លោកនាយករដ្ឋមន្ត្រី ហ៊ុន ម៉ាណែត និងមេដឹកនាំប្រទេសសមាជិកអាស៊ានផ្សេងទៀត នៅក្នុងកិច្ចប្រជុំកំពូលអាស៊ាន កាលពីម្សិលមិញ។ រូប AFP
ភ្នំពេញៈ នាយករដ្ឋមន្ត្រីជាប់ឆ្នោតថ្មីរបស់កម្ពុជា លោក ហ៊ុន ម៉ាណែត បានអំពាវនាវឱ្យមេដឹកនាំអាស៊ាន និងសហគមន៍ធុរកិច្ចត្រូវពង្រឹង និងធ្វើឱ្យកាន់តែស៊ីជម្រៅការធ្វើសមាហរណកម្មសេដ្ឋកិច្ចអាស៊ាន ព្រមទាំងជំរុញការធ្វើពាណិជ្ជកម្ម និងការវិនិយោគក្នុងអាស៊ាន ខណៈរដ្ឋសមាជិកទាំងអស់កំពុងប្រឈមមុខនឹងបញ្ហាសកលជាច្រើនរួមទាំងការប្រកួតប្រជែងភូមិសាស្ត្រនយោបាយ ក៏ដូចជាសង្គ្រាមរវាងរុស្ស៊ី-អ៊ុយក្រែន។
ថ្លែងក្នុងកិច្ចប្រជុំកំពូលធុរកិច្ច និងការវិនិយោគអាស៊ាន (AB-IS) ឆ្នាំ ២០២៣ នៅក្នុងទីក្រុងហ្សាការតា ប្រទេសឥណ្ឌូនេស៊ី កាលពីថ្ងៃទី ៤ ខែកញ្ញា លោកនាយករដ្ឋមន្ដ្រីបានបង្ហាញថា រដ្ឋជាសមាជិកអាស៊ានទាំងអស់កំពុងរស់ក្នុងគ្រាលំបាកដោយសារតែភាពមិនច្បាស់លាស់។ ការប្រកួតប្រជែងភូមិសាស្ត្រនយោបាយរវាងមហាអំណាចធំៗកំពុងបង្កភាពតានតឹងដែលបណ្តាលឱ្យមានការផ្លាស់ប្តូរឥតឈប់ឈរចំពោះសេដ្ឋកិច្ច និងពាណិជ្ជកម្មក្នុងតំបន់ និងពិភពលោក។
សង្គ្រាមនៅអ៊ុយក្រែនដែលកំពុងបន្តផលប៉ះពាល់ដោយផ្ទាល់ និងដោយប្រយោល។ លោកថ្លែងថា៖ «ក្នុងបរិបទតំបន់ និងពិភពលោកបច្ចុប្បន្ន ដើម្បីសម្រេចបានវិបុលភាពរួម វាជាការចាំបាច់ណាស់ដែលត្រូវពង្រឹង និងធ្វើឱ្យសមាហរណកម្មសេដ្ឋកិច្ចអាស៊ានឱ្យកាន់តែស៊ីជម្រៅបន្ថែមទៀត រួមចំណែកដល់ការបង្រួមគម្លាតអភិវឌ្ឍន៍ក្នុងអាស៊ានខ្លួនឯង»។
លោកបន្តទៀតថា ការជំរុញពាណិជ្ជកម្ម និងការវិនិយោគក្នុងតំបន់អាស៊ាន ជាពិសេសគួរមានអត្ថន័យ ហើយមិនទុកនរណាម្នាក់ដោយមិនទទួលបានការយកចិត្តទុកដាក់នោះទេ។ លោកបន្តថា៖ «ដើម្បីសម្រេចបានចក្ខុវិស័យនេះ អាស៊ានត្រូវតែបង្កើនការខំប្រឹងប្រែងរួមគ្នាដើម្បីទទួលបានការបញ្ចប់ទាន់ពេលវេលានៃការធ្វើឱ្យប្រសើរឡើងការសម្លឹងឆ្ពោះទៅមុខ និងការធ្វើឱ្យប្រសើរឡើងនៃកិច្ចព្រមព្រៀងពាណិជ្ជកម្មទំនិញអាស៊ានជាក់ស្តែង»។
