លោក យក់ ចំរើនរិទ្ធិ អគ្គនាយកក្រុមហ៊ុន Forte ប្រចាំនៅកម្ពុជា ផ្ដល់បទសម្ភាសជាមួយកាសែតភ្នំពេញ ប៉ុស្តិ៍ កាលពីឆ្នាំ ២០១៩។ រូបថត ភ្នំពេញ ប៉ុស្តិ៍
ភ្នំពេញៈ ឧស្សាហកម្មធានារ៉ាប់រងព្រះរាជាណាចក្រកម្ពុជា នៅតែដំណើរការល្អក្នុងឆមាសទី១ ឆ្នាំនេះ បើទោះបីភាពមិន ច្បាស់លាស់សេដ្ឋកិច្ចក្នុងតំបន់ និងពិភពលោកដែលបណ្តាលមកពីសង្គ្រាមរវាងប្រទេសរុស្ស៊ី និងអ៊ុយក្រែន បន្តប៉ះពាល់ដល់សកម្មភាពអាជីវកម្ម និងប្រាក់ចំណូលប្រជាជនក៏ដោយ។
ទិន្នន័យពីនិយ័តករធានារ៉ាប់រងកម្ពុជា (IRC) ដែលបានចេញផ្សាយនាពេលថ្មីៗនេះ បង្ហាញថា បុព្វលាភសរុបនៃឧស្សាហកម្មមួយនេះបានកើនឡើងដល់ ៨១,២ លានដុល្លារនៅក្នុងត្រីមាសទី២ ឆ្នាំ ២០២៣ កើនឡើង ៦,៣ ភាគរយពី ៧៦,៣ លានដុល្លារក្នុងរយៈពេលដូចគ្នាកាលពីឆ្នាំមុន។ ក្នុងនោះបុព្វលាភធានារ៉ាប់រងសរុបដែលបានពីធានារ៉ាប់រងទូទៅបានកត់ត្រាចំនួន ៣៣,៣ លានដុល្លារនៅត្រីមាសទី២ ឆ្នាំនេះបើធៀបនឹង ២៨,៦១ លានដុល្លារក្នុងរយៈពេលដូចគ្នាកាលពីឆ្នាំមុន កើនឡើង ១៦,៤ភាគរយ ខណៈបុព្វលាភធានារ៉ាប់រងអាយុជីវិត ចំនួន ៤៦,១ លានដុល្លារ ធ្លាក់ចុះ ០,១៣ភាគរយ និងបុព្វលាភធានារ៉ាប់រងខ្នាតតូច ១,៧ លានដុល្លារ កើនឡើង ១២,៣ ភាគរយ។
លោក យុគ ចំរើនរិទ្ធ អគ្គនាយកក្រុមហ៊ុន Forte បានប្រាប់ ភ្នំពេញ ប៉ុស្តិ៍ថា សម្រាប់ឧស្សាហកម្មមួយនេះគឺនៅកើនឡើងបន្តិចនៃបុព្វលាភធានារ៉ាប់រងក្នុងវិស័យអគ្គិភ័យ យានយន្ត និងជាពិសេសវិស័យសំណង់ ប៉ុន្តែមានការធ្លាក់ចុះការធានារ៉ាប់រងផ្នែកវេជ្ជសាស្ត្រ។
លោកបានបន្តថា បុព្វលាភធានារ៉ាប់រងនៃក្រុមហ៊ុន Forte បានកើនឡើងប្រហែល ៨ ភាគរយ នៅឆមាសទី១ ឆ្នាំ ២០២៣ នេះ ជាពិសេសនៅផ្នែកយានយន្ត អចលនទ្រព្យ និងសំណង់ ខណៈការធានារ៉ាប់រងផ្នែកវេជ្ជសាស្ត្រធ្លាក់ចុះ។
លោកថ្លែងថា៖ «ខ្ញុំកត់សម្គាល់ឃើញថា ផលប៉ះពាល់ដោយសារការធ្លាក់ចុះជាបន្តបន្ទាប់នៃសេដ្ឋកិច្ចពិភពលោកក៏ប៉ះពាល់ដល់កំណើនយឺតរបស់ឧស្សាហកម្មនេះផងដែរ ខណៈយើងក៏កំពុងប្រឈមមុខនឹងការប្រកួតប្រជែងយ៉ាងខ្លាំងនៅក្នុងចំណោមក្រុមហ៊ុនជាច្រើនផ្សេងទៀត។ យើងទទួលការធ្លាក់ចុះបុព្វលាភពីធានារ៉ាប់រងផ្នែកវេជ្ជសាស្ដ្រ ប៉ុន្តែយើងក៏បង្កើនការចំណាយលើប្រាក់សំណង ដែលបានបង់សម្រាប់ការធានារ៉ាប់រងផ្នែកវេជ្ជសាស្ត្រ»។
