ទិដ្ឋភាពយន្តហោះនៅព្រលានយន្តហោះអន្តរជាតិភ្នំពេញ នាពេលកន្លងទៅ។ រូបថត ហេង ជីវ័ន
ភ្នំពេញៈ អ្នកនៅក្នុងឧស្សាហកម្មទេសចរណ៍ប្រទេសកម្ពុជា មើលឃើញថា ការរីកចម្រើនប្រកបដោយសក្តានុពលក្នុងឧស្សាហកម្មទេសចរណ៍នឹងកាន់តែរីកចម្រើននៅពេលមានការបើកជើងហោះហើរត្រង់កាន់តែច្រើនជាមួយប្រទេសផ្សេងទៀត ខណៈថ្មីៗនេះ ប្រទេសនូវែលសេឡង់ បានបញ្ចប់ការចរចាដោយជោគជ័យសម្រាប់កិច្ចព្រមព្រៀងសេវាកម្មផ្លូវអាកាស (ASA) ជាមួយអាស៊ាន។
យោងតាមសារព័ត៌មាន ch-Aviation បន្ទាប់ពីការចរចាដោយជោគជ័យលើកិច្ចព្រមព្រៀង ASA ជាមួយប្រទេសសមាជិកអាស៊ានផ្សេងៗទៀត ដែលបានធ្វើឡើងនៅក្នុងអំឡុងកិច្ចចរចាជុំចុងក្រោយនៅខេត្តសៀមរាបកាលពីថ្ងៃទី ១៣ ខែកញ្ញា កិច្ចព្រមព្រៀងសេវាកម្មអាកាសចរណ៍អាស៊ាន និងប្រទេសនូវែលសេឡង់ (ANZ-ASA) នឹងអនុញ្ញាតឱ្យក្រុមហ៊ុនអាកាសចរណ៍មកពីបណ្ដាប្រទេសហត្ថលេខីដើម្បីប្រតិបត្តិការសេវាដឹកអ្នកដំណើរ និង/ឬទំនិញបន្ថែមទៀតរវាងតំបន់អាស៊ាន និងប្រទេសនូវែលសេឡង់។
ស្ថិតក្រោមកិច្ចព្រមព្រៀងនេះ ក្នុងពិធីសារទី ១ នៃកិច្ចព្រមព្រៀង ANZ-ASA ក្រុមហ៊ុនអាកាសចរណ៍ដែលទទួលបានសិទ្ធិអាចប្រតិបត្តិការរវាងប្រទេសអាស៊ាន និងនូវែលសេឡង់ ជាមួយសិទ្ធិសេរីភាពចរាចរណ៍ទី៣ និងទី៤ មិនកំណត់។ លើសពីនេះ ក្រុមហ៊ុនអាកាសចរណ៍ដែលទទួលសិទ្ធិ នឹងអាចហោះហើរបានរហូតដល់សេវាប្រចាំសប្ដាហ៍ចំនួន ៧ ជាមួយនឹងសិទ្ធិសេរីភាពចរាចរណ៍ទី៥ បន្ថែមពីលើសិទ្ធិទ្វេភាគីដែលមានស្រាប់រវាងរដ្ឋជាសមាជិកអាស៊ាននីមួយៗ និងប្រទេសនូវែលសេឡង់ រយៈពេល ១ ឆ្នាំ ចាប់ពីថ្ងៃចូលជាធរមាននៃកិច្ចព្រមព្រៀងនេះ និងរហូតដល់ ១៤ សេវាកម្មប្រចាំសប្តាហ៍ជាមួយនឹងសិទ្ធិសេរីភាពចរាចរណ៍លើកទី៥ បន្ថែមលើសិទ្ធិទ្វេភាគីដែលមានស្រាប់បន្ទាប់ពីរយៈពេល ១ ឆ្នាំ គិតពីថ្ងៃចូលជាធរមាននៃកិច្ចព្រមព្រៀង។
លោក Tom Forster ប្រធានគ្រប់គ្រងបទប្បញ្ញត្តិសេដ្ឋកិច្ចនៅក្រសួងដឹកជញ្ជូនប្រទេសនូវែលសេឡង់ ត្រូវបានដកស្រង់សម្តីដោយលើកឡើងថា វាជាការល្អដែលរដ្ឋាភិបាលអាចទទួលបានកិច្ចព្រមព្រៀងសេវាកម្មផ្លូវអាកាសនេះ។
