NBC ស្នើដល់រដ្ឋាភិបាលបារាំង បន្តចួលរួមចំណែកអភិវឌ្ឍវិស័យហិរញ្ញវត្ថុរបស់ប្រទេសកម្ពុជា។ រូបថត NBC
ភ្នំពេញៈទេសាភិបាលធនាគារជាតិនៃកម្ពុជា (NBC) លោកស្រី ជា សិរី បានសាទរចំពោះការចូលរួមចំណែករបស់រដ្ឋាភិបាលប្រទេសបារាំង តាមរយៈទីភ្នាក់ងារបារាំងសម្រាប់អភិវឌ្ឍន៍ (AFD) ក្នុងការអភិវឌ្ឍវិស័យហិរញ្ញវត្ថុរបស់ប្រទេសកម្ពុជា ជាពិសេសវិស័យមីក្រូហិរញ្ញវត្ថុ ដែលធ្វើឱ្យវិស័យនេះមានការរីកចម្រើនពី ១ឆ្នាំទៅ ១ឆ្នាំ។
ការលើកឡើងរបស់ លោកស្រី ជា សិរីធ្វើឡើងក្នុងជំនួបពិភាក្សាការងារជាមួយលោក Jacques Pellet ឯកអគ្គរដ្ឋទូតបារាំងប្រចាំកម្ពុជា និងលោកស្រី Sandrine Boucher នាយិកាទីភ្នាក់ងារបារាំងសម្រាប់អភិវឌ្ឍន៍ប្រចាំកម្ពុជា (AFD)។ នេះបើយោងតាមសេចក្តីប្រកាសព័ត៌មានរបស់ NBC។
បើតាមសេចក្តីប្រកាសព័ត៌មាននោះ កិច្ចពិភាក្សាក្នុងជំនួបនេះ បានគ្របដណ្តប់លើប្រធានបទជាច្រើនស្តីពីសកម្មភាពកិច្ចសហប្រតិបត្តិការរបស់ AFD នៅកម្ពុជានាពេលកន្លងមក និងជាពិសេសការប្តេជ្ញាចិត្តរបស់ AFD ក្នុងការបន្តអភិវឌ្ឍវិស័យមីក្រូហិរញ្ញវត្ថុនៅកម្ពុជា តាមរយៈការបន្តផ្តល់ហិរញ្ញប្បទាននិងជំនួយបច្ចេកទេសសំដៅពង្រឹងនិងពង្រីកលទ្ធភាពក្នុងការផ្តល់សេវាហិរញ្ញវត្ថុឱ្យបានកាន់តែទូលំទូលាយ។
លោកស្រី ជា សិរី បានកោតសសើរដល់ AFD ដែលបានចូលរួមគាំទ្រការអភិវឌ្ឍវិស័យមីក្រូហិរញ្ញវត្ថុនៅកម្ពុជា នាពេលកន្លងមក និងបានថ្លែងអំណរគុណចំពោះការប្តេជ្ញាចិត្តដ៏មោះមុតរបស់ AFD ក្នុងការបន្តសហប្រតិបត្តិការអភិវឌ្ឍន៍វិស័យមីក្រូហិរញ្ញវត្ថុកម្ពុជាបន្ថែមទៀត ដែលនឹងរួមចំណែកយ៉ាងសំខាន់ដល់ការធ្វើឱ្យប្រសើរឡើងនៃជីវភាពប្រជាពលរដ្ឋ និងជំរុញកំណើនសេដ្ឋកិច្ច។
លោកស្រីបានស្នើបង្កើនកិច្ចសហប្រតិបត្តិការ ក្នុងការគាំទ្រដល់ការបណ្តុះបណ្តាល ជាពិសេស សម្រាប់មជ្ឈមណ្ឌលសិក្សាបច្ចេកទេសធនាគារ របស់ធនាគារជាតិនៃកម្ពុជា ក្នុងការពង្រីកវិសាលភាព និងគុណភាពសិក្សារួមទាំងការធ្វើឱ្យប្រសើរឡើងនូវកម្មវិធីសិក្សា និងមុខវិជ្ជាសិក្សា។