លោក ប៊ូ ចាន់ភីរូ អគ្គនាយក IRC កន្លងមកធ្លាប់បានថ្លែងថា ទីផ្សារធានារ៉ាប់រងកម្ពុជានៅតែរីកចម្រើនឆាប់រហ័សក្នុងអត្រាប្រចាំឆ្នាំមធ្យមប្រហែល ២៥ ភាគរយ ទោះមានការរីករាលដាលជំងឺកូវីដ ១៩។ លោកបន្តថា ក្នុងនោះក៏មានដាក់ចេញនូវផែនការយុទ្ធសាស្ត្រអភិវឌ្ឍន៍វិស័យធានារ៉ាប់រង ឆ្នាំ ២០២១-២០៣០ ដោយបានដាក់ចេញផែនទីបង្ហាញផ្លូវសម្រាប់ភ្នាក់ងារនេះក្នុងរយៈពេលខ្លី មធ្យម និងរយៈពេលវែង។
ក្របខ័ណ្ឌយុទ្ធសាស្ត្ររយៈពេលខ្លី ឆ្នាំ ២០២១-២០២៣ កំណត់ប្រព័ន្ធចែកចាយធានារ៉ាប់រងដោយផ្តោតជាពិសេសលើការលើកកម្ពស់ការលក់ផលិតផលតាមរយៈធនាគារ និងគ្រឹះស្ថានហិរញ្ញវត្ថុ ក្នុងការរៀបចំដែលគេស្គាល់ថា Bancassurance។
យោងតាមលោក ប៊ូ ចាន់ភីរូ អនុបាតនៃ GWP ជាតិធៀបនឹងផលិតផលក្នុងស្រុកសរុប (GDP) មានប្រហែល ១,១ ភាគរយ។
លោក រស់ សីលវ៉ា រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ បានថ្លែងក្នុងព្រឹត្តិការណ៍កាលពីចុងខែកក្កដាថា ឧស្សាហកម្មធានារ៉ាប់រងនៅប្រទេសកម្ពុជាកំពុងទទួលបានកំណើនសក្តានុពលនៅក្នុងរយៈពេល ២ ទសវត្សរ៍ចុងក្រោយនេះ ប៉ុន្តែមានការខ្វះខាតការយល់ដឹងជាសាធារណៈអំពីការទទួលបានធានារ៉ាប់រងសម្រាប់ការការពារហានិភ័យរបស់ពួកគេ។
លោកថ្លែងថា៖ «យើងមើលឃើញថាមានការខ្វះខាតការយល់ដឹងជាសាធារណៈពីអត្ថប្រយោជន៍នៃការធានារ៉ាប់រង ទោះបីឧស្សាហកម្មនេះនៅតែរីកចម្រើនក៏ដោយ។ មានតម្រូវការសម្រាប់ឧស្សាហកម្មនេះក្នុងការផ្តល់ការអប់រំបន្ថែមដល់ប្រជាជនអំពីតម្លៃរបស់ឧស្សាហកម្មមួយនេះ»។
ទិន្នន័យពី IRC បង្ហាញថា គិតត្រឹមដំណាច់ខែមិថុនា ឆ្នាំ ២០២៣ ឧស្សាហកម្មមួយនេះមានក្រុមហ៊ុនធានារ៉ាប់រងទូទៅចំនួន ១៨, ក្រុមហ៊ុនធានារ៉ាប់រងអាយុជីវិត ១៤, ក្រុមហ៊ុនធានារ៉ាប់រងខ្នាតតូច ៧ ក្រុមហ៊ុនធានារ៉ាប់រងឡើងវិញចំនួន ១ និងឈ្មួញកណ្តាលធានារ៉ាប់រង ២០ ភ្នាក់ងារសាជីវកម្ម និងក្រុមហ៊ុនកែតម្រូវការខាតបង់ចំនួន ៣៤។ ទ្រព្យសកម្មសរុបរបស់វិស័យនេះបានកើនដល់ជាង ១ ពាន់លានដុល្លារគិតត្រឹមត្រីមាសទី ២ ឆ្នាំនេះ កើន ១០,៨ ភាគរយបើធៀបនឹងរយៈពេលដូចគ្នាកាលពីឆ្នាំ ២០២២។
បុព្វលាភធានារ៉ាប់រងដែលសរសេរជាលាយលក្ខណ៍អក្សរសរុប (GWP) របស់វិស័យធានារ៉ាប់រងកម្ពុជា សម្រាប់ឆ្នាំ ២០២២ មាន ៣៣១,៨៧ លានដុល្លារកើនឡើង ១០,៦៨ ភាគរយពី ២៩៩,៨៣៥ លានដុល្លារកាលពីឆ្នាំមុន។ នេះបើយោងតាមរបាយការណ៍របស់ IRC៕