លោកថ្លែងថា៖ «កិច្ចព្រមព្រៀងសេវាកម្មផ្លូវអាកាសថ្មីនេះ លើកកម្ពស់គុណភាពរួមនៃកិច្ចព្រមព្រៀងសេវាកម្មផ្លូវអាកាសរបស់យើងជាមួយអាស៊ាន និងគូសបញ្ជាក់ពីសារៈសំខាន់នៃការតភ្ជាប់ផ្លូវអាកាសសម្រាប់ពាណិជ្ជកម្ម ទេសចរណ៍ ការអប់រំ និងទំនាក់ទំនងរវាងប្រជាជន និងប្រជាជនផ្សេងទៀត»។
លោក ធួន ស៊ីណាន ប្រធានសមាគមទេសចរណ៍អាស៊ីប៉ាស៊ីហ្វិក បានប្រាប់ ភ្នំពេញ ប៉ុស្តិ៍ នៅថ្ងៃទី ១៩ ខែកញ្ញាថា វិស័យទេសចរណ៍នៅតែមានសក្ដានុពលខ្ពស់ក្នុងការរួមចំណែកដល់កំណើនសេដ្ឋកិច្ចរបស់កម្ពុជា ទោះបីមានវិបត្តិសេដ្ឋកិច្ចពិភពលោកនៅពេលបច្ចុប្បន្នក៏ដោយ។ ក្នុងពេលលំបាកនេះនឹងមានតម្រូវការខ្ពស់សម្រាប់សេវាកម្មរហ័ស និងជម្រើសថែមទៀតលើការដឹកជញ្ជូន។
លោកលើកឡើងថា៖ «ទោះខ្ញុំសង្កេតឃើញថា ឧស្សាហកម្មនេះមិនទាន់បានស្ទុះងើបឡើងវិញដូចការរំពឹងទុក ដោយសារយើងមិនមានមធ្យោបាយធ្វើដំណើរច្រើន ជាពិសេសការហោះហើរត្រង់ពីគោលដៅផ្សេងទៀត ហើយថែមទាំងមានកំណើនយឺតជាងប្រទេសជិតខាងរបស់យើងផងដែរ។ ដូច្នេះ ការហោះហើរត្រង់កាន់តែច្រើនពីប្រទេស និងទីក្រុងធំៗផ្សេងទៀត នឹងផ្តល់ឱ្យយើងកាន់តែមានភាពទាក់ទាញសម្រាប់ភ្ញៀវទេសចរទៅកាន់ប្រទេសនានា»។
លោកបញ្ជាក់ថា៖ «ទោះនូវែលសេឡង់ជាប្រទេសតូចមួយ ហើយយើងមិនមានជើងហោះហើរត្រង់ជាមួយគេក៏ដោយ ក៏យើងគួរតែទទួលបានអត្ថប្រយោជន៍ពីពួកគេដោយសារពួកគេបានភ្ជាប់ជើងហោះហើរត្រង់ជាមួយប្រទេសអាស៊ានមួយចំនួនផ្សេងទៀត។ ដូច្នេះ នៅពេលដែលយើងមានជើងហោះហើរពីប្រទេសនោះ ពួកគេអាចបម្រើជាមជ្ឈមណ្ឌលតភ្ជាប់មកប្រទេសយើង»។
បើយោងតាមរដ្ឋលេខាធិការដ្ឋានអាកាសចរស៊ីវិល បច្ចុប្បន្នមានក្រុមហ៊ុនអាកាសចរណ៍អន្តរជាតិសរុបចំនួន ២៦ បានដំណើរការជើងហោះហើរ ឬស្មើនឹង ៨៤៤ ទៅមកក្នុង ១ សប្តាហ៍គិតត្រឹមចុងខែឧសភា ដែលរាប់ទាំងជើងហោះហើរក្នុងស្រុក និងក្រៅស្រុក។
ព្រលានយន្តហោះអន្តរជាតិភ្នំពេញមានជើងហោះហើរច្រើនជាងគេ គឺមានដល់ចំនួន ៦៣៤ ឬ ៧៥,១២ ភាគរយ តាមពីក្រោយដោយព្រលានយន្តហោះអន្តរជាតិខេត្តសៀមរាប (១៩៦ ស្មើ ២៣,២២ ភាគរយ) និងព្រលានយន្តហោះខេត្តព្រះសីហនុ (២២ ស្មើ ២,៦១ ភាគរយ)។ កម្ពុជាមានក្រុមហ៊ុនអាកាសចរណ៍ចំនួន ៤៣ បានដំណើរការនៅក្នុងឆ្នាំ ២០១៩ មុនពេលមានការរីករាលដាលជំងឺកូវីដ ដោយមិនរាប់បញ្ចូលសេវាហោះហើរលក្ខណៈជួល៕