ក្រៅពីនេះ លោកស្រីក៏បានស្នើឱ្យ AFD ជួយពង្រឹងសមត្ថភាពមន្ត្រីបុគ្គលិកលើផ្នែកគ្រប់គ្រងសារមន្ទីរ និងជំនាញទាក់ទងធនាគារកណ្តាលតាមរយៈការផ្តល់អាហារូបករណ៍ ឬការចែករំលែកជំនាញពីជំនាញការប្រទេសបារាំង។
លោកស្រី Sandrine Boucher បានលើកឡើងអំពីសកម្មភាពការងាររបស់ AFD នៅកម្ពុជា ដែលរួមមានដូចជាការផ្តល់ហិរញ្ញប្បទានដល់គ្រឹះស្ថានមីក្រូហិរញ្ញវត្ថុ និងការផ្តល់ជំនួយបច្ចេកទេសដល់ស្ថាប័នហិរញ្ញវត្ថុនានារួមទាំងសមាគមមីក្រូហិរញ្ញវត្ថុកម្ពុជា (CMA) សំដៅគាំទ្រដល់ការពង្រឹងសមត្ថភាពស្ថាប័ននិងរួមចំណែកលើកកម្ពស់គោលកាណ៍ការពារអតិថិជន។
លោកស្រី Sandrine Boucher បានបញ្ជាក់ថា៖« AFD ប្តេជ្ញាបន្តកិច្ចសហប្រតិបត្តិការអភិវឌ្ឍន៍វិស័យមីក្រូហិរញ្ញវត្ថុនៅកម្ពុជាបន្ថែមទៀត និងរីករាយបន្តកិច្ចសន្ទនាដោយបើកចំហជាមួយធនាគារជាតិនៃកម្ពុជា និងស្ថាប័នពាក់ព័ន្ធដើម្បីលើកកម្ពស់ការផ្តល់កម្ចីប្រកបដោយការទទួលខុសត្រូវ ធ្វើឱ្យប្រសើរឡើងនូវការគ្រប់គ្រងហានិភ័យ និងលើកកម្ពស់ចំណេះដឹងផ្នែកហិរញ្ញវត្ថុ»។
លោកស្រីបានថ្លែងបញ្ជាក់ថា៖«កិច្ចសហប្រតិបត្តិការរបស់ AFD លើផ្នែកផ្សេងទៀតដូចជា ហិរញ្ញប្បទានបៃតង ថាមពល ទឹកស្អាត និងអគ្គិសនី ជាដើម»។
យោងតាមរបាយការណ៍របស់ NBC គិតត្រឹមដំណាច់ខែមិថុនាឆ្នាំ២០២៣ នៅកម្ពុជាមានធនាគារ គ្រឹះស្ថានមីក្រូហិរញ្ញវត្ថុទទួលប្រាក់បញ្ញើ៥ គ្រឹះស្ថានមីក្រូហិរញ្ញវត្ថុ មិនទទួលប្រាក់បញ្ញើ៨២ គ្រឹះស្ថានឥណទានជនបទ១១៨។
សម្រាប់វិស័យមីក្រូហិរញ្ញវត្ថុ ឥណទានអតិថិជន បានកើនឡើង ១៤,៨ ភាគរយ ដល់ ៩,៧ ពាន់លានដុល្លារ។ ឥណទានទាំងនោះ ផ្តល់ទៅវិស័យសំខាន់ៗដូចជា អង្គភាពគ្រួសារ ៣៤ ភាគរយ (កើន ១៨,៤ ភាគរយ); ពាណិជ្ជកម្មនិងជំនួញ ២៣,២ ភាគរយ (កើន ១៥ ភាគរយ); កសិកម្ម ១៧,៧ (កើន ១៣,២ ភាគរយ); សេវាកម្ម១៣,៤ (កើន ៨,៩ ភាគរយ); ដឹកជញ្ជូន ៤,២ ភាគរយ (កើន ០,២ ភាគរយ);សំណង់ ៤,៤ ភាគរយ (កើន ១៤ ភាគរយ);កម្មន្តសាល ១,៩ ភាគរយ (កើន ៣០,៨ ភាគរយ) និងផ្សេងៗ ១,៣ ភាគរយ (កើន ៤២,៤ ភាគរយ)។ វិស័យនេះ បានទទួលប្រាក់បញ្ញើ ៤,៩ ពាន់លានដុល្លារ ស្មើនឹង ២,៧ លានគណនី៕