លោកបន្ថែមថា អាស៊ានគួរប្រើប្រាស់ឱ្យបានពេញលេញ និងមានប្រសិទ្ធភាពនៃកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ (RCEP) ខណៈដែលការធានាថា កិច្ចព្រមព្រៀងពាណិជ្ជកម្មសេរីអាស៊ានដែលមានស្រាប់ និងកិច្ចសហប្រតិបត្តិការសេដ្ឋកិច្ចជាមួយដៃគូសន្ទនាអាស៊ានទាំងអស់នៅតែមានសារៈសំខាន់ និងពាក់ព័ន្ធសម្រាប់ពាណិជ្ជករ និងវិនិយោគិន។
ជាមួយគ្នានេះ លោក ហ៊ុន ម៉ាណែត ក៏បានចង្អុលបង្ហាញថា អាស៊ានគួរតែទាញយកអត្ថប្រយោជន៍ពេញលេញពីការផ្លាស់ប្តូរនិម្មាបនកម្មសេដ្ឋកិច្ចឱ្យកាន់តែមានភាពធន់ តាមរយៈការពន្លឿនការបរិវត្តកម្មឌីជីថលអាស៊ានប្រកបដោយបរិយាប័ន្ន លើកកម្ពស់ការចូលរួមរបស់ MSMEs ក្នុងខ្សែចង្វាក់ផ្គត់ផ្គង់ក្នុងតំបន់ និងពិភពលោក។
លោក គិត ម៉េង ប្រធានសភាពាណិជ្ជកម្មកម្ពុជាបានថ្លែងនៅ ABIS ថា ក្រោមការដឹកនាំរបស់នាយករដ្ឋមន្ត្រីថ្មី ប្រទេសកម្ពុជានឹងឆ្ពោះទៅរកកម្រិតបន្ទាប់នៃការអភិវឌ្ឍសេដ្ឋកិច្ច និងការសម្រេចចក្ខុវិស័យរបស់រដ្ឋាភិបាលក្នុងការប្រែក្លាយទៅជាប្រទេសដែលមានចំណូលខ្ពស់ត្រឹមឆ្នាំ ២០៥០។
លោក គង់ សាង ប្រធានសមាគមវាយនភណ្ឌ កាត់ដេរ ស្បែកជើង និងទំនិញធ្វើដំណើរកម្ពុជាក្នុងលិខិតអបអរសាទរក្រោយការបោះឆ្នោតកាលពីថ្ងៃទី ១ ខែសីហា បានលើកឡើងថា TAFTAC ត្រៀមខ្លួនរួចជាស្រេចក្នុងការបន្តធ្វើជាដៃគូសន្ទនាជាមួយរដ្ឋាភិបាលថ្មីតាមរយៈយន្តការផ្សេងៗ ពិសេសវេទិការាជរដ្ឋាភិបាល និងផ្នែកឯកជន ដើម្បីកែលម្អបរិយាកាសវិនិយោគថែមទៀត និងធានាបានការប្រកួតប្រជែងកាន់តែខ្លាំង។
បរិមាណការផ្លាស់ប្តូរទំនិញរវាងកម្ពុជា និងបណ្ដាប្រទេសជាសមាជិកអាស៊ានចំនួន ៩ ផ្សេងទៀតក្នុងឆមាសទី១ ឆ្នាំ ២០២៣ សម្រេចបាន ៧,១៤ពាន់លានដុល្លារ ធ្លាក់ចុះ ១៧,២ ភាគរយបើធៀបនឹងរយៈពេលដូចគ្នាឆ្នាំ ២០២២។ នេះបើយោងតាមស្ថិតិរបស់អគ្គនាយកដ្ឋានគយ និងរដ្ឋាករកម្ពុជា (GDCE)៕
