លោក ហុង សុហួរ អគ្គនាយកក្រុមហ៊ុនផ្សារមូលបត្រកម្ពុជាថ្លែងនាពេលកន្លងទៅ។ រូបថត CSX
ភ្នំពេញ: មន្ត្រីជាន់ខ្ពស់នៃទីផ្សារមូលបត្រកម្ពុជា (CSX) បានលើកឡើងថា ក្រុមហ៊ុនឯកជនចំនួន ២ បានត្រៀមខ្លួន ក្នុងការបោះផ្សាយសញ្ញាបណ្ណបៃតង ដែលជាដំណើរវិវឌ្ឍន៍ថ្មីមួយទៀតសម្រាប់ផ្សារមូលបត្រកម្ពុជា ជាមួយនឹងការកើនឡើងចំណាប់អារម្មណ៍របស់ក្រុមហ៊ុនក្នុងស្រុកលើការកៀរគរទុនពីទីផ្សារមួយនេះដែលបានក្លាយជាប្រភពទុនថ្មីមួយទៀតសម្រាប់វិនិយោគិន។
លោក ហុង សុហួរ អគ្គនាយកក្រុមហ៊ុនផ្សារមូលបត្រកម្ពុជា (CSX) បានថ្លែងប្រាប់ ភ្នំពេញ ប៉ុស្តិ៍ថា លោកបានទទួល ឯកសារផ្លូវការរួចហើយពីក្រុមហ៊ុនចំនួន ២ ក្នុងការស្នើសុំធ្វើការបោះផ្សាយ និង ១ ទៀតកំពុងបំពេញឯកសារបន្ថែម។
លោកបានថ្លែងថា៖ «យើងនឹងធ្វើការ បង្ហាញព័ត៌មានផ្លូវការអំពីការស្នើសុំរបស់ក្រុមហ៊ុនក្នុងរយៈពេល ២ ឬ ៣ សប្តាហ៍ខាងមុខនេះ។ ដូច្នេះយើងនឹងមានក្រុមហ៊ុនកាន់តែច្រើនដែលចាប់អារម្មណ៍ក្នុងការបោះផ្សាយ សញ្ញាបណ្ណបៃតងនៅលើផ្សារមូលបត្រកម្ពុជា ដែលនេះជាសញ្ញាវិជ្ជមានមួយសម្រាប់ការអភិវឌ្ឍទីផ្សារមូលបត្ររបស់យើង»។
លោកបានថ្លែងថា រលកបៃតង ដែលចាប់ផ្តើមជាមួយនឹងការបោះផ្សាយ និងចុះបញ្ជីលក់សញ្ញាបណ្ណបៃតងរបស់ក្រុមហ៊ុនហ្គោលដេនទ្រី បញ្ជាក់ឱ្យឃើញថាវិស័យមូលបត្រក៏កំពុងចូលរួមយ៉ាងសកម្មក្នុងការគាំទ្រ និងលើកកម្ពស់បរិស្ថានជាសកល ដើម្បីសង្គមជាតិ និងពិភពលោកទាំងមូល។
លោកបានថ្លែងថា៖«សម្រាប់សមិទ្ធផលបៃតងថ្មីមួយនេះ ខ្ញុំសូមលើកទឹកចិត្តដល់ម្ចាស់អាជីវកម្មនានាពិចារណាក្នុងការធ្វើពិពិធកម្មមូលធនតាមរយៈទីផ្សារមូលបត្រ ជាពិសេសជាមួយនឹងការកៀរគរទុនដោយបោះផ្សាយ និងចុះបញ្ជីសញ្ញាបណ្ណសាជីវកម្ម៣ប្រភេទរួមមាន សញ្ញាបណ្ណបៃតង សញ្ញាបណ្ណសង្គម និងសញ្ញាបណ្ណនិរន្តរភាពដែលទាក់ទាញទៅដល់វិនិយោគិនសាធារណៈ ក៏ដូចជាវិនិយោគិនស្ថាប័ន ថែមទាំងជួយគាំទ្រទៅដល់បរិស្ថាន សង្គម និងសេដ្ឋកិច្ចជាតិផងដែរ»។
លោក ស៊ូ សុជាតិ អគ្គនាយក SERC បានថ្លែងមកកាន់ ភ្នំពេញ ប៉ុស្តិ៍ថា រហូតមកទល់ពេលនេះ លោកពុំទាន់ទទួលបានឯកសារជាផ្លូវការអំពីការស្នើសុំបោះផ្សាយពីបណ្តាក្រុមហ៊ុននោះឡើយ។ លោកថ្លែងថា៖«ខ្ញុំយល់ឃើញថាពួកគាត់កំពុងធ្វើការផ្ទៃក្នុង និងជាមួយអ្នកដែលជួយសម្របសម្រួលក្នុងការអនុលោមទៅតាមស្តង់ដានៃការបោះផ្សាយសញ្ញាបណ្ណបៃតងនេះ។ ហេតុដូច្នេះហើយទើបវាទាមទារពេលវេលាបន្តិចក្នុងការរៀបចំ»។
ក្រុមហ៊ុនហ្គោលដេនទ្រីបានក្លាយជាក្រុមហ៊ុនក្នុងស្រុកដំបូងគេបង្អស់ដែលបានធ្វើការបោះផ្សាយសញ្ញាបណ្ណបៃតងបានកៀរគរមូលធនប្រមាណជា ១,៤៦ លានដុល្លារកាលពីខែមករា។
កាលពីខែមីនា ឆ្នាំ ២០២៣ គណៈកម្មការសេដ្ឋកិច្ច និងសង្គមកិច្ចអង្គការសហប្រជាជាតិសម្រាប់តំបន់អាស៊ី និងប៉ាស៊ីហ្វិក, វិទ្យាស្ថានកំណើនបៃតងសកល និង SERC ដោយសហការជាមួយស្ថាប័នការធានាឥណទាន និងវិនិយោគ (CGIF) និងក្រុមហ៊ុន GuarantCo ដែលជាផ្នែកមួយនៃក្រុមអភិវឌ្ឍន៍ហេដ្ឋារចនាសម្ព័ន្ធឯកជន បានដាក់ឱ្យដំណើរការគម្រោងជំរុញការបោះផ្សាយសញ្ញាបណ្ណនិរន្តរភាព។
ក្រុមហ៊ុន ៣ ត្រូវជ្រើសរើសសម្រាប់គម្រោងនេះ រួមមាន គ្រឹះស្ថានមីក្រូហិរញ្ញវត្ថុ Amret ដែលនឹងរៀបចំចេញសញ្ញាបណ្ណនិរន្តរភាពមានតម្លៃ ៥០ លានដុល្លារ។ ក្រុមហ៊ុន Golden Tree Co. Ltd បោះផ្សាយលើកទី ២ ក្នុងទឹកប្រាក់ចំនួន ២៥ លានដុល្លារ និងក្រុមហ៊ុន Royal Group Phnom Penh SEZ នឹងបោះផ្សាយទឹកប្រាក់ ២០ លានដុល្លារ៕
