រូបិយប័ណ្ណដុល្លារបស់សហរដ្ឋអាមេរិក និងយ៉េនរបស់ជប៉ុន។ រូបថត AFP
ប្រាក់ដុល្លារស្ទុះងើបឡើងវិញ ក្រោយពេលដែលវិនិយោគិនបានរួមចំណែកធ្វើឱ្យប្រសើរឡើងបន្តិចនៃកម្រិតអតិផរណា ខណៈប្រាក់យ៉េនរបស់ជប៉ុនបន្តដាំក្បាលចុះ។ ទោះយ៉ាងណា កម្រិតអតិផរណានេះនៅតែលើសគោលដៅអតិផរណារបស់ទុនបម្រុងសហព័ន្ធ (ជាប្រព័ន្ធមួយនៃធនាគារកណ្តាលរបស់សហរដ្ឋអាមេរិក) ចំនួន ២% ដដែល។
ប្រាក់ដុល្លារបានហក់ឡើងដល់កំពូល ក្នុងរយៈពេលប្រាំសប្តាហ៍បើធៀបទៅនឹងប្រាក់យ៉េន។ រហូតមកដល់ពេលនេះ ប្រាក់ដុល្លារបានកើនឡើង ១០.៤% បើធៀបនិងរូបិយប័ណ្ណជប៉ុន។ ជាមួយគ្នានេះលុយដុល្លាររបស់សហរដ្ឋអាមេរិកក៏កើនខ្ពស់ជាងប្រាក់អឺរ៉ូផងដែរ ដោយការផ្លាស់ប្តូរចុងក្រោយគឺកើនលើស ០.១%។ ការស្ទុះងើបឡើងវិញនៃប្រាក់ដុល្លារ ធៀបនឹងប្រាក់អឺរ៉ូ និងប្រាក់យ៉េន បានជំរុញឱ្យសន្ទស្សន៍ប្រាក់ដុល្លារផ្តើមឡើងថ្លៃវិញផងដែរ។
កាលពីខែមិថុនា កន្លងទៅប្រាក់ដុល្លារបានធ្លាក់ចុះ ដោយសារតែសន្ទស្សន៍តម្លៃទំនិញប្រើប្រាស់ (CPI) បានកើនឡើង ០.២%។ ការកើនឡើងនេះ បានធ្វើឱ្យសន្ទស្សន៍តម្លៃទំនិញប្រើប្រាស់កើនពី ៣.០ភាគរយមកដល់ ៣.២% ក្នុងរយៈពេល ១២ ខែ។
ប្រធានធនាគារកណ្តាល San Francisco Federal លោកស្រី Mary Daly កាលពីថ្ងៃព្រហស្បតិ៍ បាននិយាយថា វឌ្ឍនភាពបន្ថែមគឺជារឿងចាំបាច់ដើម្បីទប់ទល់នឹងអតិផរណា ទោះបីជាវាកំពុងដើរលើទិសដៅ ត្រឹមត្រូវក៏ដោយ។
លោកស្រីបានបន្តថា សន្ទស្សន៍តម្លៃទំនិញប្រើប្រាស់ខែកក្កដាល្អប្រសើរវិញ មិនមានន័យថា ធនាគារកណ្តាលអាចប្រកាសជ័យជម្នះលើអតិផរណាទេ និងបន្ថែមថាទីផ្សារការងារនៅមិនទាន់មានតុល្យភាពនៅឡើយ។
ទាក់ទិនទៅនឹងការធ្លាក់ចុះនៃប្រាក់យ៉េន ក្រុមអ្នកវិភាគបានឱ្យដឹងថា មូលហេតុចម្បងគឺមកពីតម្លៃប្រេងឡើងថ្លៃ ដោយហេតុថាជប៉ុនគឺជាប្រទេសដែលនាំចូលប្រេងដ៏ធំបំផុតមួយក្នុងពិភពលោក។
ស្របពេលជាមួយគ្នានេះ ក្រុមវិនិយោគិនក៏កំពុងស្វែងរកការអន្តរាគមន៍ពីរដ្ឋាភិបាលជប៉ុនតាមដែលអាចធ្វើទៅបានដើម្បីឱ្យប្រាក់យ៉េនកើនឡើងវិញ៕
