សិក្ខាសាលាស្តីពី “នីតិវិធី និងបែបបទនៃការនាំចេញផលិផលចំណីអាហារ និងទំនិញទៅកាន់ទីផ្សារសហរដ្ឋអាមេរិក” កាលពីថ្ងៃទី ៣០ ខែសីហា។ រូបថត CCC
ភ្នំពេញៈ សភាពាណិជ្ជកម្មកម្ពុជា (CCC) សហការជាមួយស្ថានអគ្គកុងស៊ុល ទីក្រុងឡុងប៊ិច នៃរដ្ឋកាលីហ្វ័រនីញ៉ាសហរដ្ឋអាមេរិក នឹងរួមគ្នារៀបចំវេទិកាពាណិជ្ជកម្ម និងពិព័រណ៍ រយៈពេល ២ ថ្ងៃជាលើកដំបូង ដើម្បីបង្ហាញផលិតផលកែច្នៃ ម្ហូប-អាហារ និងផលិតផលកសិកម្ម ក្នុងគោលបំណងជំរុញពាណិជ្ជកម្មទ្វេភាគី ក៏ដូចជាទាក់ទាញការវិនិយោគកាន់តែច្រើនរវាងប្រទេសទាំង ២។
លោក លឹម ហេង អនុប្រធាន CCC បានប្រាប់ ភ្នំពេញ ប៉ុស្តិ៍ នៅថ្ងៃទី ៣១ ខែសីហាថា លោកបានចូលរួមជាអធិបតីនៅក្នុងសិក្ខាសាលាមួយ កាលពីថ្ងៃទី ៣០ ខែសីហា ជាមួយអគ្គកុងស៊ុលកិត្តិយសកម្ពុជា ដើម្បីផ្សព្វផ្សាយអំពីពិព័រណ៍នៅភ្នំពេញ ក្នុងគោលបំណងអញ្ជើញក្រុមហ៊ុនផលិតក្នុងស្រុកទាំងអស់ឱ្យចូលរួមក្នុងក្នុងពិព័រណ៍នៅពេលខាងមុខនេះ។
លោកបានថ្លែងថា៖ «សភាពាណិជ្ជកម្មកម្ពុជា សហការជាមួយស្ថានអគ្គកុងស៊ុលនៅទីក្រុងឡុងប៊ិច រដ្ឋកាលីហ្វ័រនីញ៉ា សហរដ្ឋអាមេរិក នឹងរៀបចំពិព័រណ៍នៅថ្ងៃទី ៩-១០ ខែវិច្ឆិកា និងវេទិកាធុរកិច្ច ដើម្បីបង្ហាញផលិតផលកសិកម្មរបស់យើង ពិសេសផលិតផលអាហារ ដើម្បីស្វែងរកទីផ្សារថែមទៀតនៅទីនោះ»។
លោកលើកឡើងថា៖ «ជាការពិត យើងបាននាំចេញផលិតផលកសិកម្មដូចជាអង្ករ និងផលិតផលកសិកម្មស្ងួត។ ទោះបីយ៉ាងណា វានៅតែមានចំនួនតិចតួច ដែលជាមូលហេតុយើងត្រូវតែព្យាយាម ជំរុញបន្ថែមទៀត ដើម្បីដាក់លក់នៅទីនោះ និងដើម្បីឱ្យយើងអាចលើកកម្ពស់ពាណិជ្ជកម្មទ្វេភាគីប្រទេសយើងទាំង ២ ឱ្យកាន់តែកើនឡើងថែមទៀត»។
លោកបន្តថា៖ «យើងមើលឃើញថាការផ្លាស់ប្តូរពាណិជ្ជកម្មរបស់យើងកំពុងកើនឡើង ខណៈអាមេរិក គឺជាដៃគូពាណិជ្ជកម្មឈានមុខគេរបស់យើងរហូតមកដល់ពេលនេះ។ យើងសង្ឃឹមថា តាមរយៈពិព័រណ៍ និងវេទិកាធុរកិច្ចនេះ យើងនឹងអាចស្វែងរកដៃគូពាណិជ្ជកម្មបន្ថែមទៀត ដើម្បីពង្រីកការនាំចេញអាហារ និងផលិតផលកសិកម្មផ្សេងទៀតរបស់យើងទៅអាមេរិក។ ការណ៍នេះក៏នឹងបង្កើតឱកាសសម្រាប់វិនិយោគិនក្នុងស្រុក និងអាមេរិក និងពាណិជ្ជករក្នុងការវិនិយោគលើការកែច្នៃអាហារសម្រាប់ការនាំចេញដល់ពួកគេ»។
ពិព័រណ៍នេះ គឺជាពិព័រណ៍លើកដំបូងនៃធុរកិច្ចកម្ពុជាដែលនឹងធ្វើឡើងនៅទីក្រុងឡុងប៊ិច។ ព្រឹត្តិការណ៍នេះនឹងមិនគិតថ្លៃដែលនឹងបើកជាសាធារណៈចាប់ពីម៉ោង ១០:០០ ព្រឹកដល់ ៣:០០ រសៀលនៅព្រលានយន្តហោះ Holiday Inn Long Beach។ នេះបើតាមអគ្គកុងស៊ុលប្រចាំទីក្រុងឡុងប៊ិច។
លោក គឹម ឆាហួត អគ្គកុងស៊ុលកិត្តិយសកម្ពុជា បានឱ្យដឹងក្នុងសេចក្តីជូនដំណឹងពីមុនថា ពិព័រណ៍ពាណិជ្ជកម្មនេះនឹងផ្តល់កន្លែងសម្រាប់ទីផ្សារទំនិញកម្ពុជាទៅកាន់អ្នកប្រើប្រាស់នៅអាមេរិក និងបង្កើតទំនាក់ទំនងដោយផ្ទាល់រវាងពាណិជ្ជករនៃប្រទេសទាំង ២។
លោកបញ្ជាក់ថា៖ «ព្រឹត្តិការណ៍នេះបង្ហាញពីវេទិកាដែលមិនអាចប្រៀបផ្ទឹមបាន ដើម្បីបង្ហាញពីផលិតផលចម្រុះរបស់កម្ពុជា។ អ្នកចូលរួមនឹងមានឱកាសស្វែងយល់ និងពិសោធផលិតផលដូចជា មុខម្ហូបខ្មែរប្លែកៗ រួមមានអង្ករ ម្រេច គ្រាប់ស្វាយចន្ទី និងផលិតផលប្លែកៗជាច្រើនទៀត»។
សមាជិកគណៈប្រតិភូមួយចំនួននឹងមានបំណងចង់និយាយអំពីចក្ខុវិស័យនៃការវិនិយោគនៅក្នុងទីផ្សារអាមេរិក។ នេះបើយោងតាមលោក គីមឆា។
យោងតាមទិន្នន័យបណ្តោះអាសន្នរបស់អគ្គនាយកដ្ឋានពន្ធដារ និងរដ្ឋាករកម្ពុជា (GDCE) ពាណិជ្ជកម្មទំនិញរវាងកម្ពុជា និងអាមេរិកបានកើនឡើងដល់ ៣,២៩២ ពាន់លានដុល្លារក្នុងរយៈពេល ៥ ខែដំបូងឆ្នាំ ២០២៣ ធ្លាក់ចុះ ១៤,៨០ ភាគរយ ធៀបនឹងរយៈពេលដូចគ្នាកាលពីឆ្នាំមុន៕
