ធ្លាក់ចុះ ៣,៩ ភាគរយ។ អូស្ត្រាលី គឺជាដៃគូពាណិជ្ជកម្មធំទី ១៨ របស់កម្ពុជា ដែលនាំមុខដោយប្រទេសមួយចំនួនដូចជា ចិន អាមេរិក វៀតណាម ថៃ ជប៉ុន សិង្ហបុរី ឥណ្ឌូនេស៊ី អាល្លឺម៉ង់ និងកាណាដា ជាដើម៕
