កាហ្វេរ៉ូប៊ូស្តា ដែលក្រសួងកសិកម្មលើកទឹកចិត្ដឱ្យកសិករដាំបន្ថែម។ រូបថត Yang Saing Koma FB
ភ្នំពេញៈ មន្ត្រីជាន់ខ្ពស់ក្រសួងកសិកម្មបានឱ្យដឹងថា ដោយសារការទទួលទានកាហ្វេនៅកម្ពុជាមានការកើនឡើងគួរឱ្យកត់សម្គាល់ ក្រសួងកសិកម្មកំពុងគាំទ្រឱ្យមានការពង្រីកដាំកាហ្វេរ៉ូប៊ូស្តា និងការប្រើប្រាស់កាហ្វេនេះនៅកម្ពុជាឱ្យច្រើនថែមទៀត ខណៈបច្ចុប្បន្នការដាំដុះកាហ្វេប្រភេទនេះ នៅមានតិចតួចនៅឡើយ។
លោក យ៉ង សាំងកុមារ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទបានឱ្យដឹងនៅថ្ងៃទី ២២ ខែសីហា ឆ្នាំ ២០២៣ ថា នៅកម្ពុជា កាហ្វេរ៉ូប៊ូស្តា នៅមានចំនួនតិចតួចនៅឡើយទេ ខណៈដែលកាហ្វេប្រភេទនេះ ស័ក្តិសមនឹងសណ្ឋានដីនៅក្នុងខេត្តមណ្ឌលគិរីបំផុត ដោយសារតែជាតំបន់ខ្ពង់រាប មានអាកាសធាតុត្រជាក់ និងមានភ្លៀងធ្លាក់ច្រើនដែលធ្វើឱ្យវាលូតលាស់បានល្អ។
លោកបានបន្ថែមថា សព្វថ្ងៃនេះ ខេត្តមណ្ឌលគិរី មានដាំដុះកាហ្វេច្រើនគួរសម តែនៅតិចជាងតម្រូវការនាពេលបច្ចុប្បន្ន ដែលធ្វើឱ្យកម្ពុជាត្រូវនាំចូលកាហ្វេបន្ថែមពីក្រៅប្រទេស។
លោកបានបញ្ជាក់ថា៖ «បច្ចុប្បន្នកាហ្វេកំពុងតែលក់បានតម្លៃខ្ពស់នៅលើទីផ្សារ ហើយក្រសួងកំពុងពិនិត្យមើលថា តើមានកសិករណាខ្លះដែលចាប់អារម្មណ៍ចង់ពង្រីកការដាំដុះកាហ្វេនេះដើម្បីជួយលើការងារមួយចំនួនក្នុងការរុញឱ្យគាត់ទទួលបានផលចំណេញកាន់តែច្រើនពីការដាំដុះកាហ្វេ»។
លោកបានបន្តថា ក្រសួងមិនទាន់មានតួលេខច្បាស់លាស់ពីការដាំដុះកាហ្វេនេះនៅឡើយ តែតាមការប៉ាន់ស្មានផ្ទៃដីដាំដុះកាហ្វេនៅមណ្ឌលគិរីមានត្រឹមខ្ទង់រយហិកតាប៉ុណ្ណោះ ដែលការដាំដុះរួមមាន កាហ្វេអារ៉ាប៊ីកាមានតិចតួច និងកាហ្វេរ៉ូប៊ូស្តា មានច្រើន។
ចំពោះមូលហេតុដែលក្រសួងកសិកម្មចង់ឱ្យពង្រីកការដាំដុះកាហ្វេរ៉ូប៊ូស្តាជាងដាំកាហ្វេអារ៉ាប៊ីកា នោះ លោកយ៉ង សាំងកុមារ បានពន្យល់ថា៖ «កាហ្វេប្រភេទអារ៉ាប៊ីកានេះ មិនស័ក្តិសមនឹងការដាំដុះនៅកម្ពុជាទេ ដោយសារតែវាត្រូវការទីតាំងខ្ពស់ខ្លាំង អាកាសធាតុត្រជាក់ខ្លាំង និងមានភ្លៀងច្រើនទើបលូតលាស់បានល្អ។ តែចំពោះរ៉ូប៊ូស្តាវិញអាចដាំបាននៅតំបន់ខ្ពង់រាបដូចមណ្ឌលគិរី អាកាសធាតុត្រជាក់ល្មម និងមានភ្លៀងច្រើនផងដែរ។ ដូចនេះកសិករយើងដាំដុះអាចទទួលផលច្រើន»។
