ការលើកដាក់ទំនិញនៅកំពង់ផែស្វយ័តក្រុងព្រះសីហនុ។ ហេង ជីវ័ន
ភ្នំពេញៈ បើទោះបីស្ថានភាពហិរញ្ញវត្ថុសកលពេលនេះមិនល្អ ប៉ុន្តែសម្រាប់ប្រទេសកម្ពុជាអត្រានៃលំហូរវិនិយោគផ្ទាល់ពីបរទេស (FDI) នៅក្នុងឆមាសទី១ ឆ្នាំ ២០២៣ គឺកើនឡើងជាង ៤១ ភាគរយបើធៀបនឹងរយៈពេលដូចគ្នាឆ្នាំ ២០២២។ នេះបើតាមសេចក្តីប្រកាសព័ត៌មានទីស្តីការគណៈរដ្ឋមន្ត្រី។
សេចក្តីប្រកាសព័ត៌មានស្តីពីលទ្ធផលសម័យប្រជុំពេញអង្គគណៈរដ្ឋមន្ត្រីកាលពីថ្ងៃទី ២០ ខែកញ្ញា បានឱ្យដឹងថា៖ «ក្នុងឆ្នាំ ២០២៣ នេះលំហូរវិនិយោគផ្ទាល់ពីបរទេសមានកំណើនខ្ពស់ក្នុងអត្រាប្រមាណ ៤១,៦ ភាគរយសម្រាប់ឆមាសទី១ ឆ្នាំ ២០២៣ ធៀបនឹង ០,៤ ភាគរយ ឆ្នាំ ២០២២ បើទោះបីស្ថានភាពហិរញ្ញវត្ថុសកល មានការរឹតបន្តឹងយ៉ាងណាក្តី»។
សេចក្តីប្រកាសព័ត៌មានបានឱ្យដឹងទៀតថា ជាមួយនឹងភាពវិជ្ជមានរបស់ FDI នេះ វិស័យកសិកម្មត្រូវបានវាយតម្លៃថានឹងសម្រេចបានកំណើន ០,៩ ភាគរយដូចការរំពឹងទុក។ ចំពោះអនុវិស័យសណ្ឋាគារ និងភោជនីយដ្ឋានត្រូវបានវាយតម្លៃថា ងើបឡើងវិញលឿនក្នុងអត្រា ៤១,៥ ភាគរយ។
ចំពោះអនុវិស័យកម្មន្តសាលមិនមែនកាត់ដេរ ត្រូវប៉ាន់ស្មានថា នឹងមានកំណើនរឹងមាំក្នុងអត្រា ១១,៧ ភាគរយ ដូចការរំពឹងទុកដែលគាំទ្រភាគច្រើនដោយការនាំចេញបន្ទះសូឡា ជាពិសេសទៅកាន់ទីផ្សារសហរដ្ឋអាមេរិក ស្របពេលដែលលំហូរនៃការវិនិយោគផ្ទាល់ពីបរទេសក្នុងអនុវិស័យកម្មន្តសាលមិនមែនកាត់ដេរ មានការកើនឡើងគំហុកក្នុងអត្រា ១៧២ ភាគរយ។
ដើម្បីជំរុញកំណើនសេដ្ឋកិច្ច និងលើកទឹកចិត្តចំពោះប្រជាកសិករ លោកនាយករដ្ឋមន្ត្រី ហ៊ុន ម៉ាណែត ក្នុងកិច្ចប្រជុំខាងលើ ក៏បានណែនាំដល់ក្រសួង-ស្ថាប័ន និងភាគីពាក់ព័ន្ធត្រូវខិតខំរកទីផ្សារសម្រាប់ប្រជាកសិករ ពិសេសនៅក្នុងរដូវច្រូតកាត់ដែលនឹងចូលមកដល់នាពេលដ៏ខ្លីខាងមុខ ព្រមទាំងផ្តល់ការពិគ្រោះយោបល់អំពីដំណាំសក្តានុពលសម្រាប់រដូវបន្ទាប់។
