នាយករដ្ឋមន្ត្រីថៃ លោក ស្រេតថា ថាវីស៊ីន នឹងបំពេញទស្សនកិច្ចនៅប្រទេសឥណ្ឌានៅមុនដំណាច់ឆ្នាំនេះ ដើម្បីបង្កើនទំនាក់ទំនងទេសចរណ៍ជាមួយឥណ្ឌា។ AFP
នាយករដ្ឋមន្ត្រីថៃដែលទើបឡើងកាន់តំណែង លោក ស្រេតថា ថាវីស៊ីន អះអាងថា ខ្លួននឹងទៅទស្សនកិច្ចនៅប្រទេសឥណ្ឌា នៅមុនដំណាច់ឆ្នាំនេះដើម្បីពិភាក្សាជាមួយសមភាគីឥណ្ឌាអំពីការបង្កើតផលិតផលទេសចរ ជំរុញការទាក់ទាញទេសចរពីប្រទេសឥណ្ឌា។
យោងការផ្សាយរបស់ Bloomberg ព្រះរាជាណាចក្រថៃកំពុងសម្លឹងមើលអ្នកធ្វើដំណើរកម្សាន្តពីប្រទេសឥណ្ឌា ដើម្បីបង្កើនវិស័យទេសចរណ៍ បើទោះបីជាប្រទេសអាស៊ីអាគ្នេយ៍មួយនេះ គ្រោងលើកលែងទិដ្ឋាការសម្រាប់អ្នកធ្វើដំណើរមកពីប្រទេសចិន និងកាហ្សាក់ស្ថានក្នុងរដូវវិស្សមកាលដ៏មមាញឹកក៏ដោយ។
នាយករដ្ឋមន្ត្រី ស្រេតថា បាននិយាយថា លោកនឹងធ្វើដំណើរទៅកាន់ប្រទេសឥណ្ឌានៅឆ្នាំនេះ ដោយមានគម្រោងជួបសមភាគីរបស់លោក គឺលោក Narendra Modi និងពិភាក្សាអំពីការបង្កើនប្រេកង់ហោះហើររវាងប្រទេសទាំងពីរ រួមទាំងសេវាកម្មជាច្រើនទៀតដោយក្រុមហ៊ុនអាកាសចរណ៍ Thai Airways ។
លោក ស្រេត ថា បាននិយាយនៅក្នុងបទសម្ភាសន៍មួយអំឡុងវេទិកាសារព័ត៌មានកាលពីថ្ងៃចន្ទថា«មិនមានជើងហោះហើរចូលច្រើនពីប្រទេសឥណ្ឌានៅឡើយទេ ដោយសារនយោបាយផ្ទៃក្នុង។ ខ្ញុំសង្ឃឹមថានឹងទៅបំពេញទស្សនកិច្ចមុនដំណាច់ឆ្នាំដើម្បីចរចាលើបញ្ហានេះ»។
ប្រទេសថៃក៏អាចនឹងពិចារណាលើវិធានការផ្សេងទៀតដើម្បីជំរុញការមកដល់របស់ភ្ញៀវទេសចរឥណ្ឌា។
លោកបាននិយាយថា ទាំងនេះរួមបញ្ចូលទាំងការផ្តល់ការលើកលែងពន្ធលើគ្រឿងអលង្ការដែលនាំចូលសម្រាប់ពិធីមង្គលការឥណ្ឌាដែលធ្វើឡើងនៅក្នុងប្រទេសថៃ ដែលជាទិសដៅពេញនិយមសម្រាប់ពិធីបែបនេះ។
គាត់បាននិយាយថា ដោយសារអ្នកទេសចរឥណ្ឌាអាចទទួលបានទិដ្ឋាការថៃយ៉ាងងាយស្រួលរួចហើយ ការលើកលែងទិដ្ឋាការប្រហែលជាមិនចាំបាច់ទេ។
ការអត្ថាធិប្បាយរបស់លោក ស្រេតថា ធ្វើឡើងមួយសប្តាហ៍បន្ទាប់ពីខុទ្ទកាល័យរបស់លោកបានអនុម័តការលើកលែងទិដ្ឋាការបណ្តោះអាសន្នសម្រាប់អ្នកទេសចរចិន និងកាហ្សាក់ស្ថាន នៅមុនរដូវកាលខ្ពស់នេះ។
អ្នកទេសចរមកពីប្រទេសទាំងពីរអាចចូលប្រទេសថៃដោយគ្មានទិដ្ឋាការចន្លោះពីថ្ងៃទី ២៥ ខែកញ្ញាដល់ថ្ងៃទី ២៩ខែកុម្ភៈ ហើយអាចស្នាក់នៅបានរហូតដល់៣០ថ្ងៃក្នុងមួយលើក៕