លោក ឆាយ មុនី នាយកហិរញ្ញវត្ថុនៃក្រុមហ៊ុនខូហ្វី (KOFI) បានឱ្យដឹងដែរថា កាលពីថ្ងៃទី ២១ ខែសីហា ឆ្នាំ ២០២៣ ក្រុមហ៊ុនខូហ្វី បានសហការជាមួយនឹងមន្ទីរកសិកម្មខេត្តមណ្ឌលគិរី ក្រោមជំនួយឧបត្ថម្ភរបស់មូលនិធិហូឡង់សម្រាប់អាកាសធាតុ និងការអភិវឌ្ឍ (DFCD) តាមរយៈអង្គការ SNVប្រចាំនៅកម្ពុជាក្នុងដំណាក់កាលទី ១ នៃគម្រោង «អភិវឌ្ឍន៍ដំណាំកាហ្វេប្រកបដោយចីរភាព» បានចែកកូនពូជកាហ្វេដល់កសិករចំនួន ២១ គ្រួសារ ក្នុងចំណោមកសិករគោលដៅ ៣០០ គ្រួសារមកពីស្រុកពេជ្រាដា ស្រុកអូររាំង និងក្រុងសែនមនោរម្យនៃខេត្តមណ្ឌលគិរី។
លោកបានបន្តថា កូនពូជកាហ្វេដែលបានផ្តល់ជូនកសិករនោះគឺជាពូជដែលមានភាពធន់ទៅនឹងអាកាសធាតុ ស្ថានភាពដីក្នុងតំបន់ ធន់ជំងឺ និងផ្តល់ទិន្នផលខ្ពស់ ព្រោះពូជកាហ្វេទាំងនេះត្រូវបានសិក្សាយ៉ាងលម្អិតដោយក្រុមការងារបចេ្ចកទេសរបស់មន្ទីរកសិកម្មរុក្ខាប្រមាញ់ និងនេសាទខេត្តមណ្ឌលគិរី ជាមួយនឹងដៃគូជំនាញបច្ចេកទេសផ្នែកផលិតពូជ និងដាំដុះកាហ្វេមកពីវិទ្យាស្ថានស្រាវជ្រាវកសិកម្ម WASI។
លោក ឆាយ មុនី បានបញ្ជាក់ថា៖«សកម្មភាពទាំងនេះបានបង្ហាញពីឆន្ទៈខ្ពស់របស់ក្រុមហ៊ុនខូហ្វី និងមន្ទីរកសិកម្មក្នុងការផ្តល់ការគាំទ្រដល់ប្រជាកសិករដាំកាហ្វេក្នុងខេត្តមណ្ឌលគិរីដើម្បីពង្រឹងគុណភាព និងពង្រីកការដាំដុះដំណាំកាហ្វេឱ្យស្របតាមស្តង់ដាបច្ចេកទេសដើម្បីបង្កើនផលិតភាពកាន់តែខ្ពស់ក្នុងការឆ្លើយតបនឹងតម្រូវការទីផ្សារ និងរក្សាបាននូវគុណតម្លៃរបស់ផលិតផលកាហ្វេក្នុងស្រុក»។
ទាំងនេះជាកត្តាចម្បងក្នុងការរួមចំណែកបង្កើនកម្រិតជីវភាពរស់នៅរបស់បងប្អូនជនជាតិដើមភាគតិចក្នុងខេត្តមណ្ឌលគិរីឱ្យកាន់តែល្អប្រសើរជាងមុន។
បើតាមលោក ឆាយ មុនី ជំហានបន្ទាប់ ក្រុមហ៊ុនខូហ្វីនឹងបន្តកិច្ចសហការជាមួយមន្ទីរកសិកម្មខេត្តមណ្ឌលគិរីដើម្បីបណ្តុះបណ្តាលដល់កសិករពីបច្ចេកទេសដាំដុះថែទាំ និងការប្រមូលផលកាហ្វេដើម្បីធានាបាននូវផលិតផលដែលមានគុណភាពខ្ពស់អាចប្រកួតប្រជែងនៅលើទីផ្សារបាន៕