អ្នកសេដ្ឋកិច្ចនៃរាជបណ្ឌិត្យសភាកម្ពុជា លោក ហុង វណ្ណៈ និយាយថា កត្តាទីតាំងភូមិសាស្ត្រ ធនធានមនុស្ស ទីផ្សារនាំចេញ និងការធ្វើកំណែទម្រង់ប្រព័ន្ធច្បាប់វិនិយោគ បានធ្វើឱ្យកម្ពុជាក្លាយជាទីតាំងដ៏មានសក្តានុពលសម្រាប់វិនិយោគលើគ្រប់វិស័យ។ បច្ចុប្បន្នក្រៅពីការបណ្តាក់ទុនដ៏ច្រើនពីក្រុមហ៊ុនបរទេស ក៏មានវិនិយោគិនក្នុងស្រុកជាច្រើនបានបញ្ចេញប្រាក់មកវិនិយោគដែរ។
លោកបន្តថា កិច្ចព្រមព្រៀងពាណិជ្ជកម្មសេរី និងប្រព័ន្ធអនុគ្រោះពន្ធនាំចូលពីប្រទេសធំៗ ដែលកម្ពុជាមាន គឺកំពុងរួមចំណែកយ៉ាងច្រើនក្នុងការទាក់ទាញវិនិយោគិនបរទេសឱ្យចូលមកបណ្តាក់ទុននៅកម្ពុជា។
លោកបញ្ជាក់ថា៖ «ជាមួយនឹងអ្វីដែលកម្ពុជាកំពុងមាន ខ្ញុំគិតថាអត្រាកំណើនការវិនិយោគផ្ទាល់ពីបរទេសនៅកម្ពុជានឹងកើនបន្ថែមទៀត ពិសេសនៅពេលវិបត្តិនានាដែលកំពុងកើនពេលនេះបិទបញ្ចប់ទៅវិញ»។
ក្នុងវេទិកាធុរកិច្ចមួយកាលពីថ្ងៃទី ១១ ខែសីហា លោក ជា វុទ្ធី អគ្គលេខាធិការរងក្រុមប្រឹក្សាអភិវឌ្ឍន៍កម្ពុជា (CDC) បានលើកឡើងថា ទោះបីការបន្តអូសបន្លាយពេលនៃការរីករាលដាលជំងឺកូវីដ ១៩ ភាពតានតឹងផ្នែកភូមិសាស្ត្រនយោបាយ និងភាពតានតឹងផ្នែកពាណិជ្ជកម្មរវាងអាមេរិក និងចិននៅបន្ត ក៏លំហូរវិនិយោគបរទេសនៅកម្ពុជា នៅតែមានស្ថិរភាពល្អបើធៀបប្រទេសក្នុងតំបន់។
លោកថ្លែងថា៖ «យើងមើលឃើញហើយថា ទោះបីក្នុងវិបត្តិកូវីដ ១៩ ភាពតានតឹងនៃភូមិសាស្ត្រនយោបាយ និងភាពតានតឹងនៃស្ថានភាពពាណិជ្ជកម្មអាមេរិក និងប្រទេសចិន ក៏លំហូរវិនិយោគបរទេសនៅប្រទេសកម្ពុជាមានស្ថិរភាពគួរឱ្យកត់សម្គាល់។ ជាក់ស្តែងតួលេខបង្ហាញថាយើងទទួលបានលំហូរវិនិយោគបរទេសជិត ៤ ពាន់លានដុល្លារ ក្នុង ១ ឆ្នាំ។ ឆ្នាំ ២០២០ ក្នុងតំបន់អាស៊ានមានការធ្លាក់ចុះដល់ ៤០ ភាគរយ ប៉ុន្តែយើងនៅមានស្ថិរភាពក្នុងរង្វង់ ៣,៦ ពាន់លានដុល្លារ»។
បើតាមលោក ជា វុទ្ធី វិនិយោគិនបរទេសដែលបណ្តាក់ទុននៅកម្ពុជា គឺមានមកពីប្រទេសជាច្រើនដូចជា ចិន, ថៃ, ជប៉ុន, Cayman Islands, កូរ៉េខាងត្បូង និងអង់គ្លេសជាដើម៕
